أشَــلأگه؟!🎤

تالي لا قريت ولا راح اراسلكم لان جبسي جاي يقرة وامي تضرب بي قهرني ايكلي (اني انسى الكلمة الثانية وامي عبالها الضرب يحل المشكلة) وربي اجيت ابجي عليه😂😂

يعمري انتي تسلمين يروحي❤️❤️

هلاوو🌚

سلامًا لِمزاجي الكلاسيكي الذي يتغنى بالدروب القديمة والرسائل الورقية مع اللحان عتيقة لطيفة، وكُل ما هوَ يدنو من أجواء البُن وبساطة الروح.

أحب شخصيتي الي مو الكل يتقبلها.
أحب العراق بشكل.
أحب اهلي كلهم.
أحب اصدقائي.
أحب اعيش.
أحب اعرف كلشي عن كلشي.
أحب ريحة الرطوبة.
أحب الزرع والخضار.
أحب الانتيكات والفلكلور.
أحب اغني.
أحب ارسم.
أحب اقرة روايات وقصص.
أحب أنحب.
أحب الاهتمام بية.
أحب اختلي بنفسي مرات.
أحب اعيش وية نفسي حالة روحانية دينية محد يعرف بيها.
أحب التراب الموجود ع كتب.
احب مكتبتنا المتواضعة.
أحب بيتنا القديم..
أحب الضحك.
أحب التاريخ.
أحب الفرح.
أحب اشوف ابناء بلدي ايد وحده.
أحب اشوف اسم العراق بين الدول.
أحب تشريب البامية.
أحب الباجة.
أحب الجاي.
أحب اكعد الصبح بس مدا اعيش هالشي.
أحب التزم بجدول يومي بس هم مديصير وياي.
أحب اسمع قصايد.
أحب بغداد لدرجة.
أحب سطحنا.
أحب نخلاتنا.
أحب عاداتنا.
أحب ديني.
أحب روحية شعبي.
أحب متابعيني.
أحب اعيش حياة تستحقني.
أحب المطر.
أحب الصيف.
أحب الشمع.
أحب النار.
أحب محرم.
أحب منطقتي.
أحب اتعرف ع كولشي جديد.
أحب تفكيري واكرهه.
أحب قواعد العشق الاربعون.
أحب نومي البصرة.
أحب الريف والبساتين.
أحب اتناقش بموضوع راقلي وية شخص يروقلي.
أحب الأفلام الاجنبية الحربية والواقعية.
أحب الحب بس اخاف اجربه وما اريد.
أحب اتابع دوريات ومباريات.
أحب اتعارك مع شخص يعجبني.
أحب عصبيتي مرات.
أحب عيوني.
أحب روحي المملوحه.
أحب ازور مناطق ترفيهية.
أحب الزيارات للأئمة اتعيشني اجواء روحانية.
أحب القربة.
أحب التربة.
أحب الورد.
أحب الأجاص.
أحب النبك.
أحب سوريا.
أحب الانبار والبصرة.
أحب العجايز الكبار.
أحب السمج
أحب الزلم الكبار الي يلبسون عكال.
أحب البخور بألاخص العرب.
أحب العطور والمسك والعنبر.
أحب اضحك الي حوليه رغم حزني مرات.
أحب اكعد مكان واسع ومابي حقن او جو غثيث.
أحب الي يضوجون مني حيييل والله.
أحب الاجواء الشاعرية.
أحب اكتب.
أحب اتعلل العصر وية استكان جاي وكعك.
أحب الفراشات.
أحب العصافير.
أحب العاب الملاهي.
أحب الي يعترفون بغلطهم.
أحب الأغاني القديمة كوومة.
أحب الي يحبني.
أحب صحراء.
أحب البحار.
أحب الحدائق.
أحب الادب.
أحب الكُتاب.
أحب مدرستي.
أحب شارع ابو نؤاس.
أحب درابين الكاظمية.
أحب كل جسر يربط بين الكرخ والرصافة.
أحب الكرخ.
أحب المناسبات.
أحب اتسوق.
أحب الشناشيل.
أحب قصص اهلنا القديمة.
أحب بشوات بغداد القديمين.
أحب ال جا و ال دا.
أحب ال دحك.
أحب الاطفال.
أحب الدوام اليومي.
أحب الموشحات.
أحب أني يمكن ما متأكدة
أحب الي راح يكمل هالرسالة للأخير.
أحب ربي و نبيي و الائمة.

