في ذكرى وفاة السيدة خديجة (ع)
نور بيتك غاب يا طه الأمين
من كِضَت هاليوم (أمِّ المؤمنين)
و اللي يدفن بالتراب اَحبابه
اينام او يصحه ابدَمْعِته السجّابه
& & & & &
يا محمد دَمْعِتك عـ الوجنه طاحت
لَن خديجه ابحسره هذا اليوم راحت
فوكـ راسك غيمةِ الأحزان لاحت
و الزجيه ابـ حِركه وينِج يُمَّه صاحت
اليوم يا بو الزهره وَدّعْت الحَنان
او بالتراب انته ادْفَنِت سِرِّ الأمان
و اللي ما تِرجَع عليْه غِيّابه
اينام او يصحه ابدَمْعِته السجّابه
& & & & &
ذِبْلَت ابـ بُستان عُمرك أغله ورده
او عالوِطيه ماي أحلامك تِبَدَّه
إبوجود الحُرَّه جانت ماكو شِدَّه
و الكلب .. مو مال .. لك جانت تِمِدَّه
الـ كلبك الطاهر خديجه اَغله حبيب
او من جُروحك تِدِّي جانت لك طبيب
هسه كلبك من عَظيم اِصْوابه
اينام او يصحه ابدَمْعِته السجّابه
& & & & &
البيت من دون الغوالي ايصير ظَلْمه
و الـ يِفاركـ له عزيز الهم يِضُمَّه
باكـ منِّ اشفاك دهرك أحله بَسمه
او خله كلبك يِطفَح ابـ رُوجات هَضْمه
تاكل ابـ روحك يطه الذكريات
من بعد غيبةْ أيادي الحانيات
او كلمن الدنيه اِحْرِكت له اَطنابه
اينام او يصحه ابدَمْعِته السجّابه
& & & & &
هذي أم الزهره تستاهل وِنينك
من ترد تعبان تمسح لك جِبينك
يا محمد هيه روحك هيه عينك
او من قبل مَتْطِيْح هِيْ جانت تِعِينك
جانت الملجأ إذا ضاكـ الدِّليل
هسه من غابت .. حياتك كلها ليل
و اللي فَكْد الغالي مو بِحْسابه
اينام او يصحه ابدَمْعِته السجّابه
& & & & &
إحنه ندري او إنته تدري يا محمد
و الضَمير اللي يدكِّـ ابـ غِيره يشهد
لولا سيف الوالي دينك ما تِعَبَّد
او لولا مال الحُرَّه دينك ما تِشَيَّد
بِذْلَت الـ عيناك كِل غالي او نَفِيس
و اللي ما يِهْوَاها خَسران او تَعِيس
لاجن الـ بسِّ الحِزِن دَكـ بابه
اينام او يصحه ابدَمْعِته السجّابه
& & & & &
يا محمد يا رسول الله او نبيه
هَم خديجه سيدي صارت ضَحِيه
أبو طالب ذنبه جاب الحيدريه
او هيه كل المُشكله بـ الفاطميه
يا رسول الله يِهَمِّشْها العَذول
لنها أم الزهره فاطمْةِ البتول
بس غداً هذا العَذول اِحْسابه
اينام او يصحه ابدَمْعِته السجّابه
خادم خديجه براهيم دريس
https://t.me/Daher88
