ثامـن الأكـوان 🌍

لسان حال الامام السجاد ع


الدهـر بحشـاي حـَط سـنّـه ونابـه
وجمـر حزنــه انوجـد بيّــه ونا به
نوبـه اذكـر ذبـح مصحــف ونابـه
أذكـــر كعـبـــة الـبـــاري الـسبـيّـــه


مثيل جبار
٢٥ محرم ١٤٤٠ هـ

مريـمُ العـذراءُ هـَزَّت جـذعَ نخــلٍ فسَـلَك
في فضـا الإعـجازِ حتى رَطَـباً حُلواً مَـلَك
وَحُـسَـيـــنٌ مَـهـــدُهُ هَــزَّتـْـــهُ أُمٌّ و مَـــلَك
لو بِجِـذعٍ لَـهَـــوَت بالمهــدِ أجـرامُ الفَــلَك
.....

مثيـل جبـار

ليت السماء انطبقت على الأرض وليت الجبال تدكدكت لقتلك 💔

وداع.. وداع.. ليلة مناحه ودمعه بعيوني
وداع.. وداع.. ريت انحفر گبري ويدفنوني
-----------------------------------
ليلــة اهـات ودمــع بالـغــاضريــه
من بعد هالليله راح امشي سبيــه
ريت عمـري يخلص بهـاي المسيـه
ولا أصد باجر تسحگك خيل اميه
خيول.. تسحگ عليك وينخطف لوني
وداع.. ليلة منـاحه ودمعــه بعـيــوني
-----------------------------------
باجـر بطيـحة كفيـلي اجفـوفي تهــوه
و علـه خاصـرتك يمنتــك علــه الخوّه
باجــر بنــار الخـيم جـدمي ايتــچــوه
وسوط ابن جوشن عله متوني ايتلوه
سياط.. تترك أثرهه وتكسر امتوني
وداع.. ليـلة مناحه ودمعه بعيـوني
-----------------------------------
ويـلي لو أسفَــر صَبــاحي للنـوايـب
أنظـر بيـا عيـن خسـفة گمــر غـالـب
وعالأسل روس الهواشم چلـ كواكب
والجســوم امعفّــره فـوگ التــرايب
جسوم.. لو اشم نحركم والله خيعـوني
وداع.. ليــلة مناحــه ودمعـــه بعيـوني
-----------------------------------
ويـلي باجر لو شفـت صدرك تهِشَّـم
ينفطر جبدي ويفيض بعيني زمـزم
اتضج مَلائِكْة السمه و ينّصب مأتَم
ع اليصـلّي بمذبـحه ابعاشـر مُحـرَّم
و صفوف.. يا مهجتي بذبحك يذبحوني
وداع.. ليــلـة منــاحه ودمعــه بعيــوني
-----------------------------------
إلسمــه ترتـج او يتـكـــدر نجـمهــه
و هالـرزيّــه لمهــجتي تسـجّر ألمهه
تهيـم أيـتام ابـ بــراري و مـن يلمهه
امن الفَزَع مذهوله تطلع من خيمهه
دموع.. تحفر وَجِنتي وتجرح اجفوني
وداع.. ليلـة مناحـه ودمعــه بعيــوني
-----------------------------------
تنهــدم دور الـــرساله مــن حزنـهــه
عَلَه اجسام امن الترب والدم چفنهه
تنفطــر مهجـة رقــيه ويعلــه ونــهه
والسلـب خاتمـك يسلـب قرط اذنهه
عجيب.. بنت النبي وللشام يِسبُوني !
وداع.. ليلــة مناحـه ودمعـه بعيــوني
-----------------------------------


مثيل جبار
٩ /٩ /٢٠١٩

 " الـــــــمـَـهـــــدي 💔 "


