МУНОЖОТ
Ҳар кун саҳарларда сўраб йиғладим,
Тунлар жойнамозда тилаб йиғладим.
Тўкилиб, йиғладим, гуллаб йиғладим,
Ўзимни ўзимдан озод эт Тангрим,
Икки дунёйимни обод эт Тангрим.
Ўзимни азоблаб қонимни ичдим,
Лаҳзалик шамдайин,бир ёниб ўчдим.
Ўзингга етай деб ўзимдан кечдим,
Ўзимни ўзимдан озод эт Тангрим,
Икки дунёйимни обод эт Тангрим.
Сўнмоқдадир нега нафасимда гул?
Йиғлади сасимдан дод солиб булбул.
Мен ўзим, ўзимнинг қафасимда қул,
Ўзимни ўзимдан озод эт Тангрим,
Икки дунёйимни обод эт Тангрим.
Юлдузим сўнмоқда ойларга боқдим,
Умрим оқиб кетар сойларга боқдим.
Сен бор ҳамма азиз жойларга боқдим,
Ўзимни ўзимдан озод эт Тангрим,
Икки дунёйимни обод эт Тангрим.
Руҳимни пиширдинг қийновларингда,
Сабримни синадинг синовларингда.
Лойиқ кўриб энди сийловларингга,
Ўзимни ўзимдан озод эт Тангрим,
Икки дунёйимни обод эт Тангрим.
Малакларга дўстман,
лаъингга душман,
Тунлари уйқуга сиғмаган тушман.
Жаннатингда учмоқ истаган қушман,
Ўзимни ўзимдан озод эт Тангрим,
Икки дунёйимни обод эт Тангрим.
Нурланиб кетаман Каъбага борсам,
Покланиб кетаман тавбага борсам.
Бир ўзингга ёрдим,дилмни ёрсам,
Ўзимни ўзимдан озод эт Тангрим,
Икки дунёйимни обод эт Тангрим.
Жаннатга захира чекдим кўп жабр,
Сулаймондек тахт бер,
Аюбдай сабр.
Ўлсам нуринг билан ёришсин қабрим,
Ўзимни ўзимдан озод эт Тангрим,
Икки дунёйимни обод эт Тангрим.
Жаҳонгир Номозов
17.01.2021
@sher_daftari