Maqsadli Mijoz

Do'stingizdan, "Nima uchun iPhone sotib olding?" deb so'rasangiz, "Chunki u oddiy, dizayni zo'r" kabi mantiqiy isbotlashlarni eshitasiz.

Hech kim "Chunki do'stim iPhone ishlatgani uchun, menga status beradi" degan haqiqiy javoblarni aytmaydi.

Chunki biz xaridlarni emotsiya bilan qilib, mantiq bilan isobotlaymiz.

Inson emotsiyasini haqiqatdan tushuna olgan kompaniya uzoqqa boradi.

Milliy brendlarimiz orasida Texnomartni favoritlarimdan biri deb hisoblayman.
(Reklama emas)

Sababi ularning marketing kampaniyalari, umumiy strategiyasi, bozordagi pozitsiyasi doim e'tiborimni tortib kelgan.

Marketingda inson psixologiyasini tushunish qanchalik muhim ekanligiga Texnomartning marketing yurishini misol qilib keltirmoqchiman.

Ular tomonidan ishlab chiqilgan "Arzonroq topsangiz, tushib beramiz" kampaniyasini ko'p uchratgan bo'lsangiz kerak.

Agar yaxshilab qidirsangiz, Texnomart'dan arzon texnika taqdim qiladigan juda ko'p joylarni topishingiz mumkin.

Lekin shu xabarni o'zigina sizni boshqa joylarni qidirmasdan, aynan Texnomartga borishingizga sababchi bo'ladi va deyarli hech kim, avval bozorga borib, arzonini topib, keyin Texnomartga borib narx tushirishga harakat qilmaydi.

Mabodo siz shunday bo'lsangiz, hayotingizni boshidan tahlil qilib chiqing (hazil)

Lekin xuddi shu xabarni ular "Bizda eng arzoni" deb qo'yganda: birinchidan brend "arzonchi" degan tamg'a bilan aziyat chekardi, ikkinchidan bunday cho'pchak bilan xaridorlarni jalb qiladigan zamondan o'tdik.

Siz boshqa milliy brendlarimizdan shunga o'xshash qanday misol bera olasiz?

@maqsadli_mijoz

Brendlar o'rtasidagi sog'lom raqobat normal qabul qilinishi kerak

Biz buni g'arb davlatlarida BMW va Mercedes, Apple va Samsung o'rtasida ko'p ko'rganmiz.

Yaqinda o'zimizning milliy brend Korzinka tomonidan ham shunday yurishni guvohi bo'ldik.

"Havas qilib kelibsiz, Baraka toping"

Kreativ va ajoyib o'ylangan g'oya.

"Agar men Havas yoki Baraka'da ishlaganimda, qanday javob qaytargan bo'lar edim" deb o'ylab qoldim va ozgina qalam tebratdim.

Javoblarim quydagicha bo'lardi.

Havas tomonidan Korzinkaga javob:

Korzinkangizga barakali tanlov!

Baraka tomonidan Korzinkaga javob:

Havas bilan to'lgan korzinka barakadan darak!

Sizlarda qanday variantlar bor?

Javobingizni yozib qoldiring!

@maqsadli_mijoz

Media kompaniya boshlang, afsuslanmaysiz!

2023-yil 5-May kuni shu videoni Instagram saxifamga joylagan edim.

Ushbu videoda avval hamjamiyat keyin biznes boshlash eng samarali uslub ekanligini aytib o'tgandim.

Bu fikrga kelishimga sabab, tahminan 3 yil avval biz Kvadratmetr degan YouTube kanal boshladik. Kvadratmetrni asosiy maqsadi, O'zbekistondagi yangi qurilish majmualari haqida qiziqarli kontentlar ulashib borish.

Albatta bu loyihani tijoriy maqsadi bo'lgan.

