O'XSHAYDI

Jonini elidan ayamas erlar
Karvonni boshlovchi norga o'xshaydi,
O'z qadrini bilmas ba'zi beorlar
Yor-u do'st mehriga zorga o'xshaydi.

Hech kimning ko'nglida armon bo'lmasin,
Nomi el ichinda yomon bo'lmasin,
Maskani yer turib osmon bo'lmasin,
Bundaylar har yerda xorga o'xshaydi.

Bu qanday ko'rgilik: qo'li egrilar,
Yo'sini, yo'rig'i, yo'li egrilar,
Elda e'tiborsiz - dili egrilar
Hali oramizda borga o'xshaydi.

Mard turib nomardga kun chiqqan damlar,
Bitar ish bitmasdan kechikkan damlar.
Tovus tor katakka o'rgangan damlar
Ayni ko'klam yoqqan qorga o'xshaydi.

Chinor o'rnin bosmas terak bilan tol,
Zog'ning sor bo'lishi - qayg'uli bir hol.
Qadimdan qolgan gap: siniq bir sopol
La'l, yoqut yo'q yerda zarga o'xshaydi.

Tenglab bo'larmidi tamalni toshga,
O'n besh kunlik to'lin oyni quyoshga,
Baxting bog'liq bo'lsa bir bag'ritoshga,
Bu olam qurilgan dorga o'xshaydi.

To‘ra Sulaymon