نعي للإمام الكاظم "ع"



يا مَطول الليل ابسمه الما يعرف النوم
يترقّب اخيوط الفجر وايعد النجوم
ابهالحاله شيعتكم صفت يا طيب العلوم
دنيانه ليل ابغيبتك يا فجر الامال

•••••••••

مدة غيابك لا شهر لا سنه وسنتين
بعدك ذبل هرش الگلب وانجسم نصين
ابلا روح ظل خالي الجسد من شدة البين
الروح يمك هالصفت يا فخر الرجال

•••••••••

ابهالحاله ظلت شيعتك وابجفن ما هاد
وما بين نيران البعد بسجون الاوغاد
طارش لفه وناده الغريب ابسجن بغداد
بالجمعه موعد طلعته واستبشر الحال

•••••••••

اتعنّت قوافل شيعتك يا صاحب الجود
الجسر الرصافه اعله الوعد تترقّب اتعود
لن من بُعد لاحت سواده الذيچ الحشود
من گرّبت لن شافتك بحجور الآجال

•••••••••

انهدّت عواميد المجد واتكدّر الكون
حين الطحت يبن الغريب ابسجن هارون
شيعتك بعدك سيدي دم تجري العيون
وانخسفت انجوم السمه واهتزّت اجبال

•••••••••

اسهام الظلم يا بو الرضا حلّت بالصدور
كل يوم زينب تنسبي .. كل يوم عاشور
يا يوم سلطان العصر غايبكم ايثور
وتنخسف هامات الظلم لو هل الهلال

•••••••••

✍ بقلم الشاعر ✍
أحمد هادي الشمري