بكل ليله من شهر الدمع
چـفه بـجبيـنه يـنطـبــع
خلّــص حياتـه منفجــع
    الـــــــمـَـهـــــدي..
-------------------------------
من نسل صفوة محمد حجة الله المهدي إسمه
البـاري خصّـه بهـالكـرامه راده يـثأر لبــو اليمّـه
من يحل شهر المحـرّم عَله راسه الچف يلُطمه
يذكـر الصـار اعلـه جـده ويا أرض تگـدر تلمّـــه
بعيونه ينــبوع الدمـــه
ولـلآه گـلـبه ايسَـلِّــمــه
لصوت السبايه يستمع
    الـــــــمـَـهـــــدي..
-------------------------------
من يـحل شهـر الفجيـعه ملائـِكْة البـاري تبـده
ع الخليقه بالحزن تنشر قميص احسين جـده
شحـال مهـدينه يَـ شيـعه حيله هالمـنظر يهدّه
تنهش اظفار المصيبه بكل كيانه و تفت چبده
بالبـصـيــره مو بالـبـصَــر
يشوف بقميـصه الدّم أثر
من صــدره گلـبه ينـقـلـع
    الـــــــمـَـهـــــدي..
-------------------------------
هــالـقـميـص البـالسـمـه مـو للبشــاره ..للفجــائـع
ايسجِّــر بـصـدره جهـنّم لـو غِــده بالأفــق طــالِـع
ايذكِّـره بـيوسـف الهـادي و هْـوَ يعقـوب المـواجع
حاشه (يرتد بصر) عينه ، يعمه من سيل المدامع
و بـهـالـقميــص الـينّـشُــر
ينظر الرفسه الـ ع الصَدُر
بجـثّــة حبـيبـه المنصرع
    الـــــــمـَـهـــــدي..
-------------------------------
تنـذكـر ذيـچ المـآسي و بشعـوره الـصــوَر تلتـم
لنـينـوى روحـه تهـاجــر وسـط دُخّـان المُـخيّـم
وبـهـجيــر الحَـر يشاهـد نـجم ع البيـده تخَـذّم
إلحَجَر صابه ابـ جَبِهته وموضع السّجده تهشّم
اِيـدير البصَـر صوب الأَسَـل
ايصد كل رمح كوكب حِمَل
و كـوكــب الـزهـره مـنرفـِع
    الـــــــمـَـهـــــدي..
-------------------------------
يكـتوي بلفحة هُمـومه بگـد ثره البيــده ايتِـحسَّر
بمصرع اجساد الهواشم من تهاووا صرعه ع البَـر
اهناك عرّيس ابـ دمائه اتحنّه وانزَف عله العسكـر
اهنا شبيه الهادي جثّه و من يلم جسـمه الموذّر ؟
وهنا خسِف وجه الگمَر
وهنا سـهم باتـرف نحَر
وهنا أثــر مـن الـضـلِــع
    الـــــــمـَـهـــــدي..
-------------------------------
يحضر ويحيي المجالس بين أحبابه ويهل عين
يـدعي عجِّل لـي ابقيامي يا إلهي لثار الِحــْسين
يقسـم بـثار الـغوالـب : أحضـر الـواسـاني بالبين
و يـوم لا ظِـل الا ظـِل البـاري أشـفـع للـمُـعَـزّيـن
يِعـبُر اللي دمعه انهمل
فوگ السراط بلا وجَل
وهناك اذَكره بهالوضِع
    الـــــــمـَـهـــــدي..
-------------------------------

مثيل جبار
٢٠١٩/٩/٤

" يـا ثامــن الأكــوان 🌄 "


