الناشر احمد الفاطمي

https://t.me/qasmalmalky94
تشرفونا اخوتي بخدمتكم

صار المعاتب من على النوگ
الماشفته بالطف شفته بالسوگ
لحگ يخويه عليه لعيون تاكل بيه
من على النوگ
................................................
انا اليشفت بكربله من ودعتني وماجيت
المعصوم فگدك حدبه عباس بيه شسويت
مابين جرحك والحرم وحسين اخوي احتاريت
كلهن عشتهن يالگمر بختك يخويه شخليت

تتركني ليش بغربة وتروح
وكل خطوه بدروب السبي جروح
من الطف أشد طاريه لعيون تاكل بيه
من على النوگ
.....................................................
انا السمعت بكربله صوت الذي يشيب الراس
ابن امي صدره مننكسر حين بحوافرها انداس
والحرگه زادت بالسبي من شفت فرحانه الناس
الماشمر حجاره علي يگلي جتلنه العباس

وبيه الهظم ياخويه كتال
السوط على متني وبيدي الاحبال
ماترد يالحنيه لعيون تاكل بيه
من على النوگ
...................................................
مهيوبه جنت بكربله عدلين وعلى التربان
خواني تگعد حسبو عباس خويه العدوان
بالخيمه قران الخدر والهيمه اختك قرآن
عباس بس خويه اليسر مابگه سوگ وديوان

مجتوفه اديه خويه وندار
جاوبني اشگف بيش الاحجار
انا اختك العلويه لعيون تاكل بيه
من على النوگ
...............................................
فوگ الهزل وتذكرك بكل سوط متني يشوفه
ولالحظه بدورب اليسر اسمك الساني يعوفه
اتصنتو ليه العده وضحكو بگد الكوفه
گالولي عباسج تره يخته گطعنه جفوفه

الگطعنه ادينه مايرد ليج
ليوم من ادينه ياهو يحميج
لدربك عيوني اربيه لعيون تاكل بيه
من على النوگ
.............................................
بين الغرب زينب تره بهل وكت نومك ميلوگ
هين عليك الوحدي اسئل وخل تحجي النوگ
ينوخونهن خويه الهزل كلما نطب احنه بسوگ
وماينلزم خويه الدمع چي گلب زينب محروگ

طبول وشماته وغربه وصياح
وروس اهلي كلهن فوگ الارماح
يلراح ماضل فيه لعيون تاكل بيه
من على النوگ
................................................
يتكفل بيا عايله المكسور باله وظهره
افرض السوط اشگف لجن بيش اشگف انا النظره
شماطولن خويه العبي لختك تگد جم صحره
من الشمس خويه بلن تغطيني ريت العشره

لينشد عليه بنشده ميحير
كلهه باصابعهه الي تشير
شمسويه زينب هيه لعيون تاكل بيه
من على النوگ
.................................................
خادمكم قاسم المالكي

طاح الحسين === اطلعن مـن دلال الـبـيه چـنتن
الحيره صوبين === ابـوجه البر تعـثرن لـو تـعـثرن

الــدلال وراح يـا عـمـه فــرن وانــســن الـخـّدر
هاي الخيل اجت تركض اطلعن كلچن اعله البر
الشمر كاتل چبير الـكوم وشـفـته عالـخيـم يفتر


يحچـي اسمـعه وحـچـيه مرتاح
من عـنـدي يـفـرن هـسـه لاويـن
اذا للـنـهـر طــايـح يـمـه عـبـاس
واذا لحسين بيدي راس الحسين
======================

صار الاضياع == وطاحت كل اهل هاشم زلمهه
فرن ابساع == وحده بوحده خل اتضم متنهه

هجن من صهيل الناس ما ضل كل سُبل عدچن
اعله فزعة خوه بعد الخيل غير الطيحه ما الچن
وفشل لو صاحت الوادم خوات حسين هالعثرن

