Introvertlik
Bugun tor ko‘chadan ketayotgandim. 100 metrcha uzoqlikdan mikrofonda bir ayolning to‘y-challarlarda gapiradigan ohangdagi ovozi keldi. Qarasam bir uyning eshigi ochiq, odamlar to‘planishib turishibdi. Pana qilib o‘tishga biror daraxt ham yo‘q. "Ha..." dedim-u, sekin orqaga yo‘rmaladim. Yo‘lim uch barobarga uzunlashdi. Afsuslanmadim! #gointroverts 💪
Yangi O‘zbekiston sharoitida, har bir ijtimoiy qatlamning huquqlari, qiziqishlari va ehtiyojlari ko‘rib chiqilar ekan, introvertlarning ham talablari qondirilishi zarur deb hisoblayman. Ko‘ngli nozik va ruhiyatida jiddiy shikastlanish bor bu toifaning bir mas'ul a'zosi sifatida hokimiyatga shunday taklif kiritmoqchiman:
- shaharning aholi yashaydigan har bir hududia introvertlar yurishi uchun bittadan maxsus ko‘cha tashkil etilsin;
- bu ko‘chada bittadan ortiq kishi to‘planib turishi ta'qiqlansin;
- bu ko‘chadan o‘tayotgan har bir shaxs vakumli quloqchinlarda bo‘lishi shart;
- bu ko‘chada salom berish, oilasi va avlodi haqida 25 minut surishtirish ta'qiqlansin;
- bu ko‘chaga jonli mavjudotni ko‘rsa och nahangday tashlanib, savollarga ko‘mib tashlaydigan kichkina bolalar kirishi qonunan ma'n qilinsin (ayniqsa guruhlarda);
- favqulodda holat sodir bo‘lib, gaplashishga ehtiyoj tug‘ilsa, shaxslar bir-birlari bilan o‘zaro ko‘z to‘qnashtirmasdan, faqat oyoq kiyimlariga qarab gaplashishlari shart qilinsin;
- qattiq kulish, qattiq nafas olish, esnash va qattiq kiprik qoqish ta'qiqlansin;
- ushbu qonunga rioya qilmagan shaxslar 5 yildan 15 yilgacha (jiddiy holatlarda umrbod) ozodlikdan mahrum etilsin.
Ushbu loyihaning qonun doirasiga kiritilishini qo‘llab-quvvatlang. Introvertlar hayotiga befarq bo‘lmang! Sizning ham oilangizda kelajakda shunday insonlar chiqmasligiga hech kim kafolat bera olmaydi. Baxtli jamiyat - baxtli kelajak sari.
@tilmochqiz