ياللي الدماء اترصّعك ..كل ذره بيه تبايِعك
يبن الرسول بمصرعك ..صارت تطوف
-------------------------------
كل نفَس يجري بالصدر ينطق بإسمك
كل ذره بيّه وكل عضو يجسّدلي رسمك
كل قطره من دمي اغتدت تسجد لدمّك
صلّت خلايا الدم هوى بمحراب جسمك
وحي القوافي اتأملك ..عرشك دماء اتغسّلك
شاء الإله وأنزلك .. بارض الطفوف
-------------------------------
جالت خِيول الدمع بـ الوجنه عله ذكرك
مثل الخيول الأعوجيه الفوگ صدرك
تمنيت نحري ينگطع وي گطع نحرك
كل عمري فدوه للحظه يا سيّدي بعمرك
بهيئة إِنس لكن مَلَك ..سبحانَ من قد جمَّلَك
كل الوجود ايرَتّلَك ..حتى السيوف
-------------------------------
يا ثامن الأكوان يا ريحانة احمد
هامت الروح بعالمك والباري يشهد
من أنظر لوجه الفجر يرسملي مشهد
يرسملي جسمك دامي بالمذبح تِعَبّد
و من اسجد بفرض انتحِب ..أذكر الراس المنخضِب
بفرض الشهاده منصلِب ..بين الصفوف
-------------------------------
أنظر جبينك چن نبي بعالم خيالي
رمحك حراءك والوحي يطوف العوالي
ناموس ربّك خاطَبَك يا نبي اقرالي
و رتّلت ايات الكهف يبن الغوالي
براس الرمح تتلو الذِكِر ..لمتن العقيله تعتذِر
كلما سطع وجه البدِر ..نحرك أشوف
-------------------------------
من نحرك الطاهر يشع نور الجلاله
و صورة جمالك نفحه من صورة جماله
ما صح مثيلك يا ركن بيت الرساله
لا بالأرض لا بالسمه هاي استحاله
بالطف طحت طيحة سمه .. ع الگاع مخضوبه بدِمه
بضماك ذبّلت الضِمه .. وتروي الحُروف
-------------------------------
لذكرك تميد وترتَج اٌركان الرواسي
و شما أذكرك تلّفظ آخر انفاسي
ينرسم جسمك ع الثره بكامل حَواسي
و ما بين كل مَعلَم جرح يسرح احساسي
يخنگني دُخّان الخِيَم ..وبچبدتي امثَلّث سهم
ويعلو الصدر طود الألم .. يِترُك خسوف
-------------------------------


مثيل جبار
٢٩/٨/٢٠١٩

هُنـــا كونٌ من الجمــال والحُســن والحُــزن والهُيــام اسمهُ الحُســين ❤🍃

" رفـــاةٌ للغـريـــبـه 🍃 "


باتَ في الدّار .. رفاةٌ للغريبه
يجري مدرار .. بها دمعُ المصيبه
-------------------------------
ويــه أحــجـار
ركن بيت الأهل .. أخذ بيهه الأمل ..
بأجل يتبع وَجَل
هــالركـن غــار
جِمَع وحي و نبي .. و شجاعة غالبي ..
و أثر ريحة عبي

قــلـبُـهــا نـــــار ..كــما الويــل لـهيـبـه
يـجـري مــدرار ..بـها دمــع الـمصيـبه
-------------------------------
تنعــه وتنـوح
عله الراح بسَفَر .. تفت حتى الحَجَر ..
بگلب يشبه سقَر
و بمَثَل نـوح
طفح موج القهَر .. بحر همهه انفجَر ..
و سفينتهه القَدَر

فُـلـكُـــــــها دار .. بأجـفانٍ سكيـبه
يجري مـــدرار .. بها دمع المصيبه
-------------------------------
تخاطب انجوم
بمشاعر هايِمه .. و تصد وجه السمه ..
تخَضَّب مَعلَمه
ب غُصّه و هموم
و الم ما ينجرع .. تصب دم الدمع ..
بگلبهه المنفجع

دمـعُـهــا ســـار .. بوجـنـاتٍ تريــبه
يــجري مــدرار .. بها دمع المصيبه
-------------------------------
تقاسي آلام
سفَر ذاك الضعَن .. تحاوِطها المِحَن ..
عليله بلا وطن
تحسب ايّام
لابوهه ورجعته .. بركنهه نِظرِته ..
تعاين رگبته

رسمُـــهُ صــــار .. بأحجـارٍ خضيبه
يجري مــــدرار .. بها دمع المصيبه
-------------------------------
تنثر ادموع
لابوهه وعيلته .. تحس بذبحته ..
تون لمصيبته
طگة ضلوع
صُبَح صوت الحَجَر .. تشوف الدم نهَر ..
بگَطِع ذاك النَحَر