يـا عـمـه حـرت والـناس مـو ناس
ياهـي الـتركـض وعثـروهـه بـرماح
ولا للـخـيـمـه لا لــحسـيـن حيره
اشـمـا هـمـتن عليـچن هـام ذبـاح

======================

وين ترحن == وطاح الچان حيد العرب والخيل
كلهه ضدچن==الحافر و الهوه والماي والحيل

بنات العفه واهل الخير موش ابخير يا عمه
اي ركضن اكول الچن بس التكتل وزحمه
شيقنهه هاي الخيل اتلحك حرمه مو زلمه


البـعـمـرج يـعـمـه كـون تـرتـاح
مو تركض وراهه الخيل والناس
جبيره انتي وحرام ابهل جبيره
ما يلحك عليهه اتجر الانفاس

======================

اهواي وادم == وامگابل عيون اعله العبي ايصير
موش اوادم == هاي الناس كلهه اعليچن ادير

اعله كبر الطف حلال الهم عثرچن والحبل والطك
الما تشهك تعب بالصوط ابدخان الخيم تشهك
اركضن والبقه اعله الله لحد حته الجدم يزهك

ابحيل الباقي عمه هجن ابساع
وعبايه اتكض عبايه وسدن العين
اخر زلمه الچن قبل لحضات
بس الحسين ومات الحسين

======================

ماكو راحه == بعد ما طاح الچن في الخيام
عيشن نياحه== لحد ما بيچن تتعب اجدام

اركضن اسرع امن الخيل روحن وين ماكو امجان
للهيمه اعله ابو فاظل بس حسين لا تعبان
وحك ستر العبي والضيم توه امن الذبح خلصان

التطيح ابنصچن ولا كال الله
بعد ما ترهم (العدله) عليهه
هوه اشضال غير النفس عالكاع
ويروح ابهجمت الهوسه التجيهه

======================
سجاد ابراهيم الكعبي

نجيك.. نزور.. ونشيل بجفنه رايه
يحسين انته اعرف بينه
غيرك لا ماحبينه
.....................

يوم اربعينك كل وكت نحسب إله زين
ونشد حزمنه الكربله ياكرة العين
تتسابك بدرب العشك. بالممشه رجلين
بي عافيه وصحه المشي الكبرك يالحسين

دواء.. شفاء.. ضريحك من نطوفه
انشم اعتابك خلينه
غيرك لا ماحبينه
...................

ماينوصف دربك ابد بي اغرب احساس
شما نعطش بجوده الكمر. يروينه عباس
يحسين من كل الدول تكصدلك الناس
تراب اليسحكه زايرك يطهر وينباس

تراب.. عجيب.. حرز ينضم بالبيوت
شكد من عنده تشافينه
غيرك لا ماحبينه
....................

اهل المواكب بالدرب كلهم معازيب
يحتار واحدهم الك. شيخلي شيجيب
ماي بثوابك وزعوا واليشرب ايطيب
ايفكدون زوارك لون واحدهم ايغيب

كلام.. جميل.. يسمعونه اليجيهم
اهلا بالمتعنينه
غيرك لا ماحبينه
......................

ندعي الله كون بخدمتك. يرزقنه كل عام
نواسي العقيله منتجي. من محنة الشام
وتلكه بگلبنه امن الحزن جمره امن الخيام
امن انصارك ادرسنه الوفه وهل صرنه خدام

نصيح.. حُسين .. املنه ومانعوفك
التآمر والتنهي اعلينه
غيرك لا ماحبينه
....................

نمشي وحكك مانمل دربك يمحبوب
ولو مرهه رجلينه التعب تمشيلك گلوب
زايرك يبقه بكل وكت. من الله مهيوب
كل المواكب تخدمه. ومفتحه البوب

نريد.. رضاك.. يبو سكنه ورقيه
هواي الطفك حنينه
غيرك لا ماحبينه
.....................

