لټوم د روح تسکین ستا په خبرو
جوړوم ځان ته آیین ستا په خبرو

د صدیق د صداقت راز بل څه نه و
که وو څومره صدِّقیْن ستا په خبرو

ستا خبرې چې نه اوري نه یې لولي
د هغو ځای سافلین ستا په خبرو

جبریل ځکه دمَلَکو لوی سالار شو
امین نه و، شو امین ستا په خبرو

ځان یې ځکه لولپه کړ سرو لمبو کې
وو عُشاق او عاشقین ستا په خبرو

دار زندان او په ولچکو نه تم کیږي
محبان او محبین ستا په خبرو

ابوذر لا څه غزل یې کوږ او کیڼ و
شو غزل یې ښه سنګین ستا په خبرو

بلال ابوذر