استوريات حسينية باسميه

يا باب الما رد خطاره
عباس اليكرم زواره

،،،،،،،،،،،،،،،،،،،،،،،،،،،،،،،،،،،،،،،،،،،،،،

جيتك وادري انته التگضيهه
يا كافل زينب تدريهه
صعبه وتنحل يم راعيهه
بل أيد الكافل ينطيهه

متعني العباس الداره
عباس اليكرم زواره

،،،،،،،،،،،،،،،،،،،،،،،،،،

امشيلك يا بعد عيوني
يا ديني وعمري ومضموني
انه بدونك مدري شلوني
ميت والوادم دفنوني

يمك هالروح المحتاره
عباس اليكرم زواره

،،،،،،،،،،،،،،،،،،،،،،،،،،

يمك جيت واشكي احوالي
وانت ألاعرف باليجرالي
دنيا وضاعت بيهه امالي
وانته التشفعلي وتبقالي

خادمكم تدرون اخباره
عباس اليكرم زواره

،،،،،،،،،،،،

خادمكم كون تقبلوني
وبهاي الخدمة توفقوني
لاموني وشنهي اللاموني
انتم للجنه توصلوني

گلب الخادم تدري اسرارة
عباس اليكرم زوارة

،،،،،،،،،،،،،،،،،،،

تدري انته وتعرف بالنيه
حلفتك بسم المسبيه
دنياي اذتني وما بيه
عباس انته انفاس وريه

چفك طاح وبيه الشاره
عباس اليكرم خطاره

،،،،،،،،،،،،،،،،،،،،،،،،،

اوصل يمك واحچي حچايه
واهتف عباس انته الرايه
غايتنه انته واشرف غايه
يا نهر الغيره انته ومايه

هذا النار تلوذ بناره
عباس اليكرم خطاره


كلمات خادم الحسين
#رعد الفريجي
1442 للهجرة

ماكـــو زاير ... يجـري دمعه
واعله گبري ... يخلّي شمعه
صعبه يا ناس الأمر
محــــــد يزور الگبر
.............
كل وكت لمن تحـين المــــغربيه
أنتـــظر هَــــلبت يـمُر زاير عليه
گبري عطــــشان لمدامع حَسَنيّه
حته شمعه اعله الگبر ماكو أليه

للأحبــــهه ... دمعي أحـبس
ليش يمي ... ماكو مــجلس
ليــــــش قِلَّه أنذكُر
محـد يـــزور الگبُر
...........
أعتب اعليكم يشيعة عتب الاحباب
صوتكم يقره الزيارة بمـسمعي غاب
ماحصل ناعي لرزيتي ينعه المصاب
ليش لسه گبـري بس حجاره وتراب

هدمـوهه ... للــــــبنايه
بلايه گبه ... بلايه رايه
أنتــظر واحد يمُر
محد يزور الگــبُر
............
من يمُر سبعه صَفَر يتجاره دمعي
أفتقد مشــــــــايه يم الكبُر تسعي
لا خطيب يمـــرني لا رادود ينعي
الهدموني باللحد كسرولي ضلعي

الحسن أنه ... يا مصابي
وبمضيفي ... انغلق بابي
بابي سداه الكفُر
محد يزور الگبُـر
............
روحي تفتر بــصَفَر بأهل المواكب
أسمي بفواه المــنابر ليش غــايب
گلوبكم يا شيــــعتي گلبي يراقب
الحسن ما ناسيكم أنتو يالحبايب

أذكــــروني ... بالمـــجــالس
أدري عندي ... هوايه عابس
يالتلطــمون الصدُر
مـــــحد يزور الگبُر
............
أليحِيّ يوم مصابي بدموعي أشـكره
منّه ممنون أللـــطم للحــــسن صدره
والذكّـــرني هناك يم البـــــاري أذكره
حتــه والما زارني بگـــــــبره أحضره

والدعــــاني ... أنه أشوفه
واليحـــبني ... ما أعــوفه
أحضره بيوم الحشُر
محد يـــــــزور الگبُر

الشاعر حاتم صبري الكاظمي

ازغر سبيـه...ماتت رقـيه
.........
عزيّــــزتكم يهاشم جاوبوهه
تمنتكم رقية اتــــــــودعوهه
ابدمعكم بالخرابة اتشيعوهه
يجي العباس والاكبر اخوهه

من الغاضرية....ماتت رقية
..........
گبل موتتهه چانت تعتنيلي
واناديـــهه هلا بوردة دليلي
يعمه هم ابو فاضل يجـيلي
اگلهه مـات يبـــنيتي كفيلي

بچف المنيه....ماتت رقية
..........
غريبه تنتـخي بحرمه غريبه
مصيبة ويا مصيبه يامصيبه
تناديكم واجــاوبهه الحبـيبه
أگلهه الراح ما نــگدر نِجـيبه

هاي المسية....ماتت رقية
................
عليهه المـــــوت ظل عيون ترمش
بالچفوف الزغيره ابخدهه تخمش
عله تراب الخرابة دمـــوعهه ترش
وأشوفنهه تجي مصــــلايه تفرش

بالمغربية....ماتت رقية
..............
يهاشم يــضـربوهه وتنتخيكم
من سياط الشمر تتحامه بيكم
التمنت لو تمــوت ابيــن اديكم
رقيـــــــة ماتــت اتسلم عليكم

بدار الرزية....ماتت رقية
..............
يزيد ومـن سِـــــمع لطفلة ونهه
خذو بالراس خل تكضي حزنهه
يويلي وخلّـــو الراس ابحضنهه
رقية گمت ما أســـــــتمع حنهه

مابين ادية...ماتت رقية

(الشاعر حاتم صبري الكاظمي)