الشاعر محمد الجماسي

الشاعر محمد الجماسي:
صبرآ جميل شفت القليل
يالصادق امن الغاضريه
ــــــــــــــــــــــــ
طبت النــار المنـزلك . . . واتذكـرت نار الخيمه
عندك حرم يتصارخـــن . . . بس مابقن بالهيمـه
نارك يبو الكاظم طفت . . . طفوهه اهل الشيمه
وسكنه ورقيه ابكربلـه . . . يتوسلن بـــالـغيـمـه

عندك بنات صح خايفات
بس مامشن وي ال اميــه
ــــــــــــــــــــــــ
نســـوانك ابيتك بچن . . . ماينسمع بمچاهـن
عالاقل يالكلك ستـــر . . . انته الچنت ترعاهن
بچفوفهن محــد يمـر . . . والحبل ماجراهــــن
ونسوان الاحسين ابغرب . . . سوط الشمر اذاهن

يشتم يعيل السانه طويل
وسلب تراچي مـــن رقيـــه
ــــــــــــــــــــــــ
ذبيت الاعمامه اشعجب . . . يمكن ذكرتك احسينك
امن احرورة النار أسالك . . . هـــــم طگگن رجلينك
سمـــوك بس مو عالنهر . . . طاحــت النبله ابعينك
سبلو إيـــــدك للسفـــر . . . مــاگـطـعـــو چفينــك

لابس رداء بس كربلاء
سلبت إثياب ابن الزچـــيه
ــــــــــــــــــــــــ
من حجره نسوانك تفر . . . گالو الثاني حجـــره
بس ماوگع منهن ستر . . . كل وحده چانت حره
مولاي هم عدك طفــل . . . لازگ السوط ابظهره
عبد الله كاروكه احترگ . . . اوصخم ادين الزهره

هذا الكلام گاله الامام
بالناحيه ايـــذكـــره البقيه
ــــــــــــــــــــــــ
طبو اصحابك سيدي . . . للمنزل وبعــض النـاس
شافوك غارگ بالحـزن . . . مــن الجدم حد الــراس
واسوك لاچن عمتــك . . . واساهه سوط الارجاس
كل ضربه تصرخ ياعلي . . . وكل عثره ها ياعباس

امصابك يهون خله العيون
يعمن على الراحـــت سبيــه
ــــــــــــــــــــــــ
يالصادق واصدق عشگ . . . لــو يرتبــط بالمنبــر
وانته بسجودك سيــدي . . . تدعي ابدعاء المضطر
ارحم وجوه اتغيــــرت . . . ياربي من گــــد الحــر
وكــــولـنـا زينــا فخر . . . يعني المعلــم جعفـــر

وصوت الجميع لارض البقيع
ومشتاگه روحــــي أهـالمسيه

#العبدالحسيني_محمدالجماسي

خلي دارك تحترك ميخالف
وخلي كلبك عالفواطم خايف
....
تدخل الدهليز نيران الكفر
وخل بناتك تنجوي بحر الجمر
المهم ماشايفهن ايركضن شمر
وانته بالضلمه حرم ماعايف
....
حتى لوعندك طفل هسه انولد
يخنك أنفاسه الدخان الصعد
اذكر الريجه يفور ومابرد
وابركبته السهم مدري شخاسف
....
ابيتك ايركضن بناتك اي نعم
مو فرس تايه وراهن لاسهم
اتحجبن عماتك ابوصلة خيم
والشمر يحرك عبيهن حالف
....
خل تلوح النار طرف اعبايتك
المهم ماصبغوهه بالدم شيبتك
ادري هاي الدمعه تجري العمتك
وتعرف بكلشي رغم ماشايف
.....
أحمد الله الخيل ماحضرت أمس
جان ضلت ترفس ابابك رفس
أنته جوه السكف مو جوه الشمس
واعتذرلك عن جرأتي واسف
.....
سيدي الصادق تره ايهون البله
الماتهون الصارت بطف كربله
زينب وزين العباد ابسلسله
والحبل جف الفواطم جاتف
.....
سيدي الصادق سلام ابعث الك
وانته صادق ماترجع سائلك
وين بابن العسكري دار الفلك
ابياسنه ويوم الضهور ايصادف
....

محمد الجماسي

عظم الله لنا ولكم الاجر بأستشهاد سيد الشهداء عم رسول الله الحمزة بن عبد المطلب

أنا على دين النبي
.....

