Онам алласи (таскини)

Дунё бойга зўр болам,
Эй манглайи шўр болам,
Кимлар чалиб йиқитди,
Тур, ўрнингдан тур болам.

Йўқламай қўйдиларми,
Кимлар бор, нонкўр болам.
Бўлди энди куйинма,
Одамга ғамхўр болам.

Ким шаддоду, ким шаккок,
Сен ҳам ғўр ҳам ўр болам.
Дунёнинг тўрт томони,
Қопқон, қармоқ, тўр болам.

Тақдирнинг қўшиғига,
Бўлгил энди жўр болам.
Руҳингдаги исённинг,
Бошига бир ур болам.

Савол берма Худога,
Бу дунё ур-сур болам.
Аҳволимга қарада,
Аҳволингни кўр болам.

Сен боғ ярат, гулзор туз,
Эй ҳар сатри дур болам.
Ёмонлар ўз-ўзига,
Қазиб ётар гўр болам.

Булутлар кетди, кетдик,
Юр, уфққа юр болам.
Оҳим етди, кўряпман,
Бош устингда нур болам.

Уйғон энди тур болам....

14.01.2018 й

@Guljamol_Asqarova