حال الامام الحسين واخيه اباالفضل ع

من عمري ضلت حسبت انفاس
كلشي انتهى وراح اويه عباس
لمن وگع راعي اللوه...مابي طعم حتى الهوه
راح اويه عباس

جبت العمر آنه وأخو...إسمه انعگد بلساني
طبتنه طلعتنه سوه...او واحد يشوف الثاني
ويگلي من تحتاج الي...يحسين بس انخاني
إحتاجيت اله من الوكت...ابعازة أخو خلاني
نيران ضلت بيه تسعر
لمن مشه عني او تأخر
گلبي على الخوه انچوه...مابي طعم حتى الهوه
راح اويه عباس

ابهذا الوقت لمن مشه...ضليت اعيد ايامي
من المدينه الكربله...يمشي الگمر جدامي
والضعن للطف من وصل...بيده يدگ اخيامي
لن صار يوم الفاجعه...الزيد عليه آلامي
كل ساعه اموت ابلا منيه
من ينچتل غالي عليه
عالفرگه واحدهم نوه...مابي طعم حتى الهوه
راح اويه عباس

وبگلبي زادت لوعتي...وكلشي يدور ابالي
ضليت مابين الگمر...ومابين هم اعيالي
مره أعاين للخيم...ومره لخوي الغالي
وتأذه من اسمع طفل...عطشان من اطفالي
وتأخر الكافل علينه
واعيالي كلهه اتنادي وينه
وصار النهار ابلا ضوه...مابي طعم حتى الهوه
راح اويه عباس

لوني انخطف ضهري انحنه...وضاگت الدنيه ابعيني
واهناك لن صوت الگمر...إدركني خويه حسيني
إمنين اجيب الحيل الي...والمصرعه ايوديني
گوه وصلته امن الهظم...لن اسمع ايناديني
يحسين خليني ابحسرتي
خويه استحي من زينب اختي
واعذرني مانرجع سوه...مابي طعم حتى الهوه
راح اويه عباس

ضليت اون ياباالفضل...واعيوني احسهن غيمه
صبت ادموعي اعله الاخو...والدنيه صارت هيمه
عباس قلت حيلتي...وشاب الگلب من ضيمه
والخيمة الكافل رحت...طيحت ذيچ الخيمه
معناهه راح الكله غيره
وگربت مصيبتنه الچبيره
واكتاب الاحلام انطوه...مابي طعم حتى الهوه
راح اويه عباس

ضليت اودع عيلتي...واسچب اوياهه العبره
واطلعت لن صوت ابحزن...لنهه أخيتي الحره
تكشفلي عن صدرك ردت...وصتني امي الزهره
لو شفتي اخوچ ابكربله...وحده ويريد النصره
عني يزينب قبلي صدره
بوسيلي راسه وشمي نحره
هذه جروح القل هوه...مابي طعم حتى الهوه
راح اويه عباس

سيد علي الموسوي