قال لي : لو جتك فرصة تفتش بالقلوب ؟
قلت له : لو جاتني صدق مافتشتها

خلّني مرتاح أصادق عدوّ ، وأسمع كذوب
أترك العالم تمثّل وراك أبلشتها ؟

دامني لاجيت غالي ومقدّر ومحسوب
قيمتي خلف الكواليس مانبّشتها

لو براقب كل هرجة قفا من كل صوب
عشت عيشتهم وأنا عيشتي ماعشتها

طلقةٍ ماصوّبتني بتقلعها الهبوب
طايشة وإليا تجاهلتها طيشتها

التغاضي والتروّي يعيّشك امهَيوب
والصغار تزيدها قدر لا ناقشتها

الحسد والحقد والبغض والغيرة تذوب
من قلوب ماتدانيك لا همّشتها

والأوادم عن هروج القفيّا ما تتوب
لو تلحّفها رموشك عقب فرشتها

آكلة لحم البشر ناس جوعانة ذنوب
آكلين إليا تضايقت..وإن طنشتها

دام مافي يدينك لا شروق ولا غروب
خل نفسك في تغاضيك تلبس بشتها.