صــبرُها اِنــهار .. لأجســادٍ سليـبه
يجري مـــدرار .. بها دمع المصيبه
-------------------------------


مثيل جبار
٢٠١٩/٨/٣٠

" اعـله جـنح جـبريـل شعـري 🕊 "


هذا الذبيح امنين .. معقوله هذا حسين؟
من كل كتر مطبور .. وبيا ذنب منحور؟
***************************
اعله جنح جبريل شعري وبحزن گلبي المُتيَّم
سافرت بافلاك همي لمملكة كعبتي وزمزم
والدمع جمر وتنثّر من سقر جفني التضرَّم
لن أصد كوكب بمصرع غارگ بطوفان من دم
حاير فكر يا ناس .. وبخنگة الأنفااس
صحت بگلب مسجور .. وبيا ذنب منحور
**************************
تطهرت روحي بحزنهه وخافقي بدمعه تطهّر
واگصدت مذهول اناشد هذا يا كوكب تعفّر
شفته مدمي اعله البوادي و زمزم بنحره تفجّر
كعبه و بركنه الملائك حجّت ومدمعهه أحمر
و إرتجّت الأفلاك .. وانتحبت الأملاك
يمّه بحزنهه تدور ..وبيا ذنب منحور
***************************
بلايه إحرام و تطوفه لنهه مسلوبه ثيابه
منرفع راسه بـ أسنّه، و منعفر جسمه بـ تُرابه
وبصفا فردوس جسمه و مروة الراس وخضابه
صارت الأملاك تسعى و كل مَلَك يبدي انتحابه
يم جسمه جبرائيل .. يم نحره إسرافيل
چنّه نفخ بالصُور .. (وبيا ذنب منحور)
***************************
عاينت عالغبره مصحف والسوَر تجري اويه دمّه
سورة (الشمس) بجبينه و (الفجر) و (النور) جسمه
آية (التطهير) تنعه و (كوثر) المصحف تشمّه
لو نفس طه اللي ينعه والتشمّه البضعه يمه
والأنبياء تنوح .. ع المصحف المذبوح
تنعه بصدر مجمور ..وبيا ذنب منحور
*************************
بس نِظَرته عله العواسل أشعر بنحري الـ تگطّع
وكل خَسِف حافر بصدره بصدري حافر أحس يطبَع
شفته ع الكثبان مرمي وجسمي يم جسمه توزّع
عفرت خدي بتُرابه من شفت جسمه بالمصرع
وبصارمه الشيطان .. حز خنصر القرآن
لو خنصري المبتور ..وبيا ذنب منحور
*************************
ناشدت نحره بحسرتي والدمع يجرح جُفوني
لنه من راس العوالي جاوب الراس (اعرِفُوني)
(شيعتي مهما شربتم عذبَ ماءٍ فاذكروني)
(أو سمعتم بقتيلٍ أو شهيدٍ فاندبوني)
ياروحي هذا حسين ..افروع وأصول الدين
لذكره العمر منذور .. وبيا ذنب منحور
************************

مثيل جبار
٢٧/٨/٢٠١٩

" اِهـلال لو سـيف 🗡 "


