أنا على خبرك ليا هـ الحين عزابي
محدٍ يراعيني و لحدٍ يداريني

أموري مصلحه و أنا على أعصابي
و دنياي كل ما لها تنقص مثل ديني

نفسي هواويه و قريني أعرابي
و ملك على يساري و ملك على يميني

و أبليس سلمت له عمري و ضحى بي
رايح له الله يغفر لي بـ رجليني

معطيني الله على نيات شيابي
الله يعطيهم الجنة و يعطيني

مانيب كامل و لا أقصّر مع أصحابي
أشيل همي و هم اللي يخاويني

ما ودي أشعر بـ تقصيري مع أحبابي
مع أنهم كلهم ما قصروا فيني

عاتبتهم لين ما ملوا من عتابي
و خلوني لـ حالي الله لا يخليني .