Agar mening tavbalarim yo'l bo'lsaydi,
Agar sening izhorlaring gul bo'lsaydi,
Unda dunyo uzun -uzun yo'l bo'lardi,
Yo'lning cheti esa faqat gul bo'lardi.

Sen aytganday go'zal bo'lsa edi ko'zim,
Men aytganday sodiq bo'lsang edi o'zing,
Unda quyosh osmoniga zeb bo'lardi,
Yulduzchalar sandig'imga sep bo'lardi.

Senga rostdan yoqsa edi kulishlarim,
Bilsang edi yolg'oningni bilishlarim,
Ko'zlarimga boqmay, ketging kelar edi,
Mening dunyom ostin -ustun bo'lar edi.

Yer aylana, koinotda muallaqdir,
Bu dunyoda faqatgina O'zi haqdir.
Sening yolg'on aytmog'liging bilmam, nima?
Mening yolg'on eshitishim, balki taqdir.

Ishon, sendan haqiqatni kutganim yo'q,
Yolg'oningdan zarra ozor yutganim yo'q.
Chunki mening taqdirimda bo'lsang, agar,
Hatto meni yolg'onlaring baxtli etar.