الشاعر حسين عبد الزهرة الدراجي

هيه دنيه وكاضيه الخدمه بس الباقيه
هنياله كلمن يبقى بيها

ـــــــــــــــــــــــــــــــــــــــــــــــــــــــــــــ

كوم مد لحسين روحك ويدك
وخوش خادم صير كون يريدك
خلي جفك تلزم اجفوف الحسين
غيره باجر كلي ياهو يفيدك

شد احزام للخدمه وتوسل ببو اليمه
يتقبل خدمتك
تبرد دمعتك بالك بمالك ضحي وعيالك
وسجبها دمعتك

لاتنوح الغيره الكبراك بخيره
والخدمه بالك تنطي بيها

ــــــــــــــــــــــــــــــــــــــــــــــــــــــــــــــــــــــ

حاجي الحسين بكلب بس هايم
كله بيك اشغلني مو بالوادم
ماريد الناس كلها ياحسين
انه اريدن يم حضرتك خادم

حسين اليسوه تتعبله ضحي بكلشي من اجله
وثبتله بولائك
ركز وسمع اشويه هاي الدنيه وقتيه
لاتترك عزائك

المجلس من اتحضره دعوه من الزهرة
وبجي يخادم وي بجيها

ــــــــــــــــــــــــــــــــــــــــــــــــــــــــــــــــــــــ

اثبت واحـــــــــــذر تغير دربك
الدمعه مــــــن تنزل تطهر كلبك
لا تحب اي بشر حب بس الحسين
حسين بس اليسوه صدك حبك

هيم بحب ابو الاكبر شانك كل وكت يكبر
والله يعلي هامك
عوفه الشهره والوادم خلك اقل من خادم
يم حسين امامك

صفي نيت كلبك مايضيع تعبك
لا قسم بالفكدت وليها

ــــــــــــــــــــــــــــــــــــــــــــــــــــــــــــــــــــــ

بـــــــــــالك ادور يــــخادم شهره
احلى شي من تخدم على الفطره
وقره مو للناس بس الأم الحسين
وبجي وياها على ضيم الحره

فكر كون ترضيها الماكفت بواجيها
مولاتي الزجيه
هاي ام خيمه محتركه الطم وصرخ بحركه
ويلاه يالسبيه

احضر بكل مئتم وللبواجي اتحزم
والدمعه بالروح اشتريها

ــــــــــــــــــــــــــــــــــــــــــــــــــــــــــــــــــــــ

نسئل الله يديم هاي النعمه
والله ليفاركنه وي الخدمه
نعوف كلشي ومانعوفك ياحسين
انت ابونه الكلبه ينكط رحمه

خيرك فايض علينه شكرا يابو سكينه
شكرا ياولينه

لاتحرمنه من عدك احسبنه سيدي ولدك
يالروحك حنينه


حسين يمدللنه احنه بيك أمنه
وكلوبنه عينك عليها

ــــــــــــــــــــــــــــــــــــــــــــــــــــــــــــــــــــــ


حسين عبد الزهرة الدراجي

الليالي الطف يكلبي ضالمني
وماتنــــطك أخيتي ضالمني
شويه مـــن الحوافر ضالمني
يلمهن علي بوكت الدفن ليه

حسين عبد الزهرة الدراجي

رجف حسره وتكطع مالبتنه
دعينه الناس للطف مالبتنه
التراجي البيد خولي مالبتنه
السلبهن يوم عاشر من رقيه



حسين عبد الزهرة الدراجي

صوت السمه يافاطمه

ــــــــــــــــــــــــــــــــــــــــــــــــــــــــــــــــــــــ

يافاطــــــــــمه جبريل ناده وينحب
فكــــــــدج عله الكرار كلش يصعب
كسر الضــــــــلع كاسر علي يازهراء
ودمعاته عل وجنات من دم تنصب

علي بفــــــــــــــراكج يون
وياكل بــــــــروحه الحزن
اشتاك لج يـــــــم الحسن
كسر ضـــــــــــهره غيابج

ودمعه دمه يافاطمه

ــــــــــــــــــــــــــــــــــــــــــــــــــــــــــــــــــــــ

اعظم جــــــــرح عد علي هوه اغيابج
من يختنك يـــــــــــركض يشم اثيابج
بابج اثـــــــــــــــر يالزهرة اذه الكرار
مطـــــــــبوع باقي لهسه دم اصوابج


علي شـــــــــــما شاف الأثر
ايده تــــــــــركض عل ضهر
اليـــــــــــــــكسر ليله انكسر
يـــــــــــــــاهضـــــمة حيدر