هلاوووووو
رجعنة من جديد بفقرة عراقية...
اليوم الفقرة عن عادات وتقاليد متعارف عنها ببعض او كل مناطق العراق...
بعضها حلو كـ صفة للمنطقة والبعض الاخر محلو او ماله داعي المهم هي هاي عادات حبيت اذكرها هنا🥲.
نبدي من الولادة🌚😂.
الطفل من ينولد بالعراق يسمو انفاس هو و امه هنا تتركز عدنه بعض العادات مثل انو يخلون سكين(سجينه صغيرة) تحت وسادة الطفل وامه لانو بنظرهم يكون الطفل وامه متعرضين للأذى بصور مختلفة بفترة الانفاس الي متتجاوز الأربعين يوم
الكُحل للطفل يخلون كحل لعين وحاحب الطفل حتى توضح ملامحه ويثخن شعر حاجبه🌚🌚
ووو هاي السالفة ما ادري اذا بس يمنه لو انتم هم عدكم وهي اول مينولد الطفل الشخص الموجود واكثر شي الجدات الكبار يسون رصعات للطفل(غمازة، نونه) شلوووووووووون يخلون وجه وخدود الطفل بين اصابعهم الابهام والسباب يعني تقريباً 👌👌هيج بس بوجه الطفل وتحديداً الاصابع ع خدود الطفل مكان الغمازة
وبعد بعد كووووم عادات ع انفاس والطفل.
"ميصلح"
ميصلح تسبح او اتغني او اتنام او اتنضف او تكعد بعتبة الباب المغررب لييييييييييش لانو اتكولون انو المغرب تتجمع الشياطين بالحمام هاي بالنسبة للسبح(الاستحمام) بس الباقي ما ادري ليش🥲
من العادات الي حبيتها وما اعرف ليش هي
-ميصير تنطي استكان الجاي ☕️ما مليان (مملوء) يعني يكون ناقص الجاي عيب ليش ما ادري
-ميصير تقدم استكان الجاي☕️ والخاشوكة مال جاي داخلة لازم اتكون الخاشوكة ع ماعون الجاي لانو هاي الحركة تعتبر طردة🌚
-ميصير تكنس او تنظف بوجود خطار او شخص جبير بالمكان لان تعتبر طردة وهنا خلي اسولفلكم هاي السالفة( فديوم اجتنة عمتي وهي وجهالها المهم هي جانت اتصلي بالاستقبال وراحت اختي تكنس الهول ف بنت عمتي الصغيرة عمرها ٥ سنين مو لساان ضيم اني اسميها خاجية المهم خزرت اختي الي هي جانت صف سادس اعدادي اتكلها متستحين تكنسين كبال امي امهاا جانت اتصلي ضحكت ع بنتها المهم من وكتها عرفنا هالشي عيب😅😅).
-وووووووواكثر سالفة راقتلي هي من يجيكم خطار ويكعدون وانت تبدي واتكلة مساكم الله بالخير هنا اذا جاوبك ب ساكم الله بالخير يعني ممتغدي او ممتعشي وهنا انت بسكوت تااااام اتكوم اتحضر الاكل اما اذا جاوبك ب مساكم الله بالخير والعافية او النور حسب ما اعرف المهم ف معناها متغدي او متعشي حسب الوقت ولله الحمد.
-و سالفة الكرم كولنه نعرف العزوبية شلونها بالعراق حتى لو ما كان بألاكل الكثير او المتنوع والغالي مرات عزوبيتنا بكلمة او بترحيب المهم من العادات الي احبها سالفة الماعون ميرجع فارغ يعني اذا ودينا لجيرانه شوربة يرجعونة بي تبسبي ميصير يرجع فارغ(فديت هاي السوالف المعدلة عمي اهم شي الاكل اصلا الشي الوحيد الي ميتعوض لو راح هم الجيران الي يدزون اكل يااابَ شكد احبهم🥲❤️)