اِهــلال لو سيف بـ سَمـــاء
يـقـطــر بـ حــدّه الدمـــــاء
يا محــــرم .. يا محــــرم
-------------------------------
يـا جـرح گـلبـي الـمـولَّـع يـا هــلال امـحَــرّم
لـ شوفـتك تهـتز اَركــاني وكـل فَـرَح يتيـَتّم
بروحي أنصب من اشوفك جم عزاء ومأتم
أنظر بطلعتك سيـف توضّه حدّه اٌمْــنِ الـدَّم
بـ جيتك تذوب الجِفون
و تهمل دموع و عُيــون
يا محــــرم .. يا محــــرم
-------------------------------
يـا هـلال و بـالمـآسي استـقـبـِلك و الـدمعــه
تطفـح الــعبره اعلـه صوت الناعي لمّن ينعه
تسـرح بـعالـــم حـزنـهــه روحي الـمنـفجـعـه
بذكر اهل بيت الرسول بيوم طاحوا صرعـه
رف جنح طير المُصـاب
بيوم طاحوا ع التُــراب
يا محــــرم .. يا محــــرم
-------------------------------
يـا هـلال و من اشـاهـــد حَـنوِتـك بـالـنَـظـــره
أذكر حسين وعضيده امْنِ انـحنه عليه ظهره
و مِـن اشـوف انـجـوم يمك بالسـمـه منتـثـره
أذكـــر اِجسـوم الغــوالـي اتناثــرت ع الـغبــره
و بـ رِسوم السمه اشوف
بـاديـة وادي الـطُـفـــوف
يا محــــرم .. يا محــــرم
-------------------------------
يا هــلال اشبــعد بيـك احزان غربه و لوعـه
اتچَتّـفت بيـك الـفواطـم بالأســر مفجوعــه
يشاهــدن جثـة محـمد ع الأرض مصـروعـه
و بإذن كل حرمه منهن صوت طگ اضلوعه
والسِّياط البالمتون
والايتام اليِـنحَبون
يا محــــرم .. يا محــــرم
-------------------------------
يـگضي بالآهــات ليـلي و مـن يـطر مصبـاحي
أنظـر لـشمس المعـالي وأطــگ راحي بــراحي
يـنذكر حــرگ الـخيـام و تشـب نــار اجـراحي
باللطم ما يبقه كون اي عضو بجسمي صاحي
صارت انفاسي سهام
و أشم دخّان الخيـام
يا محــــرم .. يا محــــرم
-------------------------------
نـذر كـل لحـظـه بـحيـاتي لخـدمـة ابـن الــزهره
بيش اجازي اللي من أجلي انگطع بالطف نحره
الـ مِـن حيـاتي ينـحسب بـس هـالليـالي العَشره
و اللـطم لابـن الزجيّـه كـون صـدري ايـكـســـره
ضامري بحزنه يِـلـوع
كون أكسرهه الضلوع
يا محــــرم .. يا محــــرم
-------------------------------

مثيل جبار
٣١/٨/٢٠١٩

" يَـ حـادي النــوگ 💔 "


يـ حادي النوگ...ريّض خل اودعهم
بگلب محروگ...ٲخوتي ارد افزعهم
حُسَين الطاح عـ الغبره
وكفيلي المنخسف بدره
يـ حادي النوگ...يـ حادي النوگ
******************
يحادي النوگ ريّض خل...اودّع ٳخوِتي ساعه
ادوّر عـ الوگع ﭼـفه.. وْ عَلَه اللي امهشّمه اضلاعه
واعاتب عـ الصدر دگلي.. ٲخوي وأعرف اطباعه
عجيبه ما فزع وسياط.. متني توصل اسماعه
بـ حوافر خيل.. ثياب حسين اعاينهن
صحت ياويل..يريت ضلوعي سحگنهن
يـ صبح المنذبح فجره
وكفيلي المنخسف بدره
يـ حادي النوگ.. يـ حادي النوگ
**************
يحادي النوگ ريّض خل.. اودّع ٳخْوِتي بدمعه
اگلهم من مشيتوا النوح.. صفه نار وٲنه الشمعه
مثل طير بـ گلب مكسور.. طحت من السمه السبعه
و غفيت وشفت راس حسين.. يدوّر عـ النهر صبعه
عگب ما جان.. اعلَه جفني ينطبع ثغره
اعله جفني الآن..أثر لخيام مستعره
أحس بكل جفن جمره
وكفيلي المنخسف بدره
يـ حادي النوگ.. يـ حادي النوگ
************
يحادي النوگ ريّض خل ...اودع ٳخْوِتي الخمسه
الـ ﭼـانوا عزتي وذخري.. وبقيت بلا ذخر هسه
بقت ﭼـم ذكره من حسين.. شذكر منه وشأنسه
كواكب لــيل اخوتـه مـذبّحه وبالطف طفت شمسه
يـ بسم الله...نحرك رايده اشتمه
بـ مناحه وآه...ولوعه ومدمع ولـﭼـمه
يـ غصن وٲمك السدره
وكفيلي المنخسف بدره
يـ حادي النوگ...يـ حادي النوگ
******************
انصبغ وجهي بسواد الليل.. وزراگ سماي بـ جفوني
عله گد السياط احس ظلت.. تخضر سياط بمتوني
لا بو الينشد شوضعي.. ولا خو اليسأل شلوني
بكثر ما سالت دموعي.. بـﭼـفي طاحن عيوني
عله طاري الماي.. اطيح وتثگل جدامي
واصد لـ سماي.. گمرهه مترّب ودامي
ذبل من العطش ثغره
وكفيلي المنخسف بدره
يـ حادي النوگ.. يـ حادي النوگ
***********
يـ من عمري عله عمرك.. الـ حفر صدرك حفر كبري
يقرآن النبي ونحرك.. سُوَر وي الدمه يجري
أكابر والـصبر شيفيد..عله حالي بجه صبري
عَلَه حزني وسحگ صدري.. وسلب خدري وهتك ستري
اعله درب الويل.. ٲماشي الونّه والعبره
يـ نجم اسهيل.. بالطف منكطع نحره
يـ مصحف منهتك ستره
وكفيلي المنخسف بدره
يـ حادي النوگ.. يـ حادي النوگ
**************