كل ضرف عن زيارتك يمنعنه هيهات
نعوف الديار ويه الاهل نتعنه جوكات
نمشي وعلى طول الدرب نحييهه هوسات
بسمك نصيح وهل اسم. يرعب الشمات

نداء.. يصير...سهم للي يضدنه
لجلك موت اتحدينه
غيرك لا ماحبينه


محمد هادي العقابي

بربعينك نجي نزور جدم يسبك جدم
ونلكه عباس عله الماي يروي بالخدم
للضمايه ... بجفه رايه
....................

احنه كل عام هل اجدام
مشي تتعنه الك
برد حر نوصلك
اليحبك ماهلك
اي يالحسين الك دين
صبح هذا العمر
الك فدوه ونذر
وحك ام الخدر

مانعوفك للأبد..... انته يحسين السند
حبك احله امن الشهد... الحب هدايه
..................

اي يمحبوب والذنوب
اكيد برحمتك
تجزها بنظرتك
يدايم نعمتك
فضلك هواي يالهواي
فلا حدك دهر
يفي اعله البشر
يضل دربك فخر

احنه بسمك ننذكر ... غيرك شيسوه العمر
بكل وكت انته الذخر..... عن درايه
..................

من اجيناك عرفناك
تعيش بكل زمن
رغم كل المحن
صرت انته الوطن
انته نوماس بالانفاس
نشمك ياهوه
يضامي بنينوه
وحك راعي اللوه

نعتنيك بغربتك .... مانعوف ازيارتك
نمشي دوم الحضرتك... عدنه غايه
.................

هالملايين. يالحسين
تسد عين الشمس
خذت منك درس
ولا عزوا نفس
من يوعدون يوفون
ولاخلفوا وعد
جمرهم مابرد
يجونك عالعهد

كلها تمشي بهل درب.... والمواكب تنصب
بيك نبضات الگلب... والبدايه
...............

العشك صار. الك حار
اجر يتبع اجر
ندوس اعله الجمر
وابد ماننكسر
الأمل بيك نناديك
يضنوة فاطمه
الخدم متحزمه
المسيره قادمه

انته اغله أمن الهوه...كلها تمشيلك سوه
كل محب گلبه نجوه.... عالسبايه


محمد هادي العقابي

احنه بكل عام مشايه احنه بكل عام
نكتب خدام عالرايه نكتب خدام
...............

نتعنالك وبهمه... يالدربك درب الرحمه
منعوفك يابو اليمه.. نمشي نطوفك
حزام الطفك شدينه.. وعباس يرحب بينه
بجود الماي ايلاكينه.. ويروي اضيوفك

ماعينه تنام عباسك ماعينه تنام
نكتب خدام عالرايه نكتب خدام
................

يالخيرك مابي منه.... بس جفوفك تحضنه
يحسين تضل موطنه... وانته الغايه
كل خادم هاي امنيته... الزاير لوطب البيته
والله ترد كل عافيته... من المشايه

تروح الآلام من عنده تروح الآلام
نكتب خدام عالرايه نكتب خدام
..................

الخطوه بدربك محسوبه... بسجل الزهراء مكتوبه
اليتعنه اتطيح ذنوبه... مثل الوركه
يالحبك خضر بينه... للشباج اشتاكيه
وعيونك يابو سكينه... صعبه الفركه

جور الايام ميردنه جور الايام
نكتب خدام عالرايه نكتب خدام
.................

تجمعنه بطيبة گلبك... وجوكات انسير بدربك
هنياله الحصل كربك... يربح دارين
الدنيا اخلافك مهجوره.. ياسلطان المعموره
الزارك يحسين تزوره... وتكرله العين

ماندري شضام لحبابك ماندري شضام
نكتب خدام عالرايه نكتب خدام
..................

