ازيك يا إبراهيم ؟
أنا قلت أكلمك „ جيت على بالي النهاردة فقلت مش .. مش إشكال لو أعرف أخبارك إيه .
أنا عارفة إن إحنا المفروض منتكلمش „ و عارفة إن مكالمتي بالذات دلوقتي ممكن تضايقك .
بس أنا مستغربة إزاي الموضوع خلص كده و مابقيناش نعرف حاجة عن بعض .
غريبة إني مبقتش أعرف يومك كان ماشي إزاي „ كل واحد له حياته „ و بقى في دنيا بعيد عن التاني .
سكك صعب أوي تتلاقى „ صعب أوي تتلاقى زي الأول „ بالذات في دنيا بتجري بالشكل ده .
مش عارفة أنا بقولك الكلام ده ليه „ يمكن .. لو الواحد مقلش اللي في مخه „ احتمال يتجنن „ أو ممكن يصحى يلاقي نفسه في عالم تاني „ زي ما حصل معانا كده.
غريبة قد إيه بنتغير „ مع إن مفيش حاجة بتتغير فعلاً .
إبراهيم أنا مش عارفة أنا إمتى هقدر أكلمك تاني „ مش عارفة إن كنت هاكلمك تاني من أساسه .
و أكيد مش عارفة إمتى ممكن نتخبط ف بعض صدفة في حتة .
قلت أسيب لك رسالة زي دي „ عبيطة „ ملهاش أي معني .
مش عارفة إنت هتقول إيه لما تسمع الرسالة „ اللي مش عارفة أنا باقول فيها إيه من أصله „ بس يمكن حبيت أتكلم معاك زي الأول „ .
عمومًا „ نفسي الأمور عندك تتحسن „ نفسي أقولك متزعلش . إبراهيم .. صدقني .. كله هيبقى كويس .