للشباب

يا شباب ابيا گبر عنوانكم
رحتو يمه من قبل ميحانكم

گبر صارلكم حضن
والنواضر غمضن

يا شباب ابيا گبر عنوانكم

((🔅🔅⚜️🔅🔅))

يمه يالشبان غمضتو العيون

خيبيتو ليش كل ذيج الضنون

روحت اوداعيه لو ليه تجون

رحتو من ايدي بعد
ما اجيتو عالوعد

القوط عفتوها ولبستو جفانكم
يا شباب ابيا گبر عنوانكم

((🔅🔅⚜️🔅🔅))

گتلي تانيني ارد او ناطرت

ليش من امك ييمه اتعذرت

بلا وداع شلون لمن سافرت

ليش عني هاجرت
وابجفاك اتحيرت

وانگطع عني ييمه اوصالكم
يا شباب ابيا گبر عنوانكم

((🔅🔅⚜️🔅🔅))

يمه لو تنضر الحالي من مشيت

سبعه من اضلوعي يوليدي حنيت

جيت يم گبرك يروحي وعاتبيت

ما گلت ابقه انتضر
ااه يا تعب العمر

عمت عين الزمن يبني الخانكم
يا شباب ابيا گبر عنوانكم

((🔅🔅⚜️🔅🔅))

عمت عيني عليك بترابك تنام

وانه من ابعيد او ديلك سلام

باعدت بيني او بينك هالايام

رحت بسهام الغدر
يبني يا شبه البدر

غفل عنه الموت يوم الباگكم
يا شباب ابيا گبر عنوانكم

((🔅🔅⚜️🔅🔅))

غفل يمه اتفرهدت من ايدي

اوعني ضماك الگبر يوليدي

انباگ من عندي الفرح ياعيدي

يالعفت امك تنوح
والگلب خزن جروح

بالمگابر يالشباب اشحالكم
يا شباب ابيا گبر عنوانكم

((🔅🔅⚜️🔅🔅))

تـــمـ بعون الله تعالى ـــت
بقـــ✍ـــلم خادمت اهل
البيت ع
ام سجاد العسكري من ذي قار
لانجيز حذف الاسماء
🙏🏻🙏🏻نسالكم الدعاء🙏🏻🙏🏻

https://t.me/Alaqela313