كلمن يفصح عن عشكه... موكب يم موكب نلكه
خدامك عدهم ملكه... محير الزوار
من يوصلهم كل زاير... ايشوف الخير الما صاير
مشايك ميضل حاير...يابو الأحرار

هل خدمه اوسام شرفنه هل خدمه اوسام
نكتب خدام عالرايه نكتب خدام
...................

انته الجنه وماغيرك... يمعيشنه بنص خيرك
بالشدات بتدبيرك... حل الصعبات
مايوكف شي كدامك... يالي مفرح خدامك
رازقنه بهاي ايامك... نحيي العزيات

وترف اعلام بالمجلس وترف اعلام
نكتب خدام عالرايه نكتب خدام


محمد هادي العقابي

مشاية الاربعين


شدينه احزام للخدمه بزودك
بدرب العشاك كل احنه جنودك
يحسين بامانك... يحسين بامانك
................

اي وحك نحرك يضامي مانمل من هل درب
احله شي بالدنيه تدري الحب إذا ويا حرب
يوصل الحضرت جمالك كبل الجدام الكلب
لابرد عنك منعنه ولانكول الحر صعب

نتعب هيهات واحنه بمكصودك
بدرب العشاك كل احنه جنودك
يحسين بامانك... يحسين بامانك
....................

اطيور ونهاجر سويه العاصمتنه كربله
وصوت زوارك اجينه من حناجرنه اعتله
انعوف كلشي باربعينك يالتحيينه بهله
نمشي والعالم يشاهد قافله بصف قافله

للموت اوياك مانوفي اعهودك
بدرب العشاك كل احنه جنودك
يحسين بامانك... يحسين بامانك
....................

ياهوانه ورحمة الله مايغيرنه الزمن
راية الحب ابأدينه ومعتنينك ياوطن
الدنيه غير اعيونك انته شبيهه بس ضيم ومحن
ماكو بين الناس والله گلب من كلبك احن

يالتنطي هواي من تعب زنودك
بدرب العشاك كل احنه جنودك
يحسين بامانك... يحسين بامانك
........................

بالمواكب ناس تخدم خدمه الك تاج وفخر
كله من خيرك عليهم زادهم مهما كثر
وزعو ماي بثوابك ماي من جود الكمر
ياحسين بفضلك انته خيمه صاير عالبشر

معزب الخطار من يوصل جودك
بدرب العشاك كل احنه جنودك
يحسين بامانك... يحسين بامانك
.....................

ياحسين العمر كله ايروح الك فدوه ونذر
الثوب الأسود مانعوفه لاوحك ام الخدر
بربعينك تجي زينب يمك بدمع اليسر
ضيمهه هواي العقيله وبيهه لجمه امن القصر

وانته اعله الدين باذل مجهودك
بدرب العشاك كل احنه جنودك
يحسين بامانك... يحسين بامانك
..................

انته يحسين التهمنه ومايهمنه كل وضع
الدنيه عدنه بس مجالس غيرهه مانقتنع
نحضر بيوم اربعينك عله اعتابك ننجمع
نواسي زينب ياخو زينب نجري وياهه الدمع

