يم الخدر رحيل باچر سفر طويل
باچر هجر.....لمن يمر....وحدچ بلا كفيل
*************
بس يهل باچر يزينب ويه فجره
مصاب مامر ع الواحد بيچ يجره
باچر اجروحچ تفز والعين عبره
ينكسر گلبچ ولا واحد يجبره

باچر يجي العذاب چم لوعه چم مصاب
دمعچ يصب.....وسط الغرب......عنچ هلچ تشيل

خويه بس هالليله بس هاي المسيه
وداع خويه والفجر باچر منيه
باچر التوديع يصعب حيل اليه
گبل باچر ارد احط ايدچ بديه

باچر حزن جراح باچر بجي ونياح
باچر اشد.....خويه وبعد......دمع الهجر ثجيل

خويه باچر لويجي يحزون نحري
والشمر خويه يتربع فوگ صدري
من تصدين الشمر يابعد عمري
خويه لاتنسي الوصيه خويه اصبري

صبري على هالحال عينچ ع العيال
يم المحن.....باري الضعن ......وعينچ ع العليل

باچر العباس خويه تطفي عينه
ع النهر لايسره عنده ولايمينه
باچر يروح الگمر حامي الضعينه
ومايرد اجوب لمن تنتخينه

راسه بعمد ممرود يطيح العلم والجود
بعينه السهم ......راسه انهشم.....دم منحره يسيل

باچر الدلال خويه يصير جمره
جاسم تشوفينه باچر يطفي بدره
خويه والاكبر خناجرهم توذره
وحته عبدالله الطفل ينگطع نحره

باچر دمه وخضاب باچر يحز رگاب
محد يظل .....من الاهل .....لاوالي لا خليل

باچر تفرين من خيمه لخيمه
ومن تغير الخيل تسحگ چم يتيمه
من يجيچ المهر يصرخ بالظليمه
الهوه يجرحچ اذا هب بنسيمه

لضرب السايط اثار والخيم بيهن نار
جتاف وحبل ....فوگ الهزل ....بلاخيمه يلفي الليل

اخوتچ فوگ الثره يظلون صرعه
والموادع ع الهزل ياخويه دمعه
خويه والسجاد ذابل مثل شمعه
بالسناسل منجتف وشلون وضعه

حرگه ودمع ضياع فوگ الهزل وداع
دمعچ يهل ....ماينحمل....درب السبي طويل

خويه من باچر بعد ينشاف طولچ
ديره ديره هاه يزينب ينضروچ
خويه كل نضره بسهم لو باوعولچ
وتنتخين بأخوتچ مايفزعولچ

بس الاشد عليچ مجلس يسب والچ
طاغي بحكم ....بمجلس ظلم ....سب حامي الدخيل

علي الجناحي

@Ali_aLgenaih