يا حرورة مقتلك
الكلب منها انهلك
والله ما يبرد مصابك ياحسين
جمرة تجوي بروحنه بمر السنين

________________________________

عاشور ذبحك من يهل يحكم ذبح ضحكاتي
وأيذن بروحي الحزن حي على الوناتِ
من المح بعيني نهر غصبآ تهل دمعاتي
لو المح اكبالي العبي ابجي وتهد اهاتي

روحي صارت منزلك
الكلب منها انهلك

عزم دمعاتي اعله نحرك ما يلين
جمره تجوي بروحنه بمر السنين
________________________
عاشور نحرك جن رمح غرز بروحي مصابك
لصوابه ما يرهم دوه بس الدمع يم بابك
ادعي الله تقبل دمعتي واتسجل ويه احبابك
توفيها الي بيوم الحشر وادخل جنان اصحابك

ونتي تبجي الفلك
الكلب منها انهلك

كلشي بالدنيا بمحرم ظل حزين
جمرة تجوي بروحنه بمر السنين
__________________________

شيعه احنه كل عام اليمر ايهل الك مدمعنه
عاشور من انحس كَرب حتى النفس يوجعنه
انريد نبجي ادموم الك خلي الخلك تسمعنه
احساس بالعاشر يجي للطف بجي يرجعنه

والمدامع بس الك
الكلب منها انهلك

ينفطر منه الصخر بينه الونين
جمره تجوي بروحنه بمر السنين
_______________________________

عشنه بحلم من الصغر نفرح باسم خدامك
هالتسمية اعظم شرف لو وسمتنه اوسامك
ع الكوثر نشوفك حلم ونطيح تحت اجدامك
والدمعة نلكاها نهر طاحت حزن بايامك

كون ونتي توصلك
الكلب منها انهلك

وين نلكه اليشبهك دلينه وين
جمره تجوي بروحنه بمر السنين
_______________________________

مو بيدي يا ابن فاطمة شرد انسه من اطفوفك
شرد انسه كطعة خنصرك لو منحرك و اجفوفك
كل ليله روحي من الحزن باسمك تخط وتطوفك
ويلوح بعيوني العطش من انظر اعله احروفك

طيفي بدروبك سلك
الكلب منها انهلك

انته ديني ولولا نحرك ماكو دين
جمره تجوي بروحنه بمر السنين
___________________________ حسين المحامي
________