ونضل وياك مانجزي حدودك
بدرب العشاك كل احنه جنودك
يحسين بامانك... يحسين بامانك


محمد هادي العقابي

قصيدة في دفن الأجساد الطاهرة ، لسان حال الإمام السجاد عليه السلام ،،،،،

ــــــــــــــــــــــــــــــــــــــــــــــــــــــــــ



يا شيعة أنا السجاد
جيت أدفن الأجساد

بالدمعة واسوني
بالونّة عِينوني

ـــــــــــــــــــــــــــــــــــــــــــــــــــــ

گاعد بنص الخرابة
آنه والعَمّة السبيّة

تِهمِل دموع الوسافة
عالبُقَوا بالغاضريّة

تِنظُر اعليّه بحِزنهه
وگالت بوَنّة شِجيّة

مَرّن اثلاثة وأهلنه
بلا دَفِن فوگ الوطيّة

ظَلّوا على التِربان
لا دَفنة لا أچفان

بالغُربة عافوني
بالوَنّة عينوني

ــــــــــــــــــــــــــــــــــــــــــــــــــــــــ

جاوَبِتهه ودَمعي هالي
مِنتِظِر للباري أمرَه

هُوّ عالِم بالخَفايا
بالمَصالِح هُوّ أدرَى

لحِكمِتَه لابُد نِسَلّم
والگلب لازم نِصَبرَه

وإنتي يا عَمّة صَبورَة
ومَوقِفِچ آنه أقَدرَه

مِن يأمُر المَعبود
لِلطَف أرِد اردود

كِلهُم يِنِطروني
بالوَنّة عينوني

ـــــــــــــــــــــــــــــــــــــــــــــــــــــ

الأمُر مِن الله إجاني
أنتِقِل بِذنَه وقُدُرتَه

وِنطُوَت أرضَه إلِيّه
وسَبّحِت رَبّي وشِكرتَه

مِن وصَلت الغاضرية
دَمعي لَمّن هَل عِذَرتَه

والله لو شِفتوا يَشيعَة
شِنهو مِن مَنظَر نِظَرتَه

مَنظَر يِهِد الحَيل
وصَبّ الدمِع چن سَيل

هذا آنه اسمعوني
بالوَنّة عينوني

ــــــــــــــــــــــــــــــــــــــــــــــــــــ

والدي لَمّن وُصَلته
لَنّي ما أگدر ألِمّه

بالسيوف امگطعِينه
بكِل شِبِر مِن جسمه ثَلمَة

حايِر آنه شلون أشبگه
والنّحَر ظَلّيت أكلمَه

وچَن سَوادة ويَمّي تِنحَب
تنادي يا ويلي يَيُمّه

تِذرِف دموع العَين
يَوليدي آ يَحسين

رَيت آنه ذبحوني
بالوَنّة عينوني

ــــــــــــــــــــــــــــــــــــــــــــــــــــــــــ

والدي شِلتَه بحَصيرة
وبالمَرار عيوني تِجري

وِسمَعِت صوتَه يِگلّي
الطفل وَسدَه علَصَدري

شِلتَه عبدالله وحَسِرتِي
مِستِعِر وَيّاهَه جَمري

وعالگبُر هِلت التّرابَه
وسَلّمِت للباري أمري

وَدّعتَه بالآهات
ومحادَر الدمعات

وِمجَرّحة اجفوني
بالوَنّة عينوني

ــــــــــــــــــــــــــــــــــــــــــــــــــــ

شايِل احزاني علَمَتني
ومِن وصَلت الأكبر آنه

نِسخة مِن طه محمد
مگطّع بسيف الخيانة

يَم ابوي ادفَنتَه الأكبر
ويلي يا عَملَة زمانه

وگتلَه يالأكبر يخويه
وَصّل لجَدّي أمانة

سولِفله عالمَذبوح
وزينب سبيّة تروح

وانه اللي چتفوني
بالوَنّة عينوني

ـــــــــــــــــــــــــــــــــــــــــــــــــــــــ

وگصَدِت جاسم لگيته
عللأرض جثة رِمِيّة

گتله يا جاسم وسافة
حِنّتَك دَم المِنيّة

شِلت ابن عَمي ودِفَنتَه
وبرَغُم هَمّي العَليّة

بالگبر وارَيتَه جاسم
والحِزِن ما خَلّه بِيّة

يا وَسفَة يا جَسّام
بلا مَنحَر إنتَه تنام

رَحتوا وتِرَكتوني
بالوَنّة عينوني

ـــــــــــــــــــــــــــــــــــــــــــــــــــــ

جَمّعِت أنصار ابويه
ذوله الأخيار القلائل

بَيّضوا وَجهِ الرجولَة
وما تِصِح إلهُم بدائل