آني قبل الكعبه كعبه بداخلي
آني حمزه وبالحرب اشبه علي
آنه من طگيت خد الجاهلي

يعني حُسيني مذهبي
أنا على دين النبي

....
أبعصرة الزهراء لو حاضر چنت
چان من حيدر أمامي أستاذنت
وچـا فنيت الكــون كله وزلزلت

أَنه عدو للناصبي
أنا على دين النبي
.....
آمنت بالله ماعابد صنم
گبل يوم الطف افكر بالخيم
آنه گبل احسين ضربوني إبسهم

يشهد التل الزيني
أنا على دين النبي
.....
آنه لو موجود في هذا العصر
للامام المهدي چا صرت الخضر
الجية المحبوب أتاني وأَنتضر

ياربي حقق مطلبي
أنا على دين النبي
.....
آنه بالغابه بالغابه يسموني السبع
ابصـــدري شايل يامحمد مو درع
ربعي آل البيت ماعندي ربع

فداهم أمي وأبي
أنا على دين النب
....
آنه سويت الرسول الله الحشد
گاطع اجذور النواصب مو ورد
مايهم خل تاكل إبچبدي هند

بالجنه نصبو موكبي
أنا على دين النبي


محمد الجماسي

تدري ليش..اكبور البقيع امهدمه
تدري ليش..مضموم مرقد فاطمه
هو الله ضمهن للامام.. يبني مقام بصف مقام
.....
ماينبن..الابحضور ابن الحسن
الكبه راس احسين والمرقد ضعن
واجفوف أبو فاضل مناير لو ضون
وابكد قياس اعمامته أيسوي الصحن

وينفتح..خط اعله طول السلسلة
ينفتح..من البقيع الكربله
وبشكل خارطة الخيام.. يبني مقام بصف مقام
....
اهواي الحجو واتدخلو بالمسألة
وكبر الحسن طابوكه وحده ماعله
السجاد هم ردو لديه السلسله
والباقر الهاليوم عايش كربله

بالبقيع.. صادقهم ايحس ابغرب
بالبقيع.. جا يمته ابوصالح يطب
وينطي اولويه للحمام. يبني مقام ابصف مقام
...
ياسائلا عن مرقد الزهره اشعجب
لليوم مخفي وعن الاعيون انحجب
راح انه اكلك بالحقيقه وبالسبب
ماينطي الله الذهب بس لهل الذهب

الله راد.. المهدي يسوّي المحكمه
الله راد.. من اللي ضلمو فاطمه
وبعدين اذا زال الضلام.. يبني مقام ابصف مقام
.....
قبه مقابل قبه يرتفعن صرح
وابنصهن الزهره مثل وجه الصبح
تنحسب رأس القبه والمرقد رمح
وتنكتب اية قل اعوذو أمن الذبح

وماكو نار.. اليشعل النار انحاسبه
ماكو نار.. بس ابمضيف المجتبه
والمهدي بالحب والغرام.. يبني مقام ابصف مقام
....
ومرقد بعد لام البنين الطاهره
هم ينبني ابصورة جفوف امبتره
ويحفر نهر يمه ويشيد كنطره
تستاهل ام الملكه زوجة حيدره

عدهه باب.. يقضي الحوائج للمله
عدهه باب.. يمكن ابكد البسمله
وشباجهه اشكد بي كلام.. ويبني مقام ابصف مقام
....
المهدي بحنانه واشتياقه ورحمته
ماينسه صاحب علي وينسه عشرته
عثمان ابن مضعون يبني حضرته
ايسويهه انصه أمن الائمه كبته

ومن يصير..يوم البقيع العالمي
من يصير..ايسوي العزاء الفاطمي
والناس تلكاهه ازدحام..يبني مقام ابصف مقام

الشاعر محمد الجماسي

أيُّها الباكي تعـالَ ابكي مَعي
كَي نواسِيهم بفرطِ الأدمُعي

....

نحنُ لا نبكي لهدم القبةِ
إنما نبكي لهتكِ الحـرمةِ
وقلـوباً حُرقت كالخيمةِ
قامَ بالفعل الدعيُ أبنُ الدعي

.....
إننا نبــكــي لأربـاب النُـهى
لاضريحٌ طاحَ أو قبرٌ هواى
إنهم كـــانوا سمـاواتٌ عُلا
ثُم لا زالــو بـذاكَ المــوضعي

....
أيُها الباكي عزانا قــائمُ
قائمٌ حتى ظهور القائمُ
لعنةُ الله على من هـدّمُ
وسعو بالسوء يابئسَ السعي
...
نلطمُ الرأس كلطم الوالهين
أنهُ يــومٌ عــلـى الآل حزين
أربعٌ قــد جــاورو أم البنين
أمُ عــبــاسٍ قطيعي الاذرعــي

.....
يابقيعُ الحــزن صـبــراً إنما
لا يدوم الظلم قولً مُحكما
وسيعلو شـأنك علـو السما
فاصبري يا أرضُ لا لاتجزعي

.....

