Kurdînûs

➿ @Kurdinus
من هەر وەک ژنێک دەمەوێی،
تاکوو ژیان لەم نیشتمانەی تێیدا دەژین،
بەردەوام بێ.
تا لەم سەدەیەی تێیدا دەژین،
شێعر هەروا بەردەوام بێ.
تا ئەستێرەکان و سووڕی دەوران،
بەردەوام بن و
کەشتییەکان و دەریا و پیتەکانی ئەلفوبێش،
بەردەوام بن.
تا تۆ "ژن" بی، ئێمەش باشین
هەر وەک ژنێک دەمەوێی،
چون شارستانییەت ژنانەیه.
چون شێعر ژنانەیه.
هێشووی گەنم ژنانەیه.
شووشەی عەتر ژنانەیه.
له شاراندا، پاریس ژنانەیه و
بەیرووت،
وێڕای هەموو زامەکانی،
ژنانه دەمێنێتەوه.
سوێندت دەدەم،
بەو کەسانەی شێعر دەنووسن؛
"ژن" به...
سوێندت دەدەم،
بەو کەسانەی به ئەوینەوه دەنووسێن؛
"ژن" به...
➿ @Kurdinus
"نیزار قەببانی، وەرگێڕ: مەسعوود تەهازاده"

➿ @Kurdinus
- له مردن دەترسی؟
بوکۆفسکی: کێ؟ من؟ نا به هیچ شێوه. یەک دوو جار زۆر له مردن نزیک بوومەتەوه. لێی ناترسم. هەستێکی خۆش بوو که تا ئەو ڕادەیه لێی نزیک ببوومەوه. نیگەرانی چوونه بەهەشت یا دەوزەخ نی. تەنیا دەڕۆی تا دەست له هەموو شتێک هەڵگری. هەموو شتێک له گۆڕاندایه.
کاتێک که بیست و پێنج ساڵانه بووم، له نەخۆشخانەی گشتی خەریک بوو ناوم بخەنه پاڵ مردووەکانەوه. بەڵام نەمردم. له نەخۆشخانەکه دەرکەوتم. پێیان گوتبووم که ئەگەر تاقه قومێکی دیکە ئەڵکۆڵ بخۆمەوە دەمرم و من یەکەم کارێک که پاش چوونەدەر له نەخۆشخانەکه کردم، خواردنەوەی ئابجۆیەک بوو... نا، دوو ئابجۆ.
- ئەم هەڵسوکەوته جۆرێک کەمتەرخەمی و گرینگینەدان به ژیان بوو؟
بوکۆفسکی: نا، کەمتەرخی له ئاست هەموو ئەو کەسانە بوو که درۆیان پێ گوتبووم. مردن شتێکی باشه، یا با بڵێم باش و خراپی نییه. دەزانی چیی پێ دەڵێن؟ "درێژترین سەفەر".
ژیان لەگەڵ کەسێک که خۆشت ناوێ و ناچار لەگەڵی بی، زۆر له مردن ناخۆشتره. هەشت کاتژمێر کارکردن له شوێنێک که ڕقت لێیەتی، له مردن ناخۆشتره...
➿ @Kurdinus
"بەشێک له وتووێژ لەگەڵ چارلز بوکۆفسکی"

