#مشترك


• حالة مولاتي العليلة ص مع مولاتي رقية ص عند خروج الضعن :


ودِّعتها بس بالگوّه،وحارت اشتگلها
اٌلسالِفه اٌلتخف چلمتها،بالگلب ثگلها

شهگت وسولفت حُبها
وطلعت احچايت گلبها
شلون اودعچ يا رُقيه بيا ادين ؟
ارجف ودمعي چواني
وبيدچ احساسي وكياني
حيره شحچي وعمري بسمچ والسنين
صوتي يوميه يگولچ
وعيني متعلمه اعله طولچ
يعني بـ اٌگصر فرگه يعميها الحنين

عاشنَ اْلم .. مامر بالدنيا اعله واحد
عاشنَ اْلم .. وانخط الدمع گلايد
عاشنَ اْلم .. ويخنگ بيهن التوادد

اجمل وردات
بس مختنگات
••
سولف الدمع هالحاله،تكسر المشاعر
فارگت حنان إخوتها،وظل فكرها حاير

چانت النظره الاخيره
عالگلب كلش چبيره
وي رقيه اتوادعت وابلايه راي
تگلها يختي صعبه اعوفچ
ايعدّي يومي وما اشوفچ
چنت من ايدچ انه اخذ دواي
هسه زادت بيه علّه
المن اشكي وياهو اگلّه
وانتو رحتو كلكم وهاجر هواي

ماكو نفس .. اقسى من جرح هجركم
ماكو نفس .. عفتوها الوحدها بتكم
ماكو نفس .. ولا شفت الهنه بعدكم

الفارگله احباب
ميعوف الباب
••
إلهضم والفراگ اليكتل يعذّبوهن
وكسرة الگلب عاشنها ، غاليات ابوهن

قسوة الموقف شديده
الطفله صعبه اتضل وحيده
هالمواقف على الصاحي اتشبعَه ويل
بعد وشحال المريضه
يا جرح بيها تفيضه
جرح اختها لو مرضها ابتالي ليل
شلون تسهر و اهيه طفله
والرعب متعرف شكله
وفقط متعوده عله كلشي جميل

مات الامل .. وبيها اتهدّمن صروحه
مات الامل .. وضلّن يلچمن جروحه
مات الامل .. والعاشگ رچيچه روحه

ابشبگت الوداع
طاحن عالگاع
••
اصعب الوداع الليله،وي گلب رقيه
سفرة الضعن اطويله،ومامشن سويه

ودّعت اغلى ماعدهـا
والزمـن عــنها بعدها
وظلّت اتعاين اختها ابلا كلام
اتعـاين الــهودج رقيه
اتفارگـــن هاي المسيه
وفرغت الدار من اهلها والعمام
مابـــقت يــمها اخــتها
والدمع يحچي صمتها
وحشه وعيون العليله ماتنام

اتگلها ردت .. چفّج يبقه بين اديه
اتگلها ردت .. نبقه اهنانه للمنيه
اتگلها ردت .. انه شعندي چم رقيه

يختي الله وياچ
يـذبح فــرگاچ



#الشاعر_ابوحميدة_الشويلي

#الخادم_علي_خيري_العبادي