نزله الى الامام العباس

مشتاكه الانفاس..الحضرت العباس

مشتاكه الحضرته روحي
هوا بلسم اجروحي
احبه حيل واتمنه
اموت اني ابخدمته

امشيله ابقه كل عمري
ماخذ عهد من صغري
ابو فاضل فلا عوفه
دوم امشي الحضرته

دوم امشي يا ناس..الحضرت العباس

جيت انه امدمعي وعطفي
رايه شايل ابجفي
ادعي كل سنه الربي
اضل امشيله اني


محبوبي نوره ضواني
فوك السمه خلاني
علمني اصير انسان
من كلشي حواني

ماوصف الحساس...الحضرت العباس


انفاسي اشتاكت العطره
ودلالي خلص صبره
واحس الروح قد جفت
اشوكت اوصل وزوره

يرويني الكافل ابحبه
فدوا رحت انه الكلبه
بدونه ضلمه ايامي
يضويها ابحضوره

حبي مينقاس..الحضرت العباس

شيابه تمشي لهفانه
خطوه خطوه ويانه
يكلي الاخر أنفاسي
اضل امشي الحبيبي

فوكاها يمشي عَل عصه
ويكلي المشي فرصه
عليل ايكلي يل زاير
وأبوا فاضل طبيبي

حبه عله الراس..الحضرت العباس

ما فكر دوم انه ابحيلي
ادري الزهره تدعيلي
جدمي تعبت ارتاحت
متمس اهتمامي

والمهدي شفته عل فطره
يمشي ويانه للحضره
شايل دفتر ابيده
يسجلها الاسامي

نبقه اي حراس..الحضرت العباس

براء العبيدي