بالبطولة وبالشجاعة
ضربوا امثال البواسِل

كِلهُم بحُفرة ادفَنِتهُم
والدّمع عالوَجنة سايِل

أجذب على الأنصار
حَسرة وهضُم وَعبار

ومهَدّلة امتوني
بالوَنّة عينوني

ــــــــــــــــــــــــــــــــــــــــــــــــــــ

جِدمِي وَحّدهَه خَذَتني
ولَنّي واگف بالشريعة

هذا أبو فاضل أشوفه
دامي وچفوفه گطيعة

گتله يابو الغيرة جِيتَك
وبالحِزن روحي صَريعَة

أحمِل اويَايَه رسالة
امنِختَك الحُرّة الوِديعَة

تِرضاهه يا عباس
تِنظُر عليّه الناس

وِعدانَه يِسبوني
بالوَنّة عينوني

ــــــــــــــــــــــــــــــــــــــــــــــــــــــ

عَمّي أبو فاضل دِفَنتَه
عالفرات وگلبي ذايب

كَمّلت هاي المَهَمّة
مِن عگب كِل هالمصايب

وِرجَعِت لِعيالي وانَه
صاير بآلامي شايب

هذا يا شيعة الجِرالي
بدِنيِتي شِفتِ العجايب

هذا الحِصَل والصار
وَي عِترَة المُختار

بالحَسرة انِدبوني
بالوَنّة عينوني .

ــــــــــــــــــــــــــــــــــــــــــــــــــ

بقلم الأستاذ /ستار عذاب الحچامي .

فــوك الرمــح مالـوحه ـــ راســك واداوي اجــروحه
الدنيــه ضـــلمه ابناظري ـــ ليــش الشمــس مذبوحه
ـــــــــــــــــــــ ــــــــــــ ـــــــــــ ــــــــــــ
عــالي يابـويه الرمـــح واني زغـــــيره
ارد اشبــــكك ما الــوحك والله حيــــره
جنـــت بحــــضانك يــبو اليمـــه اميـره
رقـــيه هسه عالــهزل راحت اســـــيره
مرونه بــويه عالســـوك ـــــــــ وزحمه العقيله عالنوك
هاي النسلــهة حيــــــدري ـــــــ ليش الشمس مذبوحه
ـــــــــــــــــــــ ـــــــــــ ـــــــــــ ـــــــــــ
بويه تعبني الـــسبي الرحلــه بعـــيده
شيــل بتك هل طلــــب منــــك اتريده
بــس ذكرتك عالرمـــح ماهـــيه ايــده
بـس رسم دمــك حضــن ليه وقــصيده
وسفــه الرمــح جــنازك ـــ عالغـــبره كلها اعزازك
منهوه يجــبر خاطري ـــــــ ليش الشمس مذبـوحه
ـــــــــــــــــــــ ـــــــــــ ــــــــــــ ـــــــــــ
شـــــدو احــبال ابأدينـه وانتـه تنضر
بگلــــبي اعاتب ليش ساكت وانه اصـبر
الصوط بويه جرح متنـــي اشــلون اعذر
بس شفـــت غيمات عيــنك زعــل تمطر
هـــزيت راسك زعـلان ـــــــــــ معذور بوية عطشان
يارروحي مـــوتي قرري ـــــــ لــيش الشـمس مـذبوحه
ـــــــــــــــــــــ ـــــــــــ ــــــــــــ ــــــــــــ
ادري بـــويه اشكـــد تحب ارقيـه بــتك
من ضــربني ســال دمعــك انه شفــتك
بويه من كد العطـش متــفطره شفــــتك
جان رويــت ابدمــع عينـــــك مهـــجتك
من عينــي اجيبلك ماي ــــــــ بس الرمــح عالي اهواي
ادري يجرحك مظهري ـــــــــــ ليش الشمس مذبوحه
ـــــــــــــــــــــ ـــــــــــ ــــــــــــ ـــــــــــ
الشــمس لاحتنــي وتــدنه ليه رمحـــك
فـــياي راســـك سوة اليه وايـــدي جرحك
ماشفـــت واحـــد يواسي الناس تظــــحك
جانت امنيــــتي يـــــبويه مـره افــرحـــك
مات الضوه بسيف الليل ـــــــــ من داست اظلوعة الخيل
ريت ابمـــجــانك منحري ــــــ ليش الشمــــس مذبوحه
ـــــــــــــــــــــ ــــــــــــ ـــــــــــ ــــــــــــ
الشاعر خالد جودي العارضي

