يا لحون العود ولا يا مجارير الربابة
إختلف معنى القصيد وضيّع الفنان فنّه

حلم مدري علم مدري نوض برقٍ في سحابة
أثرها طلّة جبينه يوم زاح الليل عنّه

أقبلت مثل الفرس لا سمعت طبول الحرابة
مقتفيها ليلٍ أسود والنجوم يفرّقنّه

النهار يمر ويعدّي وليله في عقابه
النحر صبحٍ تجلّى والجدايل كنّهنّه

مخملٍ يلتفّ حول الجيد الأتلع بالنيابة
عن سلاسيل الذهب والماس خوف يجرّحنّه

غاب عنّي والوله خلاّه عندي في غيابه
ما درى إن فرقاه نار ولا درى إن لاماه جنّة

يا وجودي وجد عودٍ لا عيال ولا قرابة
ما جداه إلا يونّ ويردف الونّة بونّة

لا لقى فزعة رفيق ولا دعاةٍ مستجابة
كلّ ما أمسى له بظنٍ خيّبت الأيام ظنّه

ويا وجودي وجد من صفّق على ماضي شبابه
بان شيبه والسنين اللي يبيهن خالفنّه

غرّته خضر السنين وراح عمره ما درى به
غرّرنّه وأرفعنّه لين سجّ وحولنّه

ذاك وجدي في غياب اللي نزح والله جابه
صح فرض الله فرض وسنّة الرسول سنّة

الغلا جسمٍ رقيقٍ مرهف إحساسي ثيابه
مثل غصن الورد يوم إن الهبايب يطرقنّه

ما زرعت إلا غلاه ولا نقلت إلا صوابه
والحشا ما ضاق من خضر الطعون المستكنّة

يا حبيبي ما زها كفّ الخضاب إلا خضابه
فيه نظم المفردات وفيه للعشّاق عنّه

الظبي ما له شبيه وبينك وبينه تشابه
إلتفت بشويش وألقى فيه منك وفيك منّه

خالقك من فضّل محمد على كلّ الصحابة
وسخّرك مثل المهار اللي تسخّرها الأعنّة

والثناء والشكر للي رحمته تسبق عذابه
لا لخلق الله فضل ولا لخلق الله منّه

قاله اللي ما خذا مما يريد إلا هبابه
خيرة الفارس ثنيّة خيل صفراً مستعنّة.

- سلطان الهاجري.