1. Bu loyiha orqali Meraki agentligimizga lead jalb qilish. Masalan: Kvadratmetrga faqat quruvchilar murojat qilishadi. Ularga chiroyli video kontent qilib berganimizdan keyin, natijani ko'rishadi va o'z-o'zidan bizdan boshqa xizmatlarimiz haqida so'rashadi. Shu payt Meraki xizmatlarini taklif qilishimiz mumkin.

2. Meraki xizmatlaridan foydalanmagan taqdirda ham, har bir video, bizga yaxshigina daromad manbai bo'ladi.

Masalan, qahvalar haqida YouTube kanal ochsangiz, va ma'lum bir auditoriyaga ega bo'lganingizdan keyin, sizga imkoniyatlar eshigi ochiladi. Qahvaxonalar bilan hamkorlik, o'z qahva brendingizni boshlash, yoki o'z qahvaxonangizni ochish.

Nima demoqchiligimni tushundingiz.

Shuning uchun avval media kompaniya bo'lib va uni orqasidan biznes boshlashingiz, eng to'g'ri marketing strategiyalaridan biri hisoblanadi.

Omad!

#xulosa

@maqsadli_mijoz

8000 marketolog!🎉

“Maqsadli mijoz” telegram kanali O’zbekistondagi eng tez o’sayotgan marketing kanallaridan biri desak adashmagan bo’lamiz.

5 oy ichida 8000 mingdan ortiq marketingga qiziqqan insonlar bir joyga jamlanishga ulgurdi.

Katta korxona marketologlaridan to endigina bu sohaga qiziqqanlar uchun 50 dan ortiq blog va audio postlar taqdim qilindi.

Umid qilamiz, joylayotgan kontentlar sizlarga ma’qul kelayabdi.

2025-yilda ham yanada ko’proq ilm ulashishda davom etamiz.

Takliflaringiz bo’lsa izohlarda yozib qoldirishingiz mumkin.

Kanalni kuzatib borayotganingiz uchun tashakkur.

Hurmat ila,
Maqsadli Mijoz Jamoasi.

Jamoamizdagilarni befarqligi tufayli, o’tgan oy bir mijozimiz bizdan qattiq norozi ekanligini bildirdi.

Aybimizni tan oldik va huddi o’sha oy tekinga ish qilib berdik.

Yangi oyga shartnoma imzolagani borsak, “man bozorni o’rganib chiqdim, boshqalar o’rtacha faloncha summaga ishlar ekan, men ham shuncha beraman sizlarga” deb shart qo’yishni boshladi.

U mijozni o’rniga o’zimni qo’yib ko’rdim va u 100% bunday qilishga haqli. Men ham uni o’rnida bo’lganimda shunday qilar edim.

Lekin…

Men u qo’ygan shartga hozir rozi bo’lsam, 2 ta narsa bo’lardi:

1. Uni bunday shartlari ko’payishda davom etadi

2. “Men aytgan narxga rozi bo’lsa demak oldin menga qimmat bergan ekanda?” degan gumonga boradi va yana narxingizni tushirishni so’raydi.

“Uzr, aybimizni yuvish uchun tekinga ish qilib yopib berdik, agar bu ham sizni qoniqtirmagan bo’lsa, hamkorlikni shu yerda to’xtata qolaylik” deb uchrashuvni yakunladik.

Qadrli agentlik rahbarlari, frilanserlar! (bu gap o'zimga ham tegishli)

Avvalo bergan va'dangizni ustida turing. Mabodo inson faktori bilan xato qilsangiz, yuqorida ta'kidlaganimdek tekinga ishlang lekin hech qachon narxingizni tushirish evaziga mijozni ushlab qolishga harakat qilmang!


Qadrli mijoz!

Agentlik/frilanser va siz o'rtangizda HAMKORLIK shartnomasi imzolanadi. Hamkorlikda kimdir kimnidir ustidan rahbar bo'lmaydi. Siz kutgan natija bo'lmasa imkon bering yoki hamkorlikni to'xtating, tamom!

