ياحبيبي قبل اعرف الحب كله من طويله
‏ياملاذي من بعد رب البشر جل جلاله

‏والوحيد اللي ماعندي شيٍ يضاهي جميله
‏كون مضمون الكلام اللي بقوله فالرساله

‏العلاقه بيني وبينك لقبها المستحيله
‏لانها اكبر من مجال التضحيه ومن الجماله

خوةٍ ماهو يغيّرها بسوس ولا جليله
يتفادى نقصها الرجال ويوصي عياله

لا تضيق من الكلام اللي بقوله كل ليله
النصيحه كنها نور الهدا .. عقب الضلاله

لا يغر ابليس تفكيرك ويشفي بك غليله
ودي بموتك ولا يشوفك تخدمه في مجاله

اللي مثلك فارقٍ في جيله وفي غير جيله
ينحنج به .. لا يسلم له كتابه في شماله

كيف اشوف النار تحرق جثتك بأهون وسيله
و انا احنّك من حريق الشاهي اللي فالبياله

اعتبرني فوق الأرض لا غدى فالوقت ميله
واحدٍ يرخص لك رقبته ..قبل حاله وماله

والنهايه كل من يزرع بيجني من حصيله
والله ألطف بالعباد .. وكلٍ يحاسب لحاله

- صالح النشيرا