وشوفه عمه يافاطمه

ــــــــــــــــــــــــــــــــــــــــــــــــــــــــــــــــــــــ

بعدج علي موزين كلش وضعه
مو انتي جن هوه التهشم ضلعه
ليله يمشي الكبرج وبجي الحيد
مو مي ورد كبرج يرشه بدمعه

علي ابــــــــــو كلب السمح
دمعه يـــــــــم لحدج يسح
راجـــــــــــــــع البيته جرح
وكـــــــــــــــوه ينكل جدمه

حامي الحمه يافاطمه

ــــــــــــــــــــــــــــــــــــــــــــــــــــــــــــــــــــــ

مو سهله كلش فـــــــــركتج يالزهرة
حيدر علي بفــــــــــركاج لازم ضهره
من رحتي ولحد هسه حيدر مهضوم
ومثل الــــرماح الهوه يفوت بصدره

حكه مــــــــن دمعه يهلي
علي بعــــــــــدج مو علي
ردي يـــــــــــــــازهره لي
حيدر يــــــــــناديــــــــلج

ياعالمه يافاطمه

ــــــــــــــــــــــــــــــــــــــــــــــــــــــــــــــــــــــ

باليل فــــــــــــزت زينبج وتريدج
يالمــــــــــــاضن ليها زمنها يعيدج
انتي الحنينه الخيرج مشبع الطير
وكل طير ياكل منج يبوس ايدج


انتي نعــــــــمه عله النعم
وسيدتت كـــــــــل الخدم
حسين نقســـــــملج قسم
خـــــــــــــــدمته منعوفها

الكل تخدمه يافاطمه

ــــــــــــــــــــــــــــــــــــــــــــــــــــــــــــــــــــــ

حسين عبد الزهرة الدراجي

زهراء اغيثيني زهراء اغيثيني
ــــــــــــــــــــــــــــــــــــــــــــــــــــــــــــــــــــــ

الحضرتج مـــــــــــــــديت اديه فاطمه رايد رحمتج
انحرم من كلشي قابل عندي اهم شي انه بخدمتج
تسوه عندي الدنيه كلها مـــــــــــن احصلها نضرتج
الله لا يحرمني ادعي مـــــــن دمعتي ومن محبتج

يالكلبج حنين وطيب اهواي
عليج الماشرب ماي
منج نضره رايد
وجويني بجمر من نار الخيام
وبحركه ابجي عل شام
موش ابكلب بارد

ــــــــــــــــــــــــــــــــــــــــــــــــــــــــــــــــــــــ

بيش اوصفلج يزهره الحضرتج عشكي وهيامي
مـــــــــن خدمتج يالزجيه انرفع صيتي ومقامي
فاطمه يامحله اسمج اسمج انتي احله الاسامي
بكلشي ما اهتم تره انه بخدمتج بس اهتمامي

مهتم بعزائج مو ابدنياي
ومنيتي انه بس هاي
كبرج كون ازوره

بيج الكلب يامولاتي مفتون
ولج بثنين العيون
راسم احله صوره

ــــــــــــــــــــــــــــــــــــــــــــــــــــــــــــــــــــــ

الدنيه خنكتني بحزنها وماكو غيرج امشي ليها
انتي باب الباري بــــــــــــابج مايخيب اليعتنيها
روحي غركانه بـــــذنبها فدوه مدي ايدج عليها
مـــــــروتج عينج عليه روحي تعبت من بجيها

اسنتكف الغيرج ايدي امدها
وانتي الماتردها
لج لو مدها ايدي

يالزهرة امشي عليج الحسين
زيدي بدمعة العين
وحركتي عليج زيدي

ــــــــــــــــــــــــــــــــــــــــــــــــــــــــــــــــــــــ

ابمغريات الــــــــدنيه لاهي الدنيه غرتني بهواها
وعصبت عيني وخذتني ومشي كمت ابمشتهاها
فدوه غيثيني دخيلج روحي ضن الموت اجاها
باجر اتحضــــريني اريدج عليج المضيعه ضناها

باجر انتي التحضريني بالموت
ولمن يعتلي الصوت
اتحضرين ليه
باجي على حسين ولاطم عليه
وانه ابروحي افديه
يالزهرة الزجيه

ــــــــــــــــــــــــــــــــــــــــــــــــــــــــــــــــــــــ

حسين عبد الزهرة الدراجي

يافاطمه انه علي يافاطمه انه علي

ــــــــــــــــــــــــــــــــــــــــــــــــــــــــــــــــــــــ

حركو كلبي الحــــــــــركو بابج
بضلوعي اتشب نـــــار اصوابج
يابعد اليعمن مــــــــــن دونج
الموت أهــــــــــون من اغيابج