#xulosa

@maqsadli_mijoz

Sun’iy intellekt — marketolog yordamchisi

Yaqinda AI qanday marketologlarning ishini olib qo‘yishi haqida yozgan edim.

Sun’iy intellekt mavzusini yana davom ettiramiz:

O‘zim ham doim takrorlanib turadigan va ma’lumot izlash talab qiladigan vazifalarni asosan AI’ga topshiraman.

Masalan, ChatGPT. U menga:

yangi g‘oyalar izlash;
referenslar topish;
to‘g‘ri prompt'lar ishlab chiqish;
kontent reja tuzish va har xil savollarimga javob olishga yordam beradi.

Hozirda bunday AI vositalari juda ko‘p. Ammo ularning hammasi ham foyda bermaydi.

Ularning har birini tekshirib chiqish — imkonsiz.

Shuning uchun sizlarga bir taklifim bor:

O‘zingiz sinab ko‘rib, foydali deb topgan sun’iy intellektlarni va ularning xususiyatlarini izohlarda yozing.

Men jamoam bilan ularni ko‘rib chiqib, eng yaxshilarini tanlab, har biri haqida post chiqaraman.

Agar siz izohga yozgan AI haqiqatda manfaatli bo‘lsa va uni tanlab olsak, sizga sovg‘a bor.

#marketing_AI

@maqsadli_mijoz

Savdoni qanday oshirsam bo‘ladi?

Har doim bayramga yaqin qolganda aksariyat do‘konlar katta chegirmalar berishadi.

Ammo hamma do‘kon egalari ham mahsulotlarga aksiya e’lon qilishdan avval uni hisoblab ko‘rishmaydi.

Ya’ni chegirmalarni boshlashdan oldin siz o‘rtacha chekingizni bilishingiz kerak.

Uni aniqlaganingizdan keyin savdoni necha foizga oshirmoqchi bo‘lsangiz, o‘rtacha chekni ham shuncha foizga oshirish yo‘llarini ko‘rib chiqasiz.

Balki hisob-kitobdan keyin chegirma berishingizga hojat qolmas.

O‘rtacha chek nima?

⭐️ O‘rtacha chek — har bir xaridor mahsulotlaringizni sotib olish uchun sarflagan pulining o‘rtacha miqdorini o‘lchaydigan ko‘rsatkich.

Qanday hisoblaymiz?

O‘rtacha chek = oylik savdo / mijozlar soni

Masalan: Bir oyda siz 200 ta mijozga umumiy 10 000 000 so‘mlik mahsulot sotdingiz.

Bunda: 10 000 000 / 200  = 50 000 so‘m

Demak, o‘rtacha chek — 50 000 so‘m.

Endi sizga xuddi shu savdoni 5X oshirish vazifasi qo‘yilsa ham qiynalmaysiz.

Chunki endi siz qanday qilib 50 000 000 so‘mlik mahsulot sotish yo‘llarini emas, har bir mijoz bilan 250 000 so‘mlik savdo qilish usullarini izlashni boshlaysiz.

🔔 Post foydali bo‘lsa, marketing sohasidagi do‘stlaringizga ham yuborib qo‘ying.

#marketingformula

@maqsadli_mijoz

“Sun’iy intellekt marketologlarning ishini olib qo‘yadi” deyishadi, shu to‘g‘rimi?

Hech kim kelajakni oldindan 100% bashorat qila olmaydi.

Men faqat o‘z tajribamdan kelib chiqib, taxminimni aytaman.

Javobim: HA va YO‘Q. Hozir tushuntiraman.

HA, sizni ishdan bo‘shatadi. Agar sizning vazifangiz:

• ma’lumotlarni kiritish va rejalashtirish;
• ma’lumotlarni tahlil qilish va qayta ishlash;
• aniq qoidalarga asoslangan qarorlar qabul qilish bo‘lsa, bu vazifalarni AI yordamida bemalol avtomatlashtirish mumkin.

