يمه بالليل * ممـنوع تنامـون
يمه لحسين * تنطون العيون
صيروا غيمه اتضللـه
روحوا ميّة فدوه إله
ـــــــــــــــــــــــــ
وداعة الله وأدري بيكم ما تجوني
انتو مخلوقين إله ولتـفشـــلوني
هيچ يم الزهره اريد اتفرحوني
النبله اذا ما تشبع انطيكم عيوني

من تگعدون * خدام تگعدون
أزعل هواي * عدلين تردون
اي عذر مـــا أقبـــله
روحوا مية فدوه إله
ـــــــــــــــــــــــــ
يمه امكم زامطت والبــاقي يمـــكم
حسين واخته ملوك والخدامه امكم
حسين چان ازغير وآنه احچيله عنكم
هسه من يعطش بعد سلموه . رگبكم

يمه يا . مـاي ! * والمـاي إلحسـين
سبع فـدوات * ترحون يالبــنين
حسين صاحب منزله
روحوا مية فدوه إله
ـــــــــــــــــــــــــ
الگاع ضيگه ويمه گلب حسين واسع
حسين يشبه جده بحر . من التواضع
صيرو . عابس صيرو. جون وصيرو نافع
هناك أخوكم يــبدي بيــها بيوم سابع

شوفو عباس * لو صام عله الماي
كلشي محسوب * بعيون علي هاي
وإمه كلشي إتسجـله
روحوا مية فدوه إله
ـــــــــــــــــــــــــ
يوم عاشر . سمعو . يمه يريد ركضه
صيروا . بأول صف أريد الزهره ترضه
خل ينام حسين وانتو . بحال يقضه
حسين هذا أمـــه الزچيه وآنه فضـه

خاف ناسين * تانيت تكبرون
مناطره سنين * وياه تموتون
وآنه مــو . متفضلـه
روحوا مية فدوه إله
ـــــــــــــــــــــــــ
أنه امربيتكم وسيله حسين غايه
اگبال اساميكم كتبتْ انتم ضحايه
چان اخوكم عمره يوم وبيده رايه
هسه صار الطف يعشــّـاگ المنايه

وانتم زغار * تدرون بـ اليدور
من تشبون * تنطون الانحـور
وهسه اجتكم كربله
روحوا مية فدوه إله
ـــــــــــــــــــــــــ
يمه فدوه وناطره مــنكم بشــاره
الموت دون حسين ميريد إستخاره
يمه فَيّ صيرو اعله خده بعز . نهاره
اثنين موتو . ابيمنته اثنين بيسـاره

النوم ممنوع * مقبول على الگاع
بس بلا انفاس * ميتين يلســباع
هاي كـــل المسـأله
روحوا مية فدوه إله
ـــــــــــــــــــــــــ

مهدي عبد الحسين التقي

https://t.me/pagy007