المتعود يــــــــــوميه يشوفج
مايكدر لــــــــــو لحضه يعوفج
حيدر ميت نبــــــــــضه بفكدج
ويحيه مـــــن يلمسنه اجفوفج

من بعدج ماتت ضحكتي
من بعدج كبرت حسرتي
من بعدج عاشت دمعتي


يافاطمه انه علي يافاطمه انه علي

ــــــــــــــــــــــــــــــــــــــــــــــــــــــــــــــــــــــ

انه المـــــــحد يكـــــــــدر حيلي
وهسه ابني حسين يتــــــجيلي
بــــــــاوع حـــالي حسين ودنك
ويصـــــــبر بيه ويبــــــــــجيلي


كبالته وكتــــــــله انــــــــه بعبره
كسرو ضـــــــلع امـــــك بالعصره
جنت مـــــــــن ادخل بيتي ادنك
وتخــــــفي عليه آثــــــار السطره

انهد حيلي مـــــن باوعتها
انهد حيلي تبـــجي شفتها
انهد حيلي السطره لمتها


يافاطمه انه علي يافاطمه انه علي

ــــــــــــــــــــــــــــــــــــــــــــــــــــــــــــــــــــــ

نعشج مــــــن شلته عله امتوني
ماسكــــــــــتن يالزهرة عيوني
مايـــــــدرون اشــــــــصاير بيه
مـــــــــن ابجي الناس يلوموني

من كبرج حــــــــــد عتبة بيتي
بين شــــــــــيبي بنص الحيتي
وثكـــــلت روحي وميت حيلي
ونكــــــــــعت بالمدمع جفيتي

يازهراء مـــــحد يعوضج
يازهراء موش انه نبضج
يازهراء مـــــوتني بعدج


يافاطمه انه علي يافاطمه انه علي

ــــــــــــــــــــــــــــــــــــــــــــــــــــــــــــــــــــــ

انه الماصح طـــــــــب الصوابه
انه الميــــــــضم حـــــــزنه انكابه
انه الســـــــطرو خـــــــد ام بيته
وياحيف انـــــــه الدفـــــــعو بابه

صارت غصه بصدري من احجي
وكاعد وحـــــــدي بيتي وابجي
ماتت زهــــــــــرت روحي اليله
ياهو اليسمعني مـــن رد اشجي

ياروحي عيشي المصيبه
ياروحي بعد الحـــــبيبه
ياروحي صــرتي غريبه

يافاطمه انه علي يافاطمه انه علي

ــــــــــــــــــــــــــــــــــــــــــــــــــــــــــــــــــــــ

حسين عبد الزهرة الدراجي

مو حلو الوداع بهل مسيه **ياحامي الحميه
نعشك هاذه لو نعش الزجيه
ــــــــــــــــــــــــــــــــــــــــــــــــــــــــــــــــــــــ

علي اليله يودع فاطمه الزهرة ** بدموعه الجريه
صعب يتعافه لو يلتم بعد كسره **بفراك الزجيه
اول تالي حيدر منحني ضهره ** والونه خفيه

خل اتصب دمعته ماترجع زهرته
دفن روحه علي حدر الوطيه

ــــــــــــــــــــــــــــــــــــــــــــــــــــــــــــــــــــــ

حمل نعش الحبيبه وصبن ادموعه ** وكاتلته هضمته
علي مثل الزجيه مكسره ضلوعه ** وشيطيب كسرته
هضيمه يون علي وناته مسموعه ** من ودع زهرته

علي اتمنه مماته وي زهرت حياته
دفنته ودفنة الزهرة سويه

ــــــــــــــــــــــــــــــــــــــــــــــــــــــــــــــــــــــ

رجع من الدفن بس راجع اجنازه** دافن بيده روحه
شني ضلته بحياته اليفكد اعزازه** والله يكتله نوحه
اليجازي بخير ليش بجرح يتجازه **ويكثرن جروحه

حيدر ينعه روحه ويامكثر جروحه
ودمعته بفكد فاطمته جريه

ــــــــــــــــــــــــــــــــــــــــــــــــــــــــــــــــــــــ

علي الزينب رجع بس من رجع كبران *بأن بوجها شيبه
وصل البنيته بس من الهضم ذبلان * ياعظم المصيبه
بجه ودنك علي ودمعه يصب نهران **الفراك الحبيبه