YO‘Q, sizning ishingizni olib qo‘ymaydi. Agar sizda:

• liderlik;
• jamoa bo‘lib ishlash;
• his-tuyg‘ularni tushunish;
• kreativlik va innovatsiya;
• murakkab muammolarni hal qilish;
• tanqidiy fikrlash;
• intuitsiya va moslashuvchanlik;
• chiroyli muomala;
• ishonch uyg‘otish kabi qobiliyatlar bo‘lsa, sizning o‘rningizni robotlar egallab olishi imkonsiz.

Siz qanday fikrdasiz? Javoblaringizni izohlarda qoldiring.

🔔 Post foydali bo‘lsa, uni marketing sohasidagi do‘stlaringizga ham yuborishni unutmang.

#shu_togrimi

@maqsadli_mijoz

Brend obro‘sini qanday o‘lchash mumkin?

Biznes egasidan so‘radim: Nega “Giveaway”da qatnashdingiz? Axir undan sizga foyda yo‘q-ku!

— To‘g‘ri. Lekin Instagramda yuz minglab obunachi bo‘lsa, yangi mijozlar brendga ishonadida.

Ammo potensial xaridor obunachilar soniga emas, brend obro‘siga ko‘proq e’tibor beradi.

Uni esa izoh(comment)larga qarab bilib olishadi.

Siz marketolog sifatida buni o‘lchashingiz mumkin.

Buning uchun BRI’ni hisoblaysiz.

BRI nima?

⭐️ BRI(Brand Reputation Index) — brend haqida ijobiy izohlar qanchaligini o‘lchaydigan ko‘rsatkich.

Qanday hisoblaymiz?

BRI = ( ijobiy izohlar soni / umumiy izohlar soni) x 100

Masalan: Bir oyda sizga 100 ta izoh keldi. Ulardan 60 tasi ijobiy, 30 tasi salbiy va 10 tasi neytral.

Bunda: ( 60 / 100) x 100  = 60%

Demak, BRI — 60%

Agar sizda ushbu ko‘rsatkich 70% va undan yuqori bo‘lsa, demak hammasi joyida.

===

To‘g‘ri, faqatgina ijtimoiy tarmoqdagi izohlardan olingan xulosaning o‘zi yetarli emas. Bu soddalashtirilgan formula.

Bundan tashqari, brendga bo‘lgan ishonch, uning qiymati va mijozlar sodiqlik darajasini ham hisobga olish zarur.

🔔 Post foydali bo‘lsa, marketing sohasidagi do‘stlaringizga ham yuborib qo‘ying.

#marketingformula

@maqsadli_mijoz

Haqiqiy afzalligingizni bilib oling

Ba’zida tadbirkor yoki marketologlarga “Mahsulot/xizmatingizni boshqalardan ustun tomoni nimada?” — degan savolni bersangiz, aniq javobni bilishmaydi.

Yoki mijoz uchun umuman muhim bo‘lmagan ustunliklarni aytishadi.

Shunga qaramasdan ularda doimiy mijozlar bor. Demak, afzallik ham.

Hayotiy keys:

Ipak Yo‘li Bankida navbatda turibman.

Yonimda homilador ayol ham o‘z navbatini kutyapti.

Ammo uning navbati 15 kishidan keyin kelar ekan.

Bank xodimlaridan biri ayolni ko‘rdi-da, darhol unga navbatdan tashqari xizmat ko‘rsatib, muammosini hal qildi.

Demak, bankda to‘g‘ri madaniyat shakllangan.

Mana mijozga bo‘lgan g‘amxo‘rlik. Mana shu haqiqiy marketing.

Agar men shu bank marketologi bo‘lganimda shu jihatimizni chiroyli qilib reklama qilgan bo‘lar edim.

P.S.: Bu reklama emas, shunchaki bu voqea meni to‘lqinlantirib yubordi.

===

Ya’ni: Doimiy xaridorlaringiz bor. Lekin raqobatchilardan haqiqiy ustunligingiz nimadaligini bilmaysizmi? Buni mijozlardan so‘rang.