@Kurdinus
من ئەلێم‌‌،
پەپوولەیەک فڕی به باڵی سەوز و سوورەوە
من ئەلێم،
گوڵێک بەدەم شنەی شەماڵەوە
بزەی بزووت
تۆ ئەڵێی، چ بوو پەپوولەیەک فڕی
یانە سوورە گوڵ،
زەردە کەوتە لێوی ناسکی؟
من ئەڵێم، هەتاهەتایە دەوری جوانییە
ئەمرۆ گەر هەتاو کەسیرەیە،
نەماوە ئاگر و گڕی
مێرگی ئاسمان،
بە سووتمانی هەوری لۆکەیی نەزۆک،
پڕ لە خاڵ و قۆپەنە
جەنگەڵێ کە جێژوانی پۆلەپۆڕی بارە،
جێگەمۆڵی کەمتیار و گورگ و ڕێوییە،
شۆڕەبی،
کە بۆتە داری چاکی بێ نەشە و شنە،
زەلکە گەر تەیاری تیر و قۆشەنە
@Kurdinus
خۆشەویستەکەم،
لە پەنجەرەی نیوەتاکی بوومەلێڵەوە،
چاوی من،
لە دیمەنی کچی بەیانییە
لە حەنجەرەی زەمانەوە،
گوێم لە زەمزەمەی زوڵاڵی خیزەوردەکانی کانییە
باسی شەو مەکە،
نە شایەری شەوم
باسی خەو مەکە،
لەلای هومێدێ فێرە سەرڕەوم
بەو دەمەت،
کە بۆنی سەد بەهاری لێوە دێ
بۆنی دەشتی بەختیاری باوەشی چیای،
بە دەستی با،
بە گوڵ چناوی لێوە دێ
بۆنی سەرسەکۆی بە کاگڵی،
بە ئاوپژاوی لێوە دێ
پێم مەڵێ کە داکەوم
پێم مەڵێ کە ئاڵی زاڵی شەو،
چاوی بێ خەوی چڕە
پێم مەڵێ،
نەهاتنەوە ئەوەی کە چوون
مەگری بۆ خەساری بێ گەڕانەوە
ڕێگەمان دوور و سەخت و قاقڕە
خۆشەویستەکەم،
ئێمە نوێنەری خەباتی ڕۆژهەڵات،
ڕۆژهەڵاتی سووری ئاگرین
فێر نەبووین بەزین و دابەزین
ڕانەهاتووە چاوی قارەمانی کورد،
بە شەونمی گرین
خۆشەویستەکەم،
لە پەنجەرەی نیوەتاکی بوومەلێڵەوە
چاوی من، لە دیمەنی کچی بەیانییە
لە حەنجەرەی زەمانەوە،
گوێم لە زەمزەمەی زوڵاڵی خیزەوردەکانی کانییە...
➿ @Kurdinus
"سواره ئیلخانیزاده"