فـاطــمـــيـون القضيه إننا
وأبونا رأســه فـــوقَ القـنا
عجل الله النصر ياحشدنا
بقيادة آية الله مــرجــعـي

.....

فغداً كــلَ الطُغـاةِ يرحـلــون
حكمهم زائل وهم لايعلمــون
فلننادي يابقيـع الصــابــرون
ذهــبَ الظلــم الينا فــارجــعي


#العبدالحسيني_محمدالجماسي

إمسافرين بلا جواز وبيــدكـم بس الشمع
رايحين وكـل شهيد بصورته إتراب ودمع
عند الحُسين الملتقه
منكـم ولا واحــد بقه
إمسافرين
ــــــــــــــــــــــــــــــــــــــ
بيـــكــم الـــقـــاسـم زرع تـربيته
والجندي دمه إيطيح وي بيـريته
كسـر ظهر امه وطــلــع مـن بيته
وأشــتره إحسين ومشه بحريته

مايموت البي علي گلناهه الكم يالحـشـد
مانزفكم بالدمـوع إنزفـكـم إبهيل او رود
عند الحُسين الملتقه
منكم ولا واحــد بقه
أمسافرين
ــــــــــــــــــــــــــــــــــــــ
رمله صــاحــت ياربيع أيامـي
عرس الأمبارك عرس جسامي
وأمكــم تگلهـه نسيـت ألآمــي
وبأسمچ الليله أشـد أحــزامي

ما أنــوح إعله الفگــدته نوحي لولـيــدچ تره
خل يروح أوليدي فدوه وخل يظل بالمگبره
عند الحُسين الملتقه
منكم ولا واحــد بقه
أمسافرين
ــــــــــــــــــــــــــــــــــــــ
الكـــون اظلم يلي چنتو أنجومه
والعليكـم مـــات أبــد ما لـــومــه
الساتر الطف واهيَّ نفس الحومه
وما رجعتو الفرحـه ما مقســومه

مو عـزاء لازم يصير ابيومكم زفـــة عــرس
والظلام اشما يطول أوجوهكم تطلع شمس
عند الحُسين الملتقه
منكم ولا واحــد بقه
أمسافرين
ــــــــــــــــــــــــــــــــــــــ
الكـل شهيد الاي يجي بتابــوته
گلبي شمعه ويبچي دم بسكوته
أتموت كــل يوميه أمكــم موته
چنهه تمــثــال وبقت منحــوته

ياشبـاب أمـكـم تـــنـــادي منو إيــزت إجنـازتي
إمن الونين انكسر ضهري وطلع شيب ابشيلتي
عند الحُسين الملتقه
منكم ولا واحــد بقه
أمسافرين
ــــــــــــــــــــــــــــــــــــــ
أمكـم أتهلهل أبثـغــر البـــاسـم
إتأست إبـام الشهـيــد القـاســم
أتگـول ماغير الله يبقـه الدايـم
وبلكت أبني من جنــود القـائم

مايضيع أجر التضحي للحُسين بكــل ثمن
وبالدموع إحنه كتبنه عالجنازه وعالچفن
عند الحُسين الملتقه
منكم ولا واحــد بقه
أمسافرين
ــــــــــــــــــــــــــــــــــــــ
للنـجـــف واحــد يـــزت الثـاني
رحتـو من عيني ســوه يخواني
فــرش خـاچيته علــي ويتــاني
وواگف إبصفه علي السيستاني

أنتصــار الليله عــدنه لـكــن إبهيئة لطم
ياشباب إنتم جـرحنه والحزن ماينكظم
عند الحُسين الملتقه
منكم ولا واحــد بقه
أمسافرين


