من جروح يوم الاربعين

رد ضعنا .. وين اهلنا
استقبلوا ضعن الحزينه .. من اليسر هلـ يوم اجينه

-----------------------
هاليوم اجـيـنه مـن اليسر وبـيا وضـع ردينه
بهضم وغرب. لوعة گلب وحزن وألم هم بينه
بالشام شفنه شگد هضم ضحكة شماته علينه
طـبـينه للـشـام وشمـر عـگـب الگـمر حـادينه

واني حالي .. بلايه والي
وبحبل مچتوفه ادينه .. من اليسر هلـ يوم اجينه

-----------------------
شحـچـي شـسولف ياجرح عن ياقهر مراني
اهواي ابد ماتنحسب تشيب الجنين احزاني
من يوم مارحـت وعـفت امـذبحـين اخواني
درب اليسر ضيم وقهر شماتـت عـدو راواني

دنيه دارت .. وبينه جارت
وصبت امصايب علينه .. من اليسر هلـ يوم اجينه

-----------------------
من يوم ما داس الشمر صدرك يعشرة زغري
لـ هـاساعـه يابـن فاطـمه محـتاره اني بأمري
من سَـلبوا ثوبـك اجـوا ياخويه سِلبوا خدري
وياريت لحـظة مصرعك يمـك هجـرني عمري

ولا سبوني .. وركبوني
ناگه هزله ياولينه .. من اليسر هلـ يوم اجينه

-----------------------
ومن عگب كافل هيبيتي ودعت يمه الهيبه
يامـر علي تـالي الوكـت هـذا الشمر عجيبه
تمـنيت تبـلعـني الارض ولا شفنه هلـ مصيبه
بـت فاطمه وحيدر علي تمشي بـيسر غريبه

يامصابي .. ويا عذابي
مو ابوفاضل يحدي بينه .. من اليسر هلـ يوم اجينه

-----------------------
عالنـاگــه مشـوني بـيسر ومچـتـفـه بحـبالي
طول الدرب چـان الضرب فوگ المتن يبرالي
كالساعه امشي والتفت. ضل فكري يم اعيالي
خـافن طفـل نـص الدرب ايضـيع مـن اطفالي

دولبـوني .. ومرمروني
كلفه يا خويه الضعينه .. من اليسر هلـ يوم اجينه

-----------------------
ذاك الـدرب كـله ابـد مـا بطـلن دمعـاتي
امشـي وعايـن خـايفـه واتفـگـد ابنياتي
يبن امي كل ذاك الدرب مابطلت وناتي
عشـرتـنه اذكرها الگبل وتحسر من الأتي

بهذا وضعي .. اجري دمعي
واذكر ايام المدينه .. من اليسر هلـ يوم اجينه


الشاعر عقيل الحسناوي..

https://t.me/qrtahu