مثيل جبار
٢٠١٨

" يـا جمـاناً قــد تـدلّى 💎 "


واحسيناً..واحسيناً..واحسيناً..واحسين
**********************
ياجماناً قد تَدَلّى بخيوطٍ من لُجَين
انت تِبْرٌ فوقَ تِبرٍ بل وفوق الذَهَبين
**********************
انت قيثارُ المعالي لحنُهُ في المَدَيَين
انت قنديلٌ تَجّلى نورُه في المشرقين
***********************
أنت بدرٌ و تَسامى أَلَقاً في كلّ عين
فمن العرشِ ضياهُ مُشرقٌ كالكوكبين
**********************
قد حَباك اللهُ نوراً أين منهُ الكونُ أين
واصطفاك اللهُ كوناً خالدا والعيشُ بَين
**********************
حينَ سوّاكَ جِناناً من ترابِ الأَطهَرَين
تربِ طَـفٍّ وعَليٍّ و رحيقِ الكَوثَرَين
**********************
قالَ للاملاكِ ربّي فاسجدوا هذا حُسين
فَهَوت أَملاكُ ربّي سُجَّداً والثَّقَلَين
**********************
و لَكَ الأفلاكُ أمست خَدما بين اليدين
و ستبقى كربلاءٌ قِبلة للقِبلَتَين
**********************
كم نبيٍّ بات يسعى بين نورِ القُبَّتَين
و جنانُ الخلدِ تغفو في رحابِ الروضَتين
**********************
تعرجُ العشاقُ شوقاً بـ بُراقِ المُقلَتَين
فـ تَقَبَّل ذا هيامي فَهْوَ في عنقي كَدَين
**********************
لستُ أرجو منكَ الا نظرةً في العالَمَين
واحسيناً واحسيناً واحسيناً واحسين
***********************

مثيل جبار
٢٠١٧

" ذَبـيــح جـريــح 💔 "


ذبيح.. جريح.. طريح.. حسين
غريب.. سليب.. خضيب.. حسين
*******************
غصن ريحان.. يخو القرآن..
سُوَر نحرك نزل منّه
يبو السجاد.. إلهك راد..
اعلَه رمحك تنرفع جنّه
ألك يـ حسين.. حور العين..
اگصِدت للزهره تتعنه
تعزّيهه.. تواسيهه..
عله العبره و عله الونّه
حنين.. أنين.. حسين.. حسين
حبيب.. عجيب.. غريب.. حسين
****************
اعله طولك ذاك..نعت الاملاك..
او عله النحر اوْ عله صوابه
العرش بالـ آه.. وسماء الله..
بجت بدموع سـچّـابه
وكل النور.. نزل مذعور..
اعله جفنك يمسح ترابه
تمنّه الموت.. ويصيح بصوت..
" آ يحسين ومصابه "