#العبدالحسيني_محمدالجماسي

حان آذان الحُزِن وآ زينبا
گومي صلي ثم إجهشي بالبكا
ــــــــــــــــــــــــــــــــــــــ
اللهُ اكبر صيحي آخ امن الگلب
أشهدُ ان علي دمه يصب
أشهدُ ان العزاء لو ينصب
تلطم إويانه ملائكة السماء
ــــــــــــــــــــــــــــــــــــــ
أشهدُ ان محمد لو عدل
چان ذب اعمامته ودمعه يهل
والله لو وجه إبوجه ما ينقتل
علي مات بسيف اشقه الاشقياء
ــــــــــــــــــــــــــــــــــــــ
حيَّ عالعباس يعني عالصلاة
ابو اچفوف التنگطع يم الفرات
راح حيدر ذاك سبع الكائنات
وإجه سبع الزلم ساقي كربلاء
ــــــــــــــــــــــــــــــــــــــ
اتوضي بالجربه واسجدي عالعلم
وانوي ياستار من حرگ الخيم
واقري سورة كربلاء وسبي الحرم
وسلمي امرج الى راعي الوفاء
ــــــــــــــــــــــــــــــــــــــ
خلف الإجنازه يلبون البشر
وأنتي تلبيتج علي اليوم انطبر
ظهر اخوج احسين مرتين انكسر
مره بالكوفه وكسر في نيوى
ــــــــــــــــــــــــــــــــــــــ
لبسي ثوب الاسود آسف ما أگول
وإنتي حزنچ من عهد فقد الرسول
علي مات وماتت الزهره البتول
والحسن ناده لقد حان العزاء
ــــــــــــــــــــــــــــــــــــــ
حافيه ترگضين خَلف إجنازته
شايله إبچفچ التربه وسبحته
آخ يازينب غميجه طبرته
مايرد هيهات سابح بالدماء

محمد الجماسي

ياملك النور هاليله إنزور
أمينُ الله أمينُ الله أمينُ الله علي

ــــــــــــــــــــــــــــــــــــــ

الليله تاخذنه الزياره .. للمناره .. الحيدريه
علي أرواح التحبه .. إتعوفه صعبه .. يالمنيه
علي حي ميّت يزوره ..إيشم عطوره ..النرجسيه
گبره للغيم إرتفاعه .. وبشُعاعه .. جاذبيه

راسه مطبور بيه اشگد نور
عظيم الجـاه عظيم الجاه أمينُ الله علي

ـــــــــــــــــــــــــــــــــــــ

علي من نحضن ترابه .. أنگلّه بابا .. بلهجة الحب
علي أكثر من أبونه .. ومن عيونه .. نظره نطلب
حوله تلتم اليتامه .. وللقيامه .. المدمع إيصب
علي گاعد بالمشاعر .. وعالمنابر .. صوته يخطب

حيدر ما مات لا يالشمّات
فرض ذكراه فرض ذكراه أمينُ الله علي

ــــــــــــــــــــــــــــــــــــــ

علي بستان المحنّه .. گلبه جنّه .. وروحه طيبه
علي خبزه إبچف يتامه..وچم حمامه.. اللي تحبه
إبنيته بس صوم وعباده..وعالشهاده..يناجي ربه
كل مقاماته چبيره .. وماكو غيره .. إلنّه كعبه

بتاريخه انشوف مو بس احروف
سور نقراه سور نقراه أمينُ الله علي

ــــــــــــــــــــــــــــــــــــــ

حيدر البكُاءُ ليلاً .. عايش اصلاً .. بالمساجد
بالحرب يضحك فقاره..وبالصداره..إنشوفه قائد
إننا عشاقُ حيدر .. دومه يحضر .. بالشدايد
قل هو الله الأمرنه .. وافتخرنه .. بهالعقائد

وبكل آذان نشهد للآن
علي مولاه علي مولاه أمينُ الله علي

ــــــــــــــــــــــــــــــــــــــ

علي يالروحك رقيقه .. بس دقيقه .. لاتسافر
أرد أبوسك من طبرتك .. آنه بنتك .. گلبي حاير
آنه زينب يابو زينب .. دمعي شيّب .. بالنواضر
الموته فزو من ونيني..وتبقه عيني..إعله المگابر

راسك مطبور يشبه عاشور
واصيحن آه واصيحن آه أمينُ الله علي

ــــــــــــــــــــــــــــــــــــــ

علي گاللهه ابحنانه .. مو لسانه .. اللي تكلّم
خلفتلج مثلي واحد .. بالشدايد .. غيِره يلتم
هذا أبو فاضل كفيلج .. وابسبيلچ .. يفدي الدم
توجع الدنيه سطرته .. وبجربته .. يجري زمزم

نعم الإحساس من العباس
جبل معناه جبل معناه أمينُ الله علي


#العبدالحسيني_محمدالجماسي