مهضوم ويكابر وجرحه بطوله صاير
يزينب راحت الزهرة من اديه

ــــــــــــــــــــــــــــــــــــــــــــــــــــــــــــــــــــــ

يزينب ماتت امج صبي المدمع ** راحت من ادينه
اليضمه اتراب بويه بيادمع يرجع**ايسي ماتجينه
يبويه الروح احس من الجسد تطلع *منذكرها الحنينه


الروحي شكد تودها موتني بعدها
الفكدها كلبي نيران سريه

ــــــــــــــــــــــــــــــــــــــــــــــــــــــــــــــــــــــ

حسين عبد الزهرة الدراجي

يابو عبدالله يابو عبدالله

ــــــــــــــــــــــــــــــــــــــــــــــــــــــــــــــــــــــ

جيت يمك روحي متـــروسه ذنوب
وتوبة الحــــــر على بابك ارد اتوب
حسين اذا تطردني من بابك اضيع
ياهو غيرك انـــــــــت ستار العيوب

انــــــــت ساترني بعباتك
يالمضـــــــــــحيلي بناتك بيش اجازيك

بابك ادعــــي بكلب نادم
حسين بس اقبلني خادم ارد اواسيك

انطيني بس نية حبيب
ارد اخــــدمك يالغريب
وانعه للشيب الخضيب

يابو عبدالله يابو عبدالله
ــــــــــــــــــــــــــــــــــــــــــــــــــــــــــــــــــــــ

تلچمني اريد بسهم من اسهامك
احسبني ماي وطفي بيه خيامك
لا تخلي الدنيه تاخذني بعيد
خذني ارد اخدم ضعن ايتامك

بكيفك انه امشي يمولاي
انه من هاي ايدك الهاي ياجبيري

كلبي بمحــــبتك كسيته
وكله من جيسك خذيته هاذه خيري

ها انا عبداً مطــــيع
احسبني خادم للرضيع
انه لو مــــا انت اضيع

يابو عبدالله يابو عبدالله
ــــــــــــــــــــــــــــــــــــــــــــــــــــــــــــــــــــــ

انطيني دمعه ارد ابجي وي الطاهره
الركضت مــــــــن الخيمه للتل حايره
مادلك ايـــــــــــدي وصيحلك دخيل
روحي بشـــــــــجم ذنب جتك عاثره

شارد مـــــن اذنوبي اجيتك
نادم اتعـــــــــــــــنيت بيتك لاتردني

من الذنب جيت استجيرك
ارحـــــــــم الماعنده غيرك لا تردني


هنا يالمترس اجروح
الغير بابك ما اروح
عليك بس رايد انوح

يابو عبدالله يابو عبدالله
ــــــــــــــــــــــــــــــــــــــــــــــــــــــــــــــــــــــ


انه غلـــــــــــــــطان اعتذرلك نادم
الدنيه لهـــــــــــتني ولهتني الوادم
رحت عــــــن دربك يبو الاكبر بعيد
وانت كاتبني بســـــــــــجلك خادم

الدنيه موسم وانت عارف
وانه منها اهواي خايف باجر اخسر

الماحصد دمعه بعزائك
ماتشمله انت بدعائك يابو الاكبر

خذني مشيني برامك
وحيل ذوبني بغرامك
وكلبي جويه بخيامك

يابو عبدالله يابو عبدالله
ــــــــــــــــــــــــــــــــــــــــــــــــــــــــــــــــــــــ

حسين عبد الزهرة الدراجي

الزهرة تشــــــكر من اجه أواساها
شكرآ مــــــــــن الزهرة يامحلاها

ــــــــــــــــــــــــــــــــــــــــــــــــــــــــــــــــــــــ

فاطمه باب الله خـــن دك بابها
ومنها خل نطلب دمع لمصابها
بينه مــو بيها انتمنه اصوابها
انطيح كلنه ومايطيح احجابها


فاطمه ايــــــــــة عشك نقراها
شكرآ مــــــــــن الزهرة يامحلاها

ــــــــــــــــــــــــــــــــــــــــــــــــــــــــــــــــــــــ

كل صلاه خدمتها واجب فاطمه
الدمعه الها اطفي نار الحاطمه
المابجه عليها عسن عينه بعمه
كون اسمها عله الكلوب انوشمه

والله ينــــــــسانه اذا نـــــــنساها
شكرآ مــــــــــن الزهرة يامحلاها

ــــــــــــــــــــــــــــــــــــــــــــــــــــــــــــــــــــــ

فاطمه هيه الصـراط المستقيم
وهيه بسم الله الـرحمن الرحيم
حبك الها يقـــــربك الرب الكريم
الله جاعل بيها سر كلش عظيم