#xulosa

@maqsadli_mijoz

"SMM menejer hamma sohani zo‘r bilishi shart" deyishadi, shu to‘g‘rimi?

Ba’zida biznes egalari yoki HR mutaxassislar “SMM menejeri” lavozimi uchun e’lon berishganda, universal xodim izlashadi.

Ya’ni, bitta mutaxassisdan: targeting, mobilografiya, kopirayting va grafik dizayn bo‘yicha ko‘nikmalarni talab qilishadi.

Ammo bozorda bularning barchasini mukammal biladigan mutaxassis yo‘q.

Chunki bularning har biri alohida soha. Har birini yaxshilab o‘rganish uchun kamida 1-2 yil vaqt kerak.

Aslida:

SMM jamoada SMM menejer, targetolog, grafik dizayner, kopirayter va mobilograf bo‘lishi zarur.

SMM menejer shu jamoani boshqaradi va undan talab qilinadigan asosiy ko‘nikma:

Nima qilish va uni nega qilish kerakligini aniq bilish.

Misol:

Ijtimoiy tarmoqlarda brend taniqliligini oshirish kerak. SMM mutaxassisi shu maqsadga olib boradigan strategiya va kontent reja tuzadi.

Keyin SMM jamoadagi har bir mutaxassisga aniq vazifa beradi va uni nazorat qiladi.

To‘g‘ri, buning uchun SMM menejer ushbu sohalarni boshlang‘ich darajada bilishi zarur.

Lekin baribir u SMM jamoadagi barcha mutaxassislarning vazifasini bajara olmaydi.

Siz qanday fikrdasiz? Izohlarda yozib qoldiring.

🔔 Post foydali bo‘lsa, uni SMM sohasidagi do‘stlaringizga ham yuborib qo‘ying.

#shu_togrimi

@maqsadli_mijoz

Avval shu nomga mos bo‘lish kerak

- Mahsulotimni qimmatroq sotmoqchiman. Nima qilsam bo‘ladi?

- Brendni nomini yoniga “Premium” so‘zini qo‘shib qo‘y.

Kulguli holat bo‘lishi mumkin.

Lekin hozirda ko‘plab biznes egalari aynan shunday qilishmoqda.

Qayerga qaramang, Premium kiyim/mebel/buyum do‘konlarini ko‘rasiz.

Lekin ularni ichiga kirsangiz, premium sifatni ham servisni ham topa olmaysiz.

Yana mavsum oxirida 50, 70, hattoki 80% gacha chegirmalar ham berishadi.

Aslida, brendingiz chinakam “Premium” bo‘lishi uchun siz eng yuqori sifatdagi mahsulotlar va servis ko‘rsatishingiz hamda har bir mijozni rozi qilishingiz kerak.

Bunday mahsulot xaridorlariga narx eng muhimi emas.

Ular pul evaziga vaqt, energiya, asablarini asrash va tejashni istaydi.

Siz shunday xizmat ko‘rsata olsangiz va bunga xodimlaringiz ham tayyor bo‘lsa, unda sizga omad tilayman.

#kuzatuv

@maqsadli_mijoz

10 yoshli jiyanimga "nisha" nimaligini qanday tushuntirgan bo‘lar edim?

Oldingi safar sen bilan tone of voice haqida gaplashgan edik. Bugun senga "nisha" nimaligini batafsil tushuntirib beraman.

Senga savol: Ingliz tilini mukammal o‘rganib, IELTS imtihonida 7+ ball olmoqchisan. Nima qilasan va qaysi fanni ko‘proq o‘rganasan?

— Faqat ingliz tiliga e’tibor qarataman va unga ko‘proq vaqt sarflayman.

Brend bilan ham xuddi shunday.

Ya’ni, agar sen do‘stlaring orasida ingliz tilini o‘rgatish bo‘yicha eng zo‘ri bo‘lishni istasang, o‘zingga bitta yo‘nalish(nisha) tanlab ol va shuni rivojlantir.

