سجانك انتَ وعايش واضح
گبالك وضح مثل الشمس
بس هسه اليعذبونك كثره
وما اشبه اليوم ابأمس
والميت اسهل شي ينطونه
ايشيعونه جهراً مو همس

بديرة عِرِف ماضل بالشام
ليش النعش ما يمه ازلام
اجنازه ونداء ابإستخفاف
مايمهه اهلهه شلون اتنام

روحه .. بتابوته .. ومهضوم
اغرب تشيّع بهل يوم
ميّت متگيد مسموم

امام الرافضا .. ويلاه
بچه اعليه الرضا .. ويلاه

_
اغرب سجين ونور الباري
بطاموره حسره اعلي ضوه
يطلع يريد ايشم النسمه
وضربه تجيله اويه الهوه
مو من ضربهم تجري دموعه
من شتموّ أُمه انلوه

يعني اشتذكر بالشتمات
كض الصفحاح امن العصرات
دفعوّ عليَّ باب الشتموه
وضلوعه صلّت عل كسرات

ينزل دمعه اعلل زهرا
سجنه اخرايب للحورا
تابوته مسلسل ويلاا

ذبل عوده وگضا .. ويلاه
بچه اعليه الرضا .. ويلاه
_
تمطر غربته حته ابموته
ورادو يرد اعليه غرُب
هذا الغريب امنين انصيح
كل ذكره يصرخ لي گلب
مو بالجسر مگطوعه دروبه
الهسه ويگطعون الدرُب

چا بس نعرفه من نحتاج
يلفيله بس الدهره الضاج
الخاطرنه طب سجن وتعذيب
وهوَّ اسمه للمسجون افراج

اسمه فراج الهذا الكون
الخاطرنه صار المسجون
بس بحاجه اعليه يلفون

انوح امن الفّضا ... ويلاه
بچه اعليه الرضا .. ويلاه
_
ليش الثَلَثت ايام اشعدهه
ويه الأئمه بكل زمَن
واحد يضَل عاري بتربانه
وتلث ليالي ابلا چفَن
وهنا نعش ممدود ابجسره
ونومه العيون ومابچَن

شيخ الامامه ابنص تابوت
امن الشيعه راد ايصح زاتوت
يصرخ يبو ويطين الراس
وين الصرخ مبحوح الصوت

بگلبي ادموع اتصيح شلون
يتشردون ولازم كون
لو مذبوح ولو مسجون

جرح ما غمّضا .. ويلاه
بچه اعليه الرضا .. ويلاه

____
ابچي ابدمع مسمومه اعيونه
وتطلع دمعتي امسممه
كل مرّه انوح الهاي الحاله
امن اذكر تجيله فاطمه
تنعه وتنوح (ابيمه وليدي)
امحدبه وضلعهه تلزمه

چا يمته گلولي وترتاح
يوميه تشيّع اويه اصياح
غير التكسر راحه ايريد
لو سِم يجيهه لو ذباح

الزينب للكاظم واتدور
ويريد الراحه المكسور
متطينه ودم ليهه ايفور

نعش جاي ومضا .. ويلاه
وبچه اعليه الرضا .. ويلاه
سيد مصطفى الموسوي