ياعلي دمعتي مو غاليه
ياعلي بخدي ترضه جاريه
تبجي واتنوح لمصاب ياذخر يابو الشباب
ياعلي
~~~~~~
يمه لو نيتك تجافي لا تجافيني
تدري عكبك يالولد حمره عيني
انت يازهرة سنيني اوكل سنيني
لشوفتك جانت امل تروي حنيني
من يدك بابي الحزن ابكلبي اهات التون
خضرة كاع الوجن من عفتني.
شيبت تدري انه اكبرت ميت سنه من عفتني
~~~~~~~~
ماتجي امك اني او حايره
ماتجي اعيوني ذني امساهره
اسهر او اكتب عتاب ياذخر يابو الشباب
ياعلي
~~~~~~
احسب انجوم السمه وي دمعتي
شحسب اونار الهجر تاكل مهجتي
اوعطب اكليبي بعد بكد حركتي
احترك او اطفي ترى بكل حسرتي
حركتك شيب او دمع واني مكسورة ظلع
او وني دومه منسمع ياغلاتي.
ابتسم واوكع جرح هاي روحي التنذبح ياغلاتي
~~~~~~
بس اهم تبقى روحك سالمه
بس اهم هايه روحي الغانمه
تفرح بيوم الصعاب ياذخر يابوالشباب
ياعلي
~~~~~~~~
يمه فرعون استعد يهجم علينه
او اني وي عمتك بعد شنهو بدينه
هيه تصرخ يابوفاضل وي سكينه
او اني اصيحن ياعلي ماتجينه
صوتي دوى بالطفوف سمعته كل الالوف
واني مابيه اشوف انه اخاف
الشمر يمه وراي يظرب بسوطه كفاي انه اخاف
~~~~~~
من خفت الزمت طرف العباء
من خفت وحشه صارت كربلاء
خوفي كله عالحجاب ياذخر يابوالشباب
ياعلي
~~~~~~~
هايه خيمتنه التضمنه هايه تلهب
بيش اطفيها يروحي اوروحي تنحب
همه حركوها واشوفن ظهري حدب
اركضت اله واجتني يمه زينب
خافت اعليه احترك اوكلبي بالخيمه يدك
اوتالي عنه افترك صعبه اني
الطم او ابجي اوصيح. هبي طفيها يريح صعبه اني
~~~~~~
ماشفت. روحي يمه اتوجرت
ماشفت. بحركه هيه اتشاهدت
كمت اطفي بالتراب. ياذخر يابوالشباب
ياعلي
~~~~~~~~~
عالهزل باجر تشاهد يمه اسيره
اني سبيه اصبحت لا مو اميره
هاذا همي من اشوفه من يجيره
احسين ابوك المنذبح يبجي حيره
بالرمح راسه ارتفع هيبه كدامي طلع
يمه لخواته فزع. ايراوي راسه
مارضه الشامت يشوف خدر الهاشم تطوف ايراوي راسه
~~~~~~~
اني انظر يمه روس اوعاليها
اني انظر اعرفت مو راضيها
سولفت بدم الخضاب. ياذخر يابوالشباب
ياعلي
~~~~~~~~~