شغلات بتزعجك . . ! 💙. .
مشكلتي الحقيقية إنو الناس يلي راحوا ، ما بهموني ع قد ما بهمني ثقتن الفظيعة وقت بيرجعوا بعد ما سمعوا صوت أحلامنا وهيي عم توقع من سابع سما ع روسنا
مين قال إنو نحن ممكن نكبر عالحب؛طول ما فيك نفس فيك تحب لو وصلت لعمر ال 100 وأكتر
من الشغلات يلي بتسببلي وجع راس إنو نحن منمتنع عن الصدقة لمجرد إنو المتسولين كذابين ؛طيب دور ع يلي مو كذاب واتصدق ؛ حياة الواحد بتنقلب بعد أي قرش بيطلع
يعني أكتر شي مستفز بالعالم ؛ مكان بتعرف مو إلك
ليش واقف فيه . . !
بيزعجني إنو كل ما الواحد يفهم الدنيا ، بينزل ابديت جديد ، كل 24 ساعة بتشطبلك ذكرى ، شعور ، فكرة ، وبدك تتعود ورجلك فوق رقبتك
الناس يلي بيغفروا وبسامحوا بلا مقابل ع قد مو حلوين ع قد ما بحسسوك بالعجز ، إنو شبكن . . !
إنو نحن كبشر منضيع أحلى مشاعر ولحظات مع ناس منعرف إنن غلط ؛ وواثقين إنو رح نخسر معن ومع هيك منكفي
في ناس بتحب هيك بلا سبب ؛ ليش بدك سبب . . !
ليش مو واثق إنك بتنحب . . !!
لما كنت صغير وتحديداً وقت بابا كان يقطعني الشارع ، كنت امسك ايدو لوقت قصير وبعدها اتركها بلا مبالاة، وكان يشد عليها اكتر ؛ كبرت وانا بفلت ايدي بلامبالاة بأي علاقة ، مشان شوف الطرف التاني رح يمسكني ولا لأ ، الفكرة إنو ولا مرة مسكوا إيدي ولا مرة 💔
حدا مبسوط ؛ليش بتحبطوه . .
في شي مزعج أكتر من هيك . . !
مزعج فصل التخرج بيعمل انفصام عند الشخص ، مابيعرف هو قرفان ولا بدو يشد حالو ، ولا بدو يشتاق ولا بدو يبزق ع هيك تجربة ، الواحد بحس حالو صار غريب فجأة ، شي بيشبه انك تغمس بوشار بقطر
مو كل الناس بتعرف تحكي نكت
بس الكل بنكت وأنت لازم تضحك . . 🙇♀💙
