Oybek Kodirov

Kitobni juda sekin o‘qiyman

Bir necha oy avval Hikmat aka Abdurahmonov bilan uchrashuv bo‘lib o‘tdi. Suhbat yakunida Hikmat akaga savol berib, fikrlarini bilib oldim:

Men:
– Hozirda marketologlarning asosiy muammosi nima deb o‘ylaysiz?

Hikmat aka:
– Raqamlar bilan ishlamaslik.

Keyin esa Hikmat aka menga “Muvaffaqiyatli insonlarning 7 ko‘nikmasi” kitobini hadya qildilar. O‘sha kitobni bugun o‘qib tugatdim.

Kitobni juda sekin o‘qiyman. Biror ta’sirli jumlaga duch kelsam, o‘sha jumla ustida o‘ylanib o‘tiraveraman.

Kitobni bir gap bilan ta’rifla, deyishsa: “Mevaning bemazaligi tufayli daraxt shoxlarini ayblab yurganimni, aslida uning ildizida nima muammo ekanligiga e’tibor berishim kerakligini tushunib yetdim” deb javob berardim.

@kodirov_oybek

Bugun yana bir yoshga ulg‘aydim.

Ba’zan juda tez yashab yubormayapmanmi, deb xavotir olib qolaman.

6 yildan beri tug‘ilgan kunimni bayram o‘laroq qarshilamay qo‘yganman. Avvalgilarida ishda edim, bugungisida ham ishdaman.

Lekin, qachon shuncha yashashga ulgurdim, deb o‘ylanib qoldim.

Har birimiz o‘zimizga berishimiz kerak bo‘lgan savol:

Qachon shuncha yil yashashga ulgurdim?

(Suratda meni dunyoga kelishimga sababchi bo‘lgan insonlar – ota-onam)

@kodirov_oybek

Agar bu xabarni o‘qiyotgan bo‘lsangiz, demak mening “Ildiz (Azon) kitoblari”dagi safarim yakuniga yetgan bo‘ladi.

2023-yil, iyun. Kitob do‘konida ilk marta SMM menejer bo‘lib ish boshladim. Kamina juda zo‘r kitobxonman deya olmasdim, ammo kitoblarga bo‘lgan muhabbat meni shu manzil tomon boshladi.

Do‘konning fayzi o‘zgacha, ilm shunday nur ekanki, nafaqat o‘qilganda, balki tokchaga qo‘yilganda ham o‘zidan nur taratib turaverar ekan. Ana o‘sha onda aslida kitob emas, baxt ulashayotganimizni his qilganman.

Kitobxonlik naqadar go‘zal xislat! Kitobxon bilan qurilgan suhbatlar ham manfaatdan holi bo‘lolmaydi. Kitobxonning qalbi tirik, u, aslida taqdirlarni mutolaa qilayotgan insondir.

Do‘konda yana samimiy, halim xulq egalari – kitobchi xodimlar bilan tanishdim. Ulardan shu qadar ko‘p narsa o‘rgandimki, ba’zilarini bilishadi, ba‘zilarini o‘zlari bilishmaydi.

Kutubxona ahlini allaqachon sevimli jamoa o‘laroq umr daftarimga qayd etib bo‘lganman. Birgalikda o‘sdik, birgalikda kuldik, ba’zan birga yig‘ladik…

Sevimli jamoam bilan kitobxonlik targ‘ibotiga bel bog‘lab, ko‘p qadamlar, yangiliklar qildik. Barchasida yelkama yelka turishdi, yordamlarini ayashmadi. Xato qilsam, o‘zlarining xatolaridek munosabatda bo‘lishdi, yaxshi ish qilsam, o‘zlarining yutuqlaridek sevinishdi. Mening yog‘imda, nomimni himoya qilib, o‘zlari sinovga uchragan kunlari ham bo‘ldi.

Tez orada kitobxonlik bozoriga o‘zgacha yondashuv ham qurib oldik. 250 dan ortiq video kontentlar tayyorlab, kitobxonlar e’tiboriga havola qildik. Ish jarayonida nimaiki muvaffaqiyatga erishgan bo‘lsak, mana shu jamoaning beminnat xizmati, qo‘llab-quvvatlovi sabab bo‘ldi. Alloh taolo meni ular bilan Firdavsul a’loda ham jam qilsin!

Do‘konimiz deyarli yopilishga yaqin bo‘lganda, jamoa rahbarining sa’y-harakatlari tufayli kichik ilmxonamiz xanuzgacha faoliyatda bardavom bo‘lib turibdi. O‘z qo‘llarim bilan “Azon” nomini olib tashlaganlarim kechagidek yodimda. Do‘konimiz nomi ham o‘zgardi, biroq maqsadimiz o‘sha-o‘sha qoldi. Ha, men ham xalqqa manfaati bor ishdan, ham jamoadan, ham rahbardan omadi chopgan biri bo‘ldim.

Bu maskan meni bir yildan ko‘proq muddat bag‘riga oldi, sig‘dirdi. Shuni o‘zi ham menga e’tirof, men uchun faxr. Taom sizga yoqmasa, ikkinchi luqmasi haqida qayg‘urib qolasiz, kishi. Buni qarangki, baxtli insonlarda biriman chog‘i, Ildiz’da kunlarni haftalarga, haftalarni oylarga ulab jamoam bilan birga ish ustida bo‘ldim.

Ildiz’da balki moddiy tomondan millionerlar yo‘qdir, lekin savoblari, ma’naviy boyligi tomondan millioner bo‘lganlar borligiga aminman.

So‘z ayni shu o‘ringa kelganda sevimli jamoam deymi yo oilam deymi, ikkilanib qoldim.

Mayli, qadrdon maskan bo‘lmish kitob do‘konim! Sen bilan vidolashish naqadar og‘ir! Sen bilan bo‘lgan safarim xotimasi bugun ekan, nachora…

Xotiralarim yodimda qoldi, “Azon”im qalbimda qoldi!

Alvido, munavvar maskanim, ilmxonam, “Ildiz”im…

Shunaqa mutaxassis bo‘lish kerak-ki, yangi davraga kirganingizda hech kim ismingiz nima deb so‘ramasin.

Tugamadi

@kodirov_oybek