Ammo bozorda universal bo‘lishni xohlasang, ham kuchingni, ham vaqtingni yo‘qotasan.

Barcha yo‘nalishda birinchi raqamli bo‘lish — deyarli imkonsiz.

Lekin sen bitta yo‘nalishda eng yaxshisi bo‘lsang, o‘quvchilaring senga boshqalardan ko‘ra ko‘proq pul to‘lashga ham tayyor bo‘lishadi.

Senga yanada tushunarliroq bo‘lishi uchun sen tanigan aktyor Bryus Lidan iqtibos:

“Men 10 000 ta zarbani biladigan insondan emas, bitta zarbani 10 000 marta mashq qilgan jangchidan qo‘rqaman".

===

Kuchli brend qurish uchun qadamlar ko‘p. Buning uchun sen mijozlarga ham alohida e’tibor berishing kerak. Keyingi suhbatimizda senga mijoz tajribasi haqida aytib beraman.

#soddamarketing

@maqsadli_mijoz

“Reklama yoqildi. Lekin u foyda bermayapti”

Ba’zida Target reklamani ishga tushirganda sahifaga tashriflar kam yoki umuman bo‘lmaydi.

Bunday holatda o‘lchash kerak bo‘lgan ko‘rsatkichlardan biri — CTR

CTR nima?

⭐️ CTR(Click-Through Rate) — reklamani ko‘rib, unga klik bosgan mijozlar foizini hisoblaydigan ko‘rsatkich. Bu ko‘rsatkich qancha yuqori bo‘lsa, reklama samaradorligi ham shuncha baland bo‘ladi.

Qanday hisoblaymiz?

CTR = (Kliklar soni / Reklamani ko‘rishlar soni) x 100

Masalan: Reklama 50 000 marta ko‘rildi. Unga 500 ta klik bosildi.

Bunda: (500 / 50 000) x  100  = 1%

Demak, CTR — 1%

Bu ko‘rsatkich o‘rtacha 0,5% dan 1,5% gacha bo‘lishi mumkin.

===

Qanday yaxshilash mumkin?

• To‘g‘ri maqsadli auditoriyani aniqlang;
• E’tibor tortuvchi vizual kontentdan foydalaning;
• Aniq va mijozlarga ta’sir qiladigan CTA yozing;
• Kreativlarni ko‘proq test qiling va yaxshilang;
• Mahsulot/xizmatning boshqalardan ustun jihatlariga urg‘u bering.

===

📊 Marketolog bilishi zarur bo‘lgan barcha ko‘rsatgichlar haqida quyida o'qishingiz mumkin:

- Bir mijoz narxini qanday qilib hisoblash mumkin?

- Mijozning butun umri davomida kompaniyaga qancha foyda keltirishini qanday hisoblash mumkin?

- Sarmoya qilingan puldan qaytayotgan daromadni qanday o‘lchash mumkin?

- Korxona necha foiz mijozini saqlab qolayotganini qanday o'lchash mumkin?

- Churn Rate: Mijozlarning qanchasi kompaniyani tark etmoqda?

- Tashriflar ko’p, ammo sotuv kammi?

- Mijozingiz sizga sodiqmi?

- Mijozlarning mahsulot/xizmatdan qanchalik qoniqqanini qanday hisoblash mumkin?

- Sayt qay darajada to‘g‘ri ishlab chiqilganini o‘lchash formulasi

🔔 Postlar foydali bo‘lsa, marketing sohasidagi do‘stlaringizga ham yuborib qo‘ying.

#marketingformula

@maqsadli_mijoz

“Hammasi zo‘r bo‘lsin” deyishadi, shu to‘g‘rimi?

Grafik dizaynerga: Zo‘r dizayn tayyorlab bering;
Videografga: Zo‘r video olib, montaj qiling;
Kopirayterga: Zo‘r matn yozib yuboring.