من المشي تعبنه// ياعمه هذه حدنه
نرتاح بلكي شويه// مورمات احس رجليه
•••••••••••••
عمه گوليله مريظه وبعد ماتگدر خطيه
وكولي خل تمسح دمعها خل يفك حبله من اديه
منه ماريد الاشربه بس انام وهاي هيه
متني ورم من ظربهم خل يحن گلبه عليه
نرتاح بلكي يرظه// كوليله هنه مرظه
ماريد منه اميه // مورمات احس رجليه
••••••••••••••
عمي يلحادي دخيلك فدوه بس خليني اگعد
والسلاسل فكها مني والله ماراح انه اشرد
وحتلو اركظ يعمي من العطش مارايحه ابعد
من العطش اركظ مسافه وعلى وجهي انوبه اسجد
خليني انام مروتك// خوفني كلش صوتك
اعل المشي مابيه// مورمات احس رجليه
••••••••••••••
هنا يشايل راس ابونه نزله خليني اشبگه
ارد اسولفله على حالي ارد اعيش احساس ملگه
خل يشوف اجفوف اديه امتون بنته اشلون الزرگه
حافيه ودست على مجمر وجدامي هل محترگه
اجدامي هل محترگه// ومتوني صارت زرگه
ومجرحات ايديه// مورمات احس رجليه
•••••••••••••
واستراحينه بخرابه بلا سگف وبدار هيكل
وغمظت عيني دقيقه وحلمت جن صار مقتل
عمتي زينب جنها تنعه وام عبد عن عبد تسال
والحلم مابي عطاشه ولاصعدنه بنوگ هزل
وفزيت من احلامي// شفت العدو گدامي
تاليها ارد مسبيه // مورمات احس رجليه
••••••••••••
من التعب طحت على وجهي اوفيت عليه العقيله
وراس ابوي شبعده عالي شلون الوحه واشتكيله
ارد اسولفله عل حالي شلون من بعده نحيله
السبي خلصلي حيلي وجدمي بلگوات اشيله
العطش فطر جبدي// كل حيل ماظل عندي
حيل وصبر مابيه // مورمات احس رجليه
••••••••••••
وخلصت الرحله الطويله لن وصلناها المدينه
وبطبول استقبلونه والحجر يرمو علينه
وللقصر گادونه كلنه والحبل بعده بدينه
والنذل اشر بصبعه خادمه يطلب سكينه
خدامه طلبو سكنه// چلبنه بيها كلنه
علويه تكظ علويه//مورمات احس رجليه
••••••••••••

تمت_ازهر الزيدي

#دفن_الاجسام_الطاهرة
#١٤٤٤ه‍


دافن اعزاز الگلب.. حدر الترب يعمه
حسين جثه موذره.. وردت ابحصيره المه
مو بالگبر دفنته... وسط الگلب حضنته
يعمه
........
أنه السجاد يعمه وأرد اخبرنچ
گصدت احسين أبوي وكون اعلمنچ
سولفنه سوالف بس يألمنچ
لچن أول سؤال بمنحره عنچ

يگلي زينب عمّتك.. وبيا وضع عفتها
ليش يبني يا علي... وياك ما جبتها
ما جاوبت شبگته.. وسط الگلب حضنته
يعمه
.......
تشابگنه لچن يا شبگه احچيها
اذا چثته وذر يابس دمه اعليها
يعمه شلون المها وين اخليها
صرت كل وذره منه حيل أشم بيها

