منين اجيبلي كلب حتى للخيمه اطب
كلبي ماينطيني اطبن ليه
من كفه الخيمه اطيح بيه
_____________________
من اجيت من النهر ايدي جانت عالضهر
الخيمه اذا راعيه طاح اتطيح لازم
لكلبي طاح بطيحته شلون اطيح خيمته
واكفه تظل صعبه والعباس نايم

اشكد بجيت وحاولت ماطيحته
بعيني حتى الخيمه متغيره شفته
غمضت وتخيلت *بيهه ابوفاضل كلت
وفتشت عيني خليه وعاتبته

ماندل دربي كمت بطيحته ماصدكت
مو حجايه الفركه حتى احجيه
_____________________

وزينب اتصدلي بوجع تكلي اخيك ما رجع
واني يم الخيمه واكف صعبه هيه
ارد اطيحه واون اتخيله بيهه واحن
كاض طرف الخيمه ماتنطيني اديه

لطمت على الراس زينب من اجتني
فاكد العباس من ظهري عرفتني
تغيرت وتحيرت*اتصيح ياخويه وبجت
طاحن ادموعي واخيتي كابلتني

بين اعليه التعب اتصيح صيواني انهب
طاحت الرايه وكع راعيه
×××××××××××××××××××××
مره اغمض مره اصد بالخيم ذابل ورد
كله عطشانه على شوفت ابوفاضل
كلب الزغار انخمش ثاري انواع العطش
تعطش لشوفت ملامح بشر شايل

فركة العباس مدري منين اجتني
اكثر من الماي والله عطشتني
بالعطش مافكرت*طاح عباس عطشت
نشف ريجي والمدامع بللتني

كلبي احسنه انمرد شكد حجي بيه بعد
الدمعه عاليستاهل اني ابجيهه
×××××××××××××××××××××
سكنه متأكده الكمر يرجع وتنطر خبر
تحجي بالخيمه وتكول اسمعه قادم
والله تعبتي الفكد شلون اكله مايرد
واكفه متانيته لسه وهوه نايم

شلون اظمن فركته مبينه عليه
عالنهر وياه اموتن لوبديه
صدكت ماصدكت *لجن بعيوني شفت
طايح العباس وجفوفه رميه

شفت جفه على العلم *وعينه تارسه السهم
عيني المفروض يمه اعميه
_____________________
حكه كلبي يحترك طايح احزامي الصدك
أبيش اشدن ظهري والعباس طايح
كلبي طعنات انترس سيف احسنه النفس
والهظم يفتر ابروحي جاي رايح

هاي اول مره اظلن اصفج ايدي
كطعت عليه الهوه كطعت عضيدي
محترك من صدك *كلبي بالكوه يدك
كما احسن دمي مايمشي بوريدي

كسرتي صعبه شكثر والشماته بكل كتر
كمت حتى الخطوه كوه امشيه
_____________________
ليث البديري