Ikkinchi xotinning maktubi
Salom, mendagi baxtning qonuniy egasi, men sevgan insonning oila bekasi. Xatingizni o'qidim, yana uch qayta o'qidim. Azoblaringizdan jonim og'ridi, ammo ajablanmadim. Aksincha, siz mening maktubimdan ko'proq ajablansangiz kerak. Yoshlik davringizdagi mag'rurlik-u masrurlik haqida yozibsiz. Eh...Yoshlik bebaho davr. U vaqt odamda hech bir gard bo'lmas ekan. afsuski kimlardadir bu davr erta tugaydi. Men ana shunday yoshlikni boshdan o'tkazdim. 13 yoshligimda dadam vafot etib, tirikchilik ko'yida kirmagan ko'cham qolmadi, ammo nomusimga gard yuqtiradigan biror ish qilmadim. Dunyoda vijdon va halollik bilan ham yaxshi yashash mumkin degan falsafam bor edi. Juda ko'p insonlarni uchratdim. Ammo afsuski, bu falsafam o'zini oqlamadi. Men sevib qoldim, yagona aybim shu. Ayol sifatida sevganim bilan baxtli turmushim bo'lishini xohladim. Umr yo'ldoshingiz ham meni sevgani ikkimizning baxtli bo'lishimizga yetadi deb o'ylaganim eng katta xatoyim bo'ldi. Boylik, o'ziga to'qlik, ota mehri, oilaviy hotirjamlik haqidagi orzularim o'z yo'liga, ammo eng alam qilgani oq libos haqidagisi bo'ldi. Men ham 18 yoshimda hamma qiz qatori oq libos kiyishni, birovning yagona rafiqasi bo'lishni orzu qilardim. Meniki bo'lmagan insonni mendan bir kunga so'rabsiz. Boshqa degan so'z azob beradi debsiz. To'g'ri, yoring o'zga bilan bo'lishi azob. Ammo siz ko'rmagan yana ko'rmaydigan boshqa bir azob ham bor menda. O'sha siz aytgan BOSHQAdan ham og'ir so'z bu - IKKINCHI . Men o'z nomim bilan ikkinchiman. Har jabhada mening masalam sizdan keyin ko'riladi. Va yana eng alamli bir narsa : men yashirinchaman. Allohning oldida o'qilgan nikohdan boshqa hech biri meniki emas. Baxtsizligingizning sababchisi ekanimdan tonmayman, ammo baxtingiz ustiga baxt qurganim yolg'on. Umr yo'ldoshim qo'ng'iroq qilib, ishlarim bor desa, nima ish ekanini bilib azob chekaman debsiz. Ammo ishoning shu holatingizda siz mendan yuz chandon baxtlisiz. Chunki siz umr yo'ldoshimizga istagan vaqt qo'ng'iroq qila olasiz, men bu baxtdan mahrumman, chunki men yashirincha odamman. Mening yonimda turib, sizga qo'ng'iroq qilib mendan tonganda ham chidashga mahkumman, chunki men siz aytgandek bir "ish"man. Sizning qurganingiz haqiqiy oila, axir farzandlaringiz ko'chada u mening otam deb, o'zingiz u mening erim deb boshingizni baland ko'tarib yura olasiz. To'y-hasham bo'lsa, to'rga chiqadigani sizsiz, qarindosh-urug'ga ko'rinadigani sizsiz. Men esa xuddi ro'yodekman. Biz uchun oila men, u va farzandimiz. Men ham kimdir meni kelinim, kimdir shirin jilmayib kelinoyim deyishini orzu qilgandim bir vaqtlar. Men ham kelinlik zar liboslarda yorimning qarindoshlariga salom qilishni xohlardim. Men ham ro'molim ochilishini intizor kutgan yosh bolalarga ro'molcha berishni, farzandli bo'lganimda suyunchiga mahalla-ko'y to'planib, ustimdan zarlar sochilishini niyat qilgandim. Men ham ko'cha supurgani chiqqanimda odamlar qiziqsinib, havaslanib qarashini xohlardim. Ammo menda sizdan tortib olingan mehrdan boshqa hech biri bo'lmadi. Farzandim dunyoga keladigan kun ham qo'ng'iroq qilolmay xabar jo'natdim. Tug'ruqxonadan uchovlon hech qanday marosimsiz chiqdik. Nabirali bo'ldim deb onam, qarindoshlarim to'ylar bilan beshik olib kelolmadi. Biz doim uchta bo'ldik va qo'rqamanki, bir kun u oilasiga qaytishga qaror qilsa, holim ne kechadi deb? Yana qo'rqaman bir kun farzandim katta bo'lib, meni qismatida aybdor deb bilsa..Bilasizmi, eng boshidan u sizniki bo'lgan, eng oxirigacha u sizniki. Biror kun falokat yetib, olamdan ko'z yumsa, men marakaga ham borolmaydigan darajada yashirin odamman, o'shanda ham uni quchib yig'lay olasiz. So'nggi manzilga sizning ostonaningdan olib ketishadi. Men buni balki o'sha kun, balki bir, ikki yoki o'n kundan keyin eshitarman hatto. Eh, gapirsa gap ko'p aytganingizdek. Azoblaringiz uchun aybdorman, meni kechiring, ammo siz baxtli ayolsiz. Chunki sizni qadrlovchi qaynonangiz, qaynotangiz, qarindosh-birodarlaringiz bor. Sabringizni birovlar ko'rsa sizga havas bilan qaraydi, men esa iztiroblarini ham yashirishga mahkum ayolman.
Malika_Sayfizoda
