ويش أسوي لا طريق ولا خوي
لا قرار ولا خيار ولا مصير

اللّيالي تلوي ذراعي لوي
والرفيق السيف يغريه الجفير

والضياع بسكّتي يدوي دوي
اتصفّق لا سراب ولا غدير

أطوي الظلما وعيّت تنطوي
واشتهيت الشوف بعيون الضرير

مثل طير طاح بيدين بدوي
يلعن الطيحة ولا يقوى المطير

كل يوم أقول باكر تستوي
وخاب ظني بالزمان و بالنصير

كنت أنا الصدر الحنون المحتوي
وكنت أنا لاحساسهم سلك الحرير

وصرت أنا هاك النحيل المنطوي
تلهث أنفاسي ورا حلمٍ كبير

ضاعت الحيلات حيل الله قوي
لاني الأول ولا اظن الأخير

قلت بصرخ وآخر علاجي كوي
وصلت الحلقوم والخاطر كسير

من شرب من كف غيره ما روي
لعنبو كفٍ على المَدة قصير

لا تعاتب ويش أسوي ياخوي
لا قرار ولا خيار ولا مصير.

⁃ مساعد الرشيدي.