➿ @Kurdinus
ئەمڕۆ شاعیر ئامانجێکی تازەی دۆزیوەتەوە. ڕاسپێرییەکی نوێی کەوتۆتە سەر شان. ڕاسپێریی بۆ خەڵک ژیان و لە پێناوی مرۆڤایەتییا مردن. شاعیری ئەمڕۆ ئەبێ شارەزا بێ بەم ڕاستەقینەیە کە هەزارەها گوێگر بە تاسەوە گوێیان لە وتاری ئەو گرتووە و شاعیر ناچارە لە پلەی ئاسایی بەرزتر بێتەوە، لە هەموو تێکۆشانێکا هەنگاوی یەکەم ئەو هەڵی گرێ. هەڵبەت ئەم ڕاسپێرییە هی گشت ئەو کەسانەیە کە بە چەشنێ ئەبنە جێگای چاو لێکردنی خەڵک و قسە و کردەوەیان لەنێو خەڵکا لایەنگری هەیە و ڕەوایە.
هونەرمەند ئەندازیاری کۆشکی ئاواتی بەیانی کۆمەڵە؛ ڕچەشکێن و هاندەر و ڕێ پیشاندەرە؛ شاعیریش کە هونەرمەندی هەرێمی وتارە، ڕازێنەرەوەی جیهانێکە کە ئەبێ کۆمەڵ بەرەو ئەو جیهانە بڕوا. خەڵکی ئاسایی بە کەنار هەزار دزێوی و ناحەزییا بێ ئەوە سەرنج بدەن و ئەو ناحەزییە هەست بکەن تێ ئەپەڕن، تەنیا شاعیرە کە ئەتوانێ گاهێ بە هەڕەشەی وشەی ترسێنەر و گاهێکیش بە هیوابزواندن و وتاری ئاگرین خەڵک تێ بگەیێنێ کە ئەوەی وا بێدەربەست بە پەنایا ڕائەبوورن نابارییەکە کە تازە خەریکی ڕیشاژۆ و سەرهەڵدانە و ئەگەر بژار نەکرێ، بەیانی ئەبێتە کۆسپێکی پڕ مەترسی.
شاعیر نییە ئەو کەسە وا وشە لیزگە ئەکا. ئەو کەسە هەڵبەستەچییە نەک شاعیر؛ شاعیر تا دەردێکی نەبێ ، تا بڕوایەک لە دەروونییا نەبێ هەوێن و شەپۆڵ نەدا، شێعر ناڵێ؛ کاتێ دەرد ئەوەندە زۆر بوو کە ئیتر دڵ وسینگ و هەناو هەڵی نەگرت، سەرڕێژ ئەکا.
ئەم سێڵاوە کە لە کۆبوونەوەی هەزاران سەرڕێژی بەربەندی دەرد پێک دێ، مەزاری هەژار و جووتیار ئەگەشێنێتەوە و ماڵی چەوسێنەرەوە خاپوور ئەکا؛ بێگومان هەر دڵێ کە دەردی هەبێ ئەناڵێنێ، هەر زمانێ کە بڵێسەی بەتینی دڵی تێ بەربێ دێتە وتار و هەر وتارێ لە ناخی دڵی بەدەردەوە هەستێ، ئەنیشێتە سەر دڵی خەڵک.
وتارێ کە ڕاستی و جوانی بنوێنێ، بێگومان لەسەر کۆمەڵ کار ئەکا. کە وەهایە بۆ ناسینی شاعیر لە پێشا بزانە کێ شێعری ئەخوێنێتەوە
➿ @Kurdinus
"تاپۆ و بوومەلێڵ، سواره ئیلخانیزاده"

➿ @Kurdinus
زۆربەی خەڵک یەکەم کێشەیان ئەوەیه که خۆشیان بوێن، نەک ئەوەی که بۆخۆیان خاوەن خۆشەویستی بن یا توانای مێهرەبانی و خۆشەویستییان هەبێ. کەواته مەسەلەی هەره گرینگ بۆوانه ئەمەیه که چەندەیان خۆش دەوێن و دەبێ چ بکەن که خۆشیان بوێن. هەر بۆیەش چەند ڕێگه دەگرنه بەر تا بەم ئامانجەیان بگەن. بۆ نموونه هەوڵ دەدەن که بەپێی پێگەی خۆیان له کۆمەڵگەدا، کەسانێکی سەرکەوتوو بن به تایبەت له بواری هێز و سەروەت و ساماندا و ئەمەش زۆرتر لەبارەی پیاوەکاندایه، ژنەکان هەوڵ دەدەن که به ڕێکوپێککردن و نواندنی جەسته، جلوبەرگی ڕازاوه و شتی لەم شێوەیه خۆیان وەک کەسێکی جوان و سەرنجڕاکێش نیشان بدەن.
هەردوو چین هەوڵ دەدەن که به هەڵسوکەوتێکی نەرم و قسەی هەستبزوێن و به یارمەتیدانی کەسانی دیکه و خۆ پاراستن له ئازاریان، خۆیان له دڵی خەڵکدا جێ بکەنەوه.
هەر ئەو ڕێگەیەش بۆ خۆشەویستبوون هەڵدەبژێرن که بۆ سەرکەوتووبوون کەڵکی لێ وەردەگرن.
ئەم هەڵگرتنەوە و تێگەیشتنەی که زۆربەی خەڵک له فەرهەنگی ئەمڕۆی ئێمەدا له خۆشەویستبوون و لەبەردڵبوون هەیانه، له ڕاستیدا تێکەڵاوێکه له گشتپەسەندی و سەرنجڕاکێشیی سێکسی.
➿ @Kurdinus
"هونەری خۆشەویستی، ئێریک فرۆم"