Qor yogʻayotgan oqshom
Shaharni kezsang,
Gʻira-shira koʻchalarni kezsang,
qoʻllaringni choʻntakka tiqib,
Qor esa erisa lablaringda jim.

Oʻylasang, olislarda qolgan kimnidir,
Shu qorni oʻylasang, qalbing entiksa.
Ayniqsa, oʻzing sevgan qizni oʻylasang,
Ayniqsa, oʻylasang onangni…

Qor esa tinmasa,
Tinmasa qadaming.
Oʻzing ham bir qor uchquniday
Singib ketsang tunning bagʻriga.

Kimgadir yoʻl bersang, kimgadir salom,
Ammo oʻzing bilmasang buni.
Qor esa boʻralab yogʻaversa jim,
Adashsang-da, sezmasang adashganingni…