Islom haqida tushunib yetganlarim
17/20

Eslatma! Quyidagilar mening Islom haqidagi shaxsiy bilimlarim bo'lib, unga qo'shilmaslingiz, tuzatishingiz yoki qo'shimcha qilishingiz mumkin. Bu narsa albatta Islom asl haqiqatiga hech qanday ta'sir qilmaydi.

➡️ Alloh oliy va yagona ega, biz esa uning qulimiz. Musulmon bo'lish mana shu narsani so'zsiz qabul qilishdan boshlanadi. Undan uzoqlashish esa inkor qilishdan. Isboti sifatida Qur'on boshi va har kuni o'qiladigan Fotiha surasi ma'nosiga qarang

➡️ Allohga qullikni tan olish — bu inson erishishi mumkin bo'lgan ozodlikning eng oliy darajasi. "Hech kimga qul emasman" deb hisoblash nafsga qul ekanlikdan kelib chiqadi. Allohga qullikni inkor qiluvchilar esa, o'zi Xudo bo'lishga intiluvchilar

➡️ "Dindor bo'lib olim bo'lish mumkin emas" yoki "Din fikrlashga emas, so'zsiz itoatga buyuradi" degan gaplar har qanday boshqa din uchun to'g'ri bo'lishi mumkin, lekin oliy kitobida mingga yaqin fikrlashga buyurgan Islom uchun emas

➡️ Aksincha Islomda o'qish, o'rganish, izlanish — farz. Eng birinchi bo'lib buyurilgan farz. Tanqidiy fikrlash, ishonchida ko'ngil xotirjam bo'lishi uchun savol so'rash esa Ibrohim alayhissalomdan meros

➡️ Islomda bilim diniy yoki dunyoviy qilib ajratilmaydi. Buni Payg'ambarimizga (sallallohu alayhi vasallam) avvaliga uch marta "O'qi" deb buyurilgan paytda nimani o'qish haqida aytilmaganidan ham bilish mumkin. To'g'ri o'rganilgan har qanday bilim yakunda Allohga yaqinlashtiradi.

➡️ Hasanxon Yahyo ustoz aytganidek, Qur'on Alloh tomonidan nozil qilingan, dunyo esa to'shab qo'yilgan bilim. Jamiki bilim Allohniki. Biz hech narsani o'zimiz yaratmaymiz, faqatgina kashf qilamiz va foydalanishni o'rganamiz

➡️ Ibodat qilish, buyurilgan amallarga rioya qilish va qaytarilgandan uzoq bo'lish bu faqat inson o'zi uchun foydali. Faqat oxirat uchun emas, shu dunyo uchun foydali. Oxiratda olinadigani esa Alloh tomonidan beriladigan mukofot

➡️ Musulmon odam faqatgina musulmon bo'lgani uchun jannatga kiraman deb ishonishi xato. Juda katta xato. Bu kabi fikrlash musulmonni Qur'onda eng ko'p tanqid qilingan yahudiy ahlidan farqsiz qo'yadi

➡️ Qur'onda qaysidir xalq yoki odamlar tanqid qilingani, Alloh ulardan ranjigani boshqa odamlarga ulardan nafratlanish huquqini bermaydi. Kimnidir jannat yoki do'zahga kirishini hal qilish esa faqat Allohga xos, bandaga bunday huquq berilmagan

➡️ Islomda oxiratda Alloh jazolaydi deb emas "yoki mukofotlaydi yoki adolat o'rnatadi" deb qaraladi. Jannat — bu Alloh bilan birga bo'lish. U Allohning mukofoti. Do'zah esa shunchaki uning aksi. U esa odam o'z tanlovi

➡️ Taqdir bu shunchaki bitta yo'l emas. Alloh bir inson uchun faqat bitta "variant" ishlab chiqqan degan tushuncha men uchun uning buyukligini kamaytirishdek tuyuladi. Taqdir — bu millionlab, milliardlab yo'llar kombinatsiyasi. Har bir onda inson ulardan birini tanlashi mumkin. Alloh esa mana shu yo'llarning barchasini tuzib chiqqan. U ularning har biri qayerga olib borishini biladi

➡️ Va ularning ichida biri inson uchun eng yaxshisi. Shayton bizni u yo'lga qaytib bo'lmaydigan darajada uzoqlashtirishga intiladi. Iymon esa unga maksimum yaqin yurishga. Odam doimiy mana shu narsa orasida tanlov qiladi. Ba'zi sinovlar insonga jazodek tuyulishi, aslida esa shu yo'lga olib boruvchi vosita bo'lishi mumkin

➡️ Islom zamon o'tib eskirib qolmaydi. U har bir zamonda to'g'ri bo'lib qolaveradi. Lekin eng muhim joyi u odam nafsiga qarab egilib-bukilmaydi. Uning ilohiyligi ham mana shunda

➡️ Qur'on bo'yicha Odam ato va Momo havoga taqiqlangan daraxt mevasini yeyish man qilinmagan. Unga umuman yaqinlashmaslik buyurilgan. Islom ham huddi shu kabi shunchaki gunoh amallarni taqiqlamaydi, ularga umuman yaqinlashmaslikni buyuradi

➡️ Qur'on to'liq ma'nosini Arab tilidan boshqa hech qaysi til to'liq ochib berolmaydi. Shuning uchun ham u boshqa tillarda faqat tavsif qilinadi, (to'liq) tarjima emas

➡️ Biz musulmonlar shunchaki pastda qolib ketishga haqqimiz yo'q. Alloh bizga jannat darajalari misolida eng oliy darajalarga harakat qilishga buyurgan. Unga munosib bo'lishimiz kerak

#Islam

@Musayev_blogi