گمت المنه وصل.. بس ترتجف اديه
من سألني شهالخبر.. عمتك مشت سبيه
ظهري انحنه ولزمته.. وسط الگلب حضنته
يعمه
.......
لميته ابحصيره ودمعي بإرداني
لچن لمّن حملته حيل أذاني
سألني بهالسؤال وهيّج احزاني
بعدها تنادي زينب وين خواني

گتله بس گلبه انفطر.. لا تنشغل عليها
شويه أخرها السبي... وحبل الشمر بإديها
شما سولفت هضمته.. وسط الگلب حضنته
يعمه
..........
وسّدته جسد عاري حبيب الروح
اخلي اتراب المن والنحر مذبوح
فرشته اعله الحصيره وزاد بيه النوح
بكثر دمعات عينچ عمه بيه اجروح

عمه تيهت العدد.. كلما ردت اعدهن
لا هي جرحين وجرح.. حتى بصبر اشدهن
أشرلي وافتهمته... وسط الگلب حضنته
يعمه
.......
ينادي ابصوته يا عمه اسمعنه
خلي بحضيني عبدالله اشمنه
جبت بيدي الطفل وبلحده ادفننه
لگيته ابلايه راس شلون اوسدنّه

احتار گلبي بهالامر.. حيل انعصر دلالي
اثنينهم وابلايه روس.. غالي شابگ غالي
منظر صعب رسمته.. وسط الگلب حضنته
يعمه
.......
حسام ناجي الحلي

ياهلي..الخيل شمسويات بيكم
ياهلي..زينب اتسلم عليكم

وياي ودّت ماي..مشتاگه عمتي هواي
.................
للدفن جيت ودموعي تسبگ اجدامي
وجبت ماي امن العقيله الكل نحر ضامي
اتسلم اعليكم هوايه هيه وايتامي
اتگول بوس انحور اخوتي وبوسلي خيامي

ياهلي..وگالت اشتم المحامل
ياهلي..وقْبل چفوف ابوفاضل

يابعد هاي وهاي..مشتاگه عمتي هواي
.................
ياهلي يحزام ظهري البيكم اتفاخر
وسفه من جيت الدفنكم بالجثث اعثر
ماكو واحد جسمه سالم وراسه عالمنحر
حتى عبدالله الرضيع انداس واتوذر

ياهلي..بحالكم ياهلي شصاير
ياهلي..الله لاينطي الحوافر

واحچي گمت بهداي..مشتاگه عمتي هواي
.......................
الجاي يدفن اهله بيده يخفي يالوعه
بعيني شفت حسين ابوي امطشره ضلوعه
امن النحر چان ابوفاضل يهمل دموعه
وعالثره العريس جاسم طافيه شموعه

ياهلي..الخوه باگت ثلث عمري
ياهلي..علي الاكبر كسر ظهري

ودمعي شرَح بلواي..مشتاگه عمتي هواي
...................
وآنه من جمر المخيم مشتعل جمري
حسين لمّيته بحصيره ولملمت عمري
بگبره خليته اعله كيفي والدمع يجري
وصاحلي وسّد رضيعي ياعلي الصدري

ياهلي..جان اعز من روحه هوه
ياهلي..وشافه بحضانه ايتلوّه

العبدالله يارجواي..مشتاگه عمتي هواي
...................
وجبت انصار الحسين الكلها وفّايه
بگبر واحد والزچيه تدفن اويايه
واگصدت صوب الشريعه والحچي هوايه
وادفنت ويه الكفيل الجود والرايه

ياهلي..گتله والهضمه ثجيله
ياهلي..اتسلم اعليك العقيله

ويدري الله ياوفّاي..مشتاگه عمتي هواي
...................
الشاعر
حسين حيدر الكربلائي٢٠٢٠/٩/١