ستا د دیدار انتظار ، بس انتظار انتظار
دامیدو غیږه کې ، پروت یم حصار انتظار

رانه خوري غلی غلی ، دنیا د عمر نعمت
کله به دروړم تا ته ، ستا تر دربار انتظار

د خپل عمل کرونده ، نور رانه شاړه ده خو
پکې کرلي مې دي ، مینه او یار انتظار

مجبور یم ناست یم ورته ، بله چاره نلرم
ازمایم بخت د وصال ، د ژوند پر لار انتظار

د بېلتانه زولنې ، قدم ته ما نه پریږدي
عَالم دیدار ته ورځي ، زما برخه خوار انتظار

ناهیلی نه یم ورته, وحیدي وکړل که رب ﷻ
شي ناممکن به ممکن ، کړي به فرار انتظار

وحیدالله وحیدي