وعادات الأحلام ميصير اتسولف الحلم حتى يتحقق اذا كان حلو وسوالف الحلم بالحمام اذا كان محلو😜
سالفة الامراض الله يجيركم منها:
-اذا التهبت اذنك خليلها فص ثوم🧄
هي صحيح الريحة توصل للمحمودية بس ترة جديات اتفيد اسأل مجرب🌚
-سالفة انكرصت روح اشطفها بمي وصلِ ع نبي.
-اذا عدكم طفل بالبيت يكرط سنونة شنو يكرط اسنانه(يعني يضل يحرك اسنانه ويطلع صوت، يعني شلون من يقرط مصقول بس هنا بدون مسقول هو وحده يكرط) فَــ العلاج بهذا ولا تنصدمووون ايي استعدوووو للعلاج هووووووووووووووووووووووو يضربو بنعال ع حلكة ٣ مرات😂😂😂 يمة متت. خل افهمكم السالفة شنو من تجي تضرب الطفل يتكسرن اسنانه وميكوم يكرط ف هم عبالهم هو بطل يكرط😂😂😂. لا شقة بس انو هذا علاج يستعملو لهيج سوالف. لاتنصدمون..
وهسة سوالف العرس هن هواي بس راح اختصرها بسالفة الجبسة وما ادري اذا صح او غلط انو العروس اذا زارت عرس غيرها قبل زواجها او بعد زواجها بأيأم فهي راح تنجبس يعني متخلف( اني متأكدة هسة اكو بيكم كتاكيت عبالة الجبس انو تنحط بنايلون ويحنطوها او يسونها طرشي😂😂 متضحك ادري😅).
وهسة محرم وكولنه نعرف عاداته الحزن مو بس عند الشيعة اكو هواي من غير طوائف يحزنون مثلنه او يحترمون حزنا المهم عدنا بليلة الوحشة وهي ١١ محرم انشغل شموع(وهاي السالفة راح اشرحها بأخر جزء من الفقرة). وبيوم العاشر الصبح تنكلب الجدورة( تقلب القدور رأساً على عقب) ويفضل بعض العجايز والناس الجبيرة بالبيت البركة انو يحزنون بهذا اليوم لحد النخاع لدرجة ميخلون اي شخص بالبيت يغسل وجهه حتى، ويمنع الطبخ والتنظيف بهيج يوم عظيم.
_عدنا عادات للوفاة او من يموت شخص لاسامح الله هم اكثر من شي بس راح اذكر سالفة الشمع.
من يتوفاة شخص بالبيت يشعلون اله شمعة من المغرب مدري قبل المغرب لحد متتطفى وحدهة واكو الى جانب الشمعة يخلون كلاص مي وهاي العادة تستعمل بأول ٣ ايام للميت لان يكولون الميت يحوم ع بيت او المكان المات بي.
🧿🧿
بيدت وياكم من الولادة ونعومة اضافركم لحد ما موتتكم بأخر فقرة اسم الله عليكم😂😂
@ASHLAKA

عاجبني اسوي فقرة عراقية شباب 🧿🧿

قَتلوا ألصَلاة في مِحرابها .

ضَللتُ أكَتبُ و أمَسحُ ما أكَتبُ وهَكذا طَوالِ الليلَ لَعليّ أجدُ كَلماتٍ تَصفُ هَذا أليومَ ألذي قُتلَ فِيهِ شَخصٍ قَبلَ مِئاتَ السِنينَ لازالتّ أمةٌ مُحمدٍ(ص) تَحَزنُ لِموتهِ لإنهم يَعونَ جَيداً عَظمةَ هذا العليّ ألذي لولاه لما كانَ للأسلامِ أسِتمرارٌ في ألارضِ لو لا أستشهادهِ لأصَبحَتَ ألحياةَ ليستْ كمَا هي ألآن لأمْسى ألإسلامُ إسلاماً والحياةَُ سَلام.