وباب للرحــــــــــمه العــلي خلاها
شكرآ مــــــــــن الزهرة يامحلاها

ــــــــــــــــــــــــــــــــــــــــــــــــــــــــــــــــــــــ


الله من فاضــــــــل الطين اختارها
الوحي جــــان يبوس عتبت دارها
اهل السمه اتحب فاطمه واخبارها
يالاهي اجعــــــــــلنا من انصارها

وبالحشر تحـــــــشرنه كون وياها
شكرآ مــــــــــن الزهرة يامحلاها

ــــــــــــــــــــــــــــــــــــــــــــــــــــــــــــــــــــــ

امرأه مـــــــــن نور سواها العلي
ومالكه كفو لها بـــس حيدر علي
وحيدر يصـــيحلها يازهرت هلي
راحت وخلت دمـــع عينه يهلي

بليل دامــــــــــس للكــــبر وداها
شكرآ مــــــــــن الزهرة يامحلاها

ــــــــــــــــــــــــــــــــــــــــــــــــــــــــــــــــــــــ

حسين عبد الزهرة الدراجي

خلقني الله على مودك يبن داحي الباب
حياتي بلا لطم مــــــــاتسوه صم تراب

ــــــــــــــــــــــــــــــــــــــــــــــــــــــــــــــــــــــ

خلقني الله انـــــــــــــوح عليك يامذبوح
يمــــــــجروح وعزائك دوه الكل مجروح
ريـــــــــد ابجي عليك لحد طلاع الروح

يمن جــــــــــرحك بكلبي لايبس لاطاب
حياتي بلا لطم مــــــــاتسوه صم تراب

ــــــــــــــــــــــــــــــــــــــــــــــــــــــــــــــــــــــ

جبت عمري بخــــــدمتك وبجي المصابك
ومثل وكــــــفت عبد واكـــــــف انا ابابك
خلــــــــــقني الله لـــــــــك يمسلبه اثيابك

انوحك كل وكــــت وبجي بدمع سجاب
حياتي بلا لطم مــــــــاتسوه صم تراب

ــــــــــــــــــــــــــــــــــــــــــــــــــــــــــــــــــــــ

فضل منك جبتني المـــــــــــــــنبرك أقره
وصرتلك خـــــــادم وصار اسمي اشكبره
لجن عندي لهم هـــــــــــــوه رضه الزهره

لقب جــــــــــادم الزهرة حله كل القاب
حياتي بلا لطم مــــــــاتسوه صم تراب

ــــــــــــــــــــــــــــــــــــــــــــــــــــــــــــــــــــــ

خـــــــــادم هـــــــل اسم كلش يشرفني
انا لو ماخــــــــدمتك ياهـــــــــو يعرفني
بحـــــــــــــبل حبك يغالي اجتاف جتفي

خدمتك واجبه وماتنـــــــعد اسحتباب
حياتي بلا لطم مــــــــاتسوه صم تراب

ــــــــــــــــــــــــــــــــــــــــــــــــــــــــــــــــــــــ

هنيا امـــــــي كــــــالتلي بكـــــــــلب هايم
لئن يحسين لــــــــــك انه اصبحت خادم
عليك بكـــــــــل عـــــــــــزه ياسيدي لاطم

احروف اسمك اشمها ويل نسيم الهاب
حياتي بلا لطم مــــــــاتسوه صم تراب

ــــــــــــــــــــــــــــــــــــــــــــــــــــــــــــــــــــــ

بكاروكي ومشه اسمك تره بمجره للدم
ودعتلي امـــــــــــــــي اصير بحبك متيم
بيك اهتم بغـــــــــــــــيرك والله ماهتم

وفرفح لــــــــون طاريك اكبالي انجاب
حياتي بلا لطم مــــــــاتسوه صم تراب

ــــــــــــــــــــــــــــــــــــــــــــــــــــــــــــــــــــــ

الف شكرا اكلك مـــــــــــن كلب والسان
جبتني لهل خدامه وصرت خوش انسان
مو دم هــــــــــاذه حبك يجري بالشريان

ياول ماوعيت الكـــــــــــلب بسمك ذاب
حياتي بلا لطم مــــــــاتسوه صم تراب

ــــــــــــــــــــــــــــــــــــــــــــــــــــــــــــــــــــــ


حسين عبد الزهرة الدراجي