تعالي يا طارق سلم علي طنط منال وبنتها سارة.
= أهلا وسهلا ازيكوا.
- اهلا بيكوا.
طارق ابني بقي هو اللي مسؤول عن البيانات الايضاحية علي اكياس الشيبسي.
- دا اللي هو ازاي ؟
= 30 % غباء لكل 100 جرام.
اهاهاها..يا طارق هتفضحنا..اقصد انه موظف مهم يعني.
- ما شاء الله..شاب زي الفل ربنا يحفظه.
= 30 % مجاملات لكل 100 جرام.
- اااااا..انا سارة برضه مهتمة بدراستها ومتفوقة.
لا و ما شاء الله لفت واتدورت وربربت وعلي وش جواز.
= 80 % دهون مشبعة.
- مهو البركة فيكي بقي تشوفيلنا عريس.
= 70 % رمي جتت منهم 20% تلميح.
