الشاعر اياد الديراوي

خطاب الحسين ع مع العليله


خل اودعچ يالعليله ... سامحيني
هذي رحلتنه طويله ... سامحيني
حيل ما عندچ تجين طفله بعدچ عالونين
سامحيني
****
ادري يابويه صعب فرگ الحبايب
وادري طبعه اليفگد احبابه يعاتب
لكن ابطف كربله كل المصايب
يالعليله وينچ اوين النوايب

بكريله بويه الرزيه ... تنتظرني
وكل سيوف الغاضريه ... تنتظرني
ادري ما تتحملين طفله بعدچ عالونين
سامحيني
****
ما تروحين اعتذر للغاضريه
بويه من نمشي ترافجنه المنيه
بويه گلبچ ادري ما يحمل اذيه
اهناكه باچر تنسبي سكنه اورقيه

بالخيم جيش الضلاله ... ينتظرهن
للسبي حظر حباله ... ينتظرهن
ينفطر گلب الحنين طفله بعدچ عالونين
سامحيني
****
الروحه ويانه يبويه ماهي سهله
نظري اخر نظره للاكبر يطفله
ينذبح وسيوف اميه اللي تكتله
يگطعونه وحيرتي لمن احمله

توگع اوصاله امن اديه ... من اشيله
امه ليلى اتصد عليه ... من اشيله
بهل جرح تتعذبين طفله بعدچ عالونين
سامحيني
****
تمتحني بالصبر يابويه دنياي
توقعت كلشي لچن ما حسبت هاي
ينفطر گلب الرضيع اويطلب الماي
بسهم المثلث يذبحونه اعله يمناي

من جرح عبدالله اكابر ... ويلي ويلي
يرتوي من دمه باچر ... ويلي ويلي
الهل سبب ما تعتنين طفله بعدج عالونين
سامحيني
****
بهل علل ما يحمل اكليبچ فجيعه
بالحبل تتچتف الحره الوديعه
وبو فاظل باچر چفوفه گطيعه
وتنطفي عين الكفيل اعله الشريعه

ينكسر ظهر اليالي... وعتنيله
يصرخ الحگني يغالي... وعتنيله
راح ابوسه اعله الجبين طفله بعدج عالونين
سامحيني
****
وحدي راح ابقه يطفله ومحني ظهري
والشمر يتربع اهناك اعله صدري
بويه بالخنجر يحز تاليها نحري
بلا ذنب فوگ الرمال دمومي تجري

امن الظهر سهم المنيه... من اسحبه
إلسمه تبچي عليه... من اسحبه
بويه ينحز الوتين طفله بعدچ عالونين
سامحيني
****

الشاعر اياد الديراوي