#مولانا
#مسلم بن عقيل صلوات الله عليه


شال قلبه او بيرغ الاسلام بيده
او شكّ الأمواج التي بدربه شديدة
او مد شراع الرحمة بالكوفة العنيدة
او جان موته امعلك اباركان جيده

ايطش بياضه ابكل شبر
او شايل بروحه نبي
يخجل اكباله النده
الليث هذا الطالبي

فعله ... مهدوي
او زوده ... علوي

سيّد ... هاشمي
ابعزمه ...يرتوي
.
.
نوخ ارجابه ابدرابين الموحشة
جاب ابو طاهر رسالة ابخشب نعشه
او جلجل اعله الكوفة جن طير اعله عشه
خيْر ابو الأكبر على البيبان طشه

يدري بخيوط الغدر
لاجن ابقلبه عزم
يبني لأجيال التجي
سور من دم الزلم

كاصد ... للعلا
او دمه... امحلله
ناذر ... ركبته
ثابت ... بالولا

.
.
سولف القران كله بجُملة وِحْدة
العنده غيره ما يعوف احسين وَحْدة
او شكك ارسايل جذبهم بيد صلدة
هو نور الله لجنها الكوفة رمدة

ابلغ الحُجة بألم
يدري بالموقف صعب
قلبه شاف المحتوى
الناس جايسها رعب

الكوفة ... غدرته
نكرت ... رحمته
هي .. بلا خجل
بدّت ... عشرته
.
.
.
بجفه خطلهم كناطر للسعادة
لاجن العنبر ينط وسط الحمادة
همه وادم عدهم الغدران عادة ناس متعلمة اعله ذل موش اعله اراده

كال كوموا للنصر
احسين كاصدكم تره
الموت ويْ رَكْبه شرف
ربح دنيا او آخره

الرايد ... ينفرح
و قلبه ... ينشرح
يفزع ... للذي
كاصد ... للذبح

.
.
تسجد اكباله الحروف أو ترجي عطفه
صعد فوك الغيم رايه أو راي جفه
كاد ناس اللي بحرها ابعيد جرفه
أو صار مسلم بيرغ الله ابكاع حتفه

نيته من لون الضوه
اوعذب جن ماي النهر
صامد ابوجه الزمن
حيل يشبه للكمر

جنه .. بو الفضل
بشكله .. والفعل
راية ... للفخر
زلمة ... مو سهل
.
.
.
فاضل عباس الخزاعي
https://t.me/fadlkuzay