لو يوگف مُحَمَّد على الصندوگ
والتصوير جاي امن السماوات ..
وجبرائيل ينزل حرَس من فوگ
وعلي الكرار يفرز بيده الاصوات ..
هم ما تنضبُط وايصير تَزوير
وهَم ايصير غش بالإنتخابات ..
عَفواْ… موقصوراً بالنبي لاااااا
ولا حيدر اتعُبره هالتَفاهات ..
بس المشكلة الإقرار مَحسوم
گبل جَيّة علي و طه بمَسافات ..
حكومة تعَلِمَت عالنَهب والبوگ
والغش والتلاعُب والكلاوات ..
شما چان الشعب متحَزم و حوگ
ما يگدَر يقاوم هالعصابات ..
إذا مات الشرف يستَفحل العار
وايضيع الوطَن بيد السِلابات ..
كفُر تحكمنه ناس اشلون ما چان
مَيهمهُم شعَبنه… عاش أو مات !!
عراق.. وبالدَمع والحُب بنينااااه
يوگع بيدهُم… والله حَرامات …

الشاعر علي الرسل الجابري

احنه ردنه واحد "كرم الله وجهه"
جابولنه واحد…. "الله مصخُم وجهه"

متباركين بذكرى عيد الغدير
كل عام وانتم بألف خير🌹❤️🌹❤️