ساقي عطاشا كربلاء

خويه عباس رفعة الراس
حامي ظعنّه كلك احساس
..............

اجيتك يابوفاضل عندي هالطلبه
يخويه الماي جيبه وادري مو صعبه
چم طفل التهب من العطش گلبه
يصيح الماي وينه الماي ياعمّه
..............

زينب آنه زينب ياضوه عيوني
اجيتك بيدي جربه وبيها وصّوني
حرم وطفال ليك بهاي ودّوني
الماي الماي كلها تصيح هالكلمه
..............

خادم يختي زينب طلبتچ عالراس
اجيب الماي امني براية العباس
راح اهجم عليها وناس تردم ناس
وسفه شلون عبدالله الطفل يضمه
..............

توجّه للشريعه بجربته وسيفه
حالف من اميّة ياخذ بحيفه
يطشّر بيها گام ويجمع بكيفه
يشطره بسيفه كلمن يقترب يمه
.............

طب للمشرعه وشال العذب بيده
لكن ما شرب وتـذكّــر اعضيده
حسين الضامي يدري ويدري بوليده
عبدالله الطفل يبچي بحضن امه
.............

جاب الماي عباس ورجع ليهم
اطفال وحرم بچفوفه يرويهم
وفي العباس ناشر رايته عليهم
وشرب ماي الطفل وتبسّم لعمّه

سيد زيد الفحام
2020
________________________