📝نئچه ایل اؤنجه، بایرام تعطیل‌لرینده حایات یولداشیم و قیزیم‌لا بیرلیکده شیرازا گئتدیک. اورادا بیر سیرا قاشقایی یولداش‌لارلا دا گؤروشدوک. اؤزل‌لیک‌له اوستاد مردانی رحیمی جناب‌لارینین قوللوغونا چاتدیم. بیر گون ده بوتونلوک‌له تورک شهری ساییلان #فیروزآباد شهرینده #عوض_اله_صفری کشکولی جناب‌لارینین قوللوق‌لارینا چاتدیق. قاشقایی یئمک‌لرله بزه‌نیلمیش ناهار سوفره‌لرینه قوناق اولدوق. ناهاردان سونرا قاشقایی‌لار حاققیندا سؤیله‌دییی اوزون بیر شعره بیزی قوناق ائله‌دی. شعرینده دریندن #اوستاد_شهریارین شاه اثری ساییلان #سهندیم آدلی شعری‌نین ایزی گؤرونوردو. (یاشاسین اوستاد شهریار کی اؤز سینیرسیز شعرلری ایله بوتون تورک‌لرین اویانیشینا ائتگی بوراخیبدیر!) شعردن سونرا قاشقایی‌لارین اردملی تاریخیندن دانیشدی. بو قونودا یاییملادیغی هابئله یاییملایا بیلمه‌دییی بیتیک‌لریندن سؤز آچدی...

📝او گون‌لر، فیروزآباد شهرینده "مارال"، "چای چؤرک" و بونلارا تای توکان آدلارینی گؤرمک منی چوخ ماراقلاندیرمیشدی. نئچه گون اؤنجه عوض‌اله صفری جناب‌لاری قاشقایی یوردو ساییلان آنجاق، #فارس آدلانان اوستانین "صدا و سیما"-سینا آچیق بیر مکتوب یازاراق، قاشقایی‌لارین بیر پارا ایستک‌لرینی دیله گتیرمیشدیر. بو گون اویانیش سوره‌جی قاشقایی‌لار آراسیندا گونو گوندن آرتیق ایره‌لی‌لمکده‌دیر. بیزیم بورجوموز ایسه اونلارین سسی اولوب، اونلارا دایاق دوروب، اونلارین الیندن توتماقدیر.