Savol:

“ZO‘R” — siz uchun nima? Uni o‘lchash mumkinmi? Eng muhimi — buni qanday tushunish mumkin?

Hozirgi kunda ba’zi biznes egalari va SMM mutaxassislari vazifalarni shunday berishadi.

Tasavvur qiling:

Shu ko‘rinishda topshiriq berdingiz. U bajarildi. Lekin sizga yoqmadi. Buni mutaxassisga qanday tushuntirasiz?

Ha, balki vazifa haqiqatdan ham noto‘g‘ri bajarilgandir. Ammo vazifa aniq bo‘lmagani uchun mutaxassisga buni tushuntira olmaysiz.

===

Nima qilish kerak?

1. Mutaxassislarga vazifa berganingizda ulardan aniq nima/qanday natija kutayotganingizni batafsil tushuntiring.

2. Topshiriq tushunarliroq bo‘lishi uchun namuna/referens yuboring.

3. Aniq vazifa bermagan bo‘lsangiz, mutaxassislarni ayblamang.

Sizda ham shunday holat bo‘lganmi? Javoblaringizni izohlarda kutaman.

🔔 Post foydali bo‘lsa, uni marketing sohasidagi do‘stlaringizga ham yuborib qo‘ying.

#shu_togrimi

@maqsadli_mijoz

10 yoshli jiyanimga brend tone of voice’si nimaligini qanday tushuntirgan bo‘lar edim?

Oxirgi suhbatimizda senga brend aydentikasi nimaligini o‘rgatgan edim. Bu galgi mavzu tone of voice haqida bo‘ladi.

Har bir insonning o‘ziga xos tashqi ko‘rinishi va xarakteri bor.

Kel, brendni ham odam deb tasavvur qilamiz.

Uning tashqi ko‘rinishi — logotip, dizayn uslub.

Xarakteri — tone of voice

Ya’ni, brend tone of voice’si brendning xarakterini ko‘rsatadi.

===

– Tone of voice(ToV) nima uchun kerak?

Brend tanilishi: o‘ziga xos ToV brendni oson yodda qolishiga sabab bo‘ladi

Farqlanish: U seni boshqa sinfdoshlaring (raqobatchilar) orasida ajratib ko‘rsatadi.

Ishonch: Aniq va doimiy ToV brendga bo‘lgan ishonchni oshiradi.

===

Qanday qilib ToV’ni to‘g‘ri  yaratish mumkin?

- O‘quvchilaring(auditoriya)ni o‘rgan: ularning xohishlari, ehtiyojlari va bir-biri bilan gaplashish uslubini tushunib ol.

- Brendingni inson deb tasavvur qil. U qanday xususiyatlarga ega bo‘lishi kerak? Ularni yoz.

- Aynan sening brendingni ToV’ni ko‘rsatuvchi 3-5 ta so‘zni aniqla.

- Sinab ko‘r va rivojlantir: o‘quvchilarning reaksiyasiga qarab ToV’ni moslashtir.

===

Gaplarimni yaxshiroq tushunishing uchun sen bilgan brendlardan misollar:

Google: "Siz izlayotgan narsani aniq va tezroq topishingizda yordam beramiz."

Nike: ”Boshlash uchun chiroyli bo‘lishing shart emas, ammo chiroyli bo‘lish uchun albatta boshlashing kerak. Just Do It."

Coca-Cola: "Coca-Cola va tabassum bilan baham ko‘ring. Baxt sovitilgan holda dasturxonga tortiladi!"

===

Yodimdan chiqibdi, seni matematika bo‘yicha olimpiadada g‘olib bo‘lganing bilan tabriklayman.

- Endi matematikani ham boshqalarga o‘rgatsam bo‘ladimi?

- Yo‘q, men buni tavsiya qilmayman. Sababini esa keyingi suhbatimizda tushuntirib beraman.

#soddamarketing

@maqsadli_mijoz