غزل

زړګی مې په یو چا پسې بیمار دی او ښه نه دی
او ستړی دی، خفه دی او نهار دی او ښه نه دی

غروب سلګو نیولی وو ماښام ټپي ټپي دی
شپه تېره په زګېروو یې ده سهار دی او ښه نه دی

راځئ یو بغاوت وکړو هر کس مشال ته لاس کړئ
دا شیخ مو په شپه خوښ په انتظار دی او ښه نه دی

ادکې! د چاپې نه روغ وتلی خو ټپي دی
لالا د پورې ژۍ شاته ایسار دی او ښه نه دی

یارانو سترګې وغړوئ! لور مو خطا کړی
ماښام دی او د چُچو سترګو ښکار دی او ښه نه دی

لږ فکر مو ژور کړئ! او ژوند واخلئ له اجله
دا پنډ د ارمانونو په ژوند بار دی او ښه نه دی

سالاره! دا اغزي کالي د ننګ څیري کوي دې!
پښتو ته دې خور شوی اغزن تار دی او ښه نه دی

شاتګ مو دی په سپینه ورځ د کونډو هیلو قتل
بس دومره درته وایم چې ازار دی او ښه نه دی

که څوک د خالد شعر کې ځان ګوري او خفه وي
دا کار هسې د بل په کار کې کار دی او ښه نه دی

خالد خراساني
#دادب_غمي
@Adabi_Ghami