ابطِيوف.. يشوف.. كسوف.. حسين
يلوع.. بدموع.. لطلوع.. حسين
******************
السمه بلا لون.. تصيح شلون..
المصحف منكسر ظهره
الـ قبل ينباس.. صبح ينداس..
بحوافر ينحفر صدره
النبي المختار.. يبن كرار..
الگطع نحرك گطع نحره
الـ سلب خدرك.. او هتك سترك..
سلب خدره وهتك ستره
بچاك.. نعاك.. بدماك.. حسين
الرسول.. ابـ ذهول.. يگول.. حسين
******************
سواد الليل.. بچه بكل حيل..
ينوحك والدمع أحمر
عَله جسمك.. ونهر دمك..
لطم وشكم ضلع كَسّر
بحنينه يهيج.. يشك الزيج..
الـ ثَغَر من الضمه اتفطّر
ب نفس مخنوك.. يصيح بشوك..
مشكوله يـَ ذِمْةِ الحَر
بسواد.. أراد.. الحداد.. حسين
نداء.. السماء.. رثاء.. حسين
******************
بدمع واحزان.. نعه القرآن..
بجت لك سورة السجده
وبجه المصحف.. عله البالطف..
انفطر من العطش جبده
يبسم الله.. عله الويلاه..
الحزن من يا جرح يبده
حرك الخيام.. سحگ الايتام..
لو خوك الوكع زنده
الزنود.. تعود.. بجنود.. حسين
بقيام.. الإمام.. الهمام.. حسين
******************

مثيل جبار
٢٠١٨

" ابــنُ قـاتــلِ اليهـودي ✌"


ثغرُ السما لوجهه تبسَّم
ذا الأكبرُ بسيفه تكلَّم
***********************
مرتجزاً قد صاح في الحشودِ
إنّي انا ابنُ قاتلِ اليهودي
هذا حسينُ قبلةُ الوجودِ
لو قد ضمى آتيته بـ زمزم
***********************
دوّت له القلوبُ كـ الطبولِ
هذا شبيهُ الطاهر ِ الرسولِ
لم يبقَ فارساً سوى خيولِ
قد شقّهم كـ شق موسى للـ يَم
***********************
لما بدا كـ الشمسِ في الطلوعِ
أفئِدَةٌ آلت الى الوقوعِ
"ذا حيدرٌ" قضقضةُ الضلوع
أم انه القرآن قد تلثّم
***********************
قد أمطر السماءَ بالرؤوسِ
ضجَّ له الثرى مع النفوسِ
في عينه الفرات كـ العروسِ
ومهرها رقاب من تقَدَّم
***********************
لانت له أعِنَّةُ الرقابِ
في عينه ليست سوى سرابِ
تيمتت كفّهُ بالترابِ
ام الثرى بـ كفه تيمم
***********************
من عزمه شُقَّت له الصفوفُ
بدر التمام ما له خسوفُ
اشعاعهُ في نحرهم سيوفُ
والخوفُ من حسامه تَلَعثَم
***********************
في بأسهِ ألبرقُ والرعودُ
من عزمهِ يرتشفُ الصمودُ
لمثلهِ قد كُتِبَ الخلودُ
يراعُهُ سيفٌ.. مِدادهُ دم
***********************
نادى أبي ذا أحمدٌ أتاني
من كوثرٍ يسقيني في الجنانِ
لي شيعةٌ على مدى الزمانِ
من ابتغى لـ ذلهم توهَّم
***********************

مثيل جبار
٢٠١٨

" اتـلَعثَـم لســان الـدّهَـر 💔 "


اتلعثم لسان الدهر
وبالدمع يروي الخبر
بين زينب والكفلهه
كل حرف يفطر حجر
*****************
بين موجات المدامع.. والموادع والحنين
ودعت بالونّه اخوهه.. وتنتظر جيته تحين
تقبله بشماله وبنحره.. اوْ تِلْثِمه فوگ الجبين
بروحتك تكسرلي ظهري ..وينكسر ظهر الحسين
بطاري الموادع متت
اشلون لو عني رحت
احترگ شمعه بغيابك
شمعه مكسورة ظهر
**************** العباس ع ⬇
گلهه من طاحت يمينه.. زينب ارجو المعذره
يمنتي الدگيت صدري.. بيهه طاحت عـ الثره
يعني عگب الخدر زينب.. راح تمشي ميسّره
اوصيتي لا ينشاف دمعج.. والشمر لا ينظُرَه
لو گرب منـﭻ أحد
صيحي يا كافل مدد
يلتوي رمحي عله راسه
وما يظل لليدنه اثر
***************** زينب ع ⬇
تگله من بعدك يغالي.. ريت لا طال العمر
ريتهه الگطعه بيميني.. ولا يمينك تنبتر
ثغرك الكله ابتسامه.. ينـﭼـوي بـ حر الظهر
خويه دليني عله جفك.. ارد اشمه واحتضر
لا أخو ..لا من أهل
بـ عمري كون اشري الأجل
يمك وتحضر منيتي
واندفن يم النهر
**************** العباس ع ⬇
يسولف ومعميه عينه.. لا تشلعينه السهم
ما أريد انظر رقيه.. تشاگف بـ نار الخيم
ولا أشوف حسين صدره.. بـ حافر الخيل انهشم
ولا أعاين والگه جفج.. ينزل من حباله دم
وسفه تالي عله الهزل
ويحدي بالناگه النذل
ينطبع سوطه اعله متنج
يضرب و وين المفر
**************** زينب ع ⬇
شيبت رمشي النوايب.. والمدامع وشلت
واني انظر روس اخوتي.. فوك الرماح اعتلت
وجهك تراوالي مصحف.. وبـ ونينه ترتلت
شارب العباس أهتز.. "إذا الأرضُ زُلْزِلت"
و "الجبالُ سُيِّرت"
يعني سكنه تيسرت
و "البحارُ فُجِّرت" من
عيني جم بحر انفجر
*************** العباس ع ⬇
آه ومتونج وسافه.. من السياط امْوَرِّمه
متون زركه والعبايه.. حمره من كثر الدمه
النسمه التهب تاذي جرحج.. من تمر بي تِلْـﭼـِمه
بس اليهضمج شمرهم.. من يشتّم فاطمه
بغضاً بفاطم يسب
واني أسمع وانتحب
عـ الشريعه جسمي يهتز
ويحرگ بـ رمحي النحر
*************** زينب ع ⬇
ما اجيتك ارد اعاتب ..واشتكي سياط المتن
بس اگلك ياضواهه.. بعيني اريدك تندفن
ما اشبگك خوفي جسمك.. من سهامه ايظل يون
ولا الوح الرمح حته.. أَلثِمَك فوگ الجِفِن
اركض واعثر جرح
من انظر اهلالي برمح
انخسفت من السهم عينك
يعني مخسوف الكمر
*************** العباس ع ⬇
خويه اريد الونّه سكته.. لا تشمتين العده
نحري ويميني وشمالي.. لـ خيط بِـ احجابـﭻ فده
ذاك اثر سوط عله متنج.. لو جثثنه مْمَّدده
كعبه واستارﭺ عباتـﭻ.. لـﭼن كعبه مگيّده
تنزل دموعج مَلَك
ﭼـن ضوه بعين الفَلَك
وتعثر السبعه وشمسهه
لو جدم رجلج عثر
*************** زينب ع ⬇
أدري من حشّمت بعدك.. جبدك بصوتي انمرد
شكثر طعناتك يغالي.. سياطهم اكثر عدد
حرمه ويتيمه ووحيده.. بديره ماترحم أبد
مرّه انظر راس اخوي و ..مرّه اركض للجسد
مو أخوي المنذبح
راسي الـ انشال برمح
ﭼـفن موتي رموش بيضه
وگبري بدموعي انحفر
*****************


مثيل جبار
٢٠١٨