صافن والدمع يجري
شسولف والهضم يكثر
كالولي الصحن خالي
كمت وي الحجي اكبر

جبيره ... صدك هلجلمه ع العاشك جبيره
عشيره ... وحيده بلا اهل وبلاعشيره

عذاب ع اليحب يترك حبيبه
ويضل بغربته الحسره نصيبه
تضل بلا حجي الدمعه سجيبه

اليحب يبقه بنحيبه
وجووب لهل مصيبه

................. ......

ضياع وخوف دنيانه
حزن ومرافك اشعاري
زينب صعدت ع التل
هاي الشدهت افكاري

عجيبه ... نحرمنه زيارتج هاي العجيبه
غريبه .... لهسه بغربه ودموعج غريبه

نحرمنه وصارت ادروبج بعيده
عجيبه وصرنه نبجيج بقصيده
رد بيج الزمن صرتي وحيده

الدمع مايكفي همج
اريدن موتي يمج

.........................

الطم مايكفي لمصابج
كون اعليج اهد حيلي
واعيش بغربة احزانج
واخلص بلدمع ليلي

عباره .... كتبت بكلبي انه هاي العباره
زياره .... هيج من الله وتصحلي زياره

واجيج مهدل وطين ع راسي
واتيه كل صحبتي وانسه ناسي
واموت ابابج بحسرة مواسي

واعيش بهل اماني
اموت ابابج اني

.........................

عذاب وغربه كضته
وردت بلغرب عاشت
من بعد السبي والسوك
غريبه بلا اهل ماتت

ماتت ... عمتكم يساده بلغرب ماتت
شافت ... عذاب وضيم من الحادي شافت

عكب ذاك الدلال وكل خيمها
فتر بيها الزمن زود هضمها
وحيده ماتت وزايد المها

الماكو اهله بدفنته
تضل تكبر وحشته

.............. ......

حسرتي الحضرتج تكبر
لو اسمع نعهه الناعي
زينب تمشي وتعثر
تزيد بكلبي اوجاعي

الاميره ... ع ضهر النوك مسبيه الاميره
اسيره .... مشت جم ديره مجتوفه واسيره

مشت وي وادم الماعده غيره
تطلع ديره واطب ع ديره
عكب عباس محنيه وكسيره

مشت وبلايه خوان
والتحديها عدوان



محمد تقي الزاملي

#اللهم_عجل_لوليك_الفرج