#السـلام_على_فخر_المخدرات_زينب



زينب .. ماتت .. عباس ما تحضر يكافلها


هاي الأميرة الچان نبضك .. حچيها
وعينك ابد متنام .. الّا اعله اديها
هاي الأسيرة الچان شمر ايحدِيها
الراح الإجه الشَمَّات .. ينظر عليها

زينب .. ماتت .. عباس ما تحضر يكافلها

•••••••••

مو هسه ماتت لا .. يالتدري يمته
من چفك المگطوع طاحت جربته
مو اسهل من الموت درب المشته
ماتت سبع مرات ساعة عَثِرْته

زينب .. ماتت .. عباس ما تحضر يكافلها

•••••••••


ابدرب الوعِر .. والنوگ عرجه اتعثّر
وللكوفه والشامات حاديها سدّر
لو عالغري تندار .. يشتم بحيدر
ولو يا كفيلي اتصيح .. تِسمَع (تِوذَّر)

زينب .. ماتت .. عباس ما تحضر يكافلها

•••••••••


اباب الگبر والعين مدمعها ينصب
بكل دمعه يا عباس شو ناسي زينب ؟
صاحت (الشام الشام) وخدري التسلّب
سهله الگبر وايزيد ديوانه الأصعب

زينب .. ماتت .. عباس ما تحضر يكافلها

•••••••••

هبّت رياح الشام .. طفّت شمعتي
ومن عيني نزلت روح .. لا مو دمعتي
يمي وإذا تندار .. چانت غربتي
ايبعدوني عنك ليش حتى بدفنتي ؟

زينب .. ماتت .. عباس ما تحضر يكافلها

•••••••••

شحچيلك اعله الحال .. وآنه أدري تدري
حتى الهوه ابليّاك يخنگلي صدري
شام البله والموت فرْهِدن عمري
كل سهم بالدلال مِطلاعه ظهري

زينب .. ماتت .. عباس ما تحضر يكافلها

•••••••••

آخر طلب .. عباس بالخوه احلفك
وآنه ادري تنطي اچفوف لو يوم اكلفك
غير انت ساگي الماي .. وفّاي اعرفك
عباس اريد الموت وآنه اعله چفك

زينب .. ماتت .. عباس ما تحضر يكافلها

•••••••••

للشاعر
#احمد_هادي_الشمري

https://t.me/Ahmedhadi86

ملاحظة: القصيدة كُتِبَتْ على لحن قصيدة (دهري.. ذبني.. عبد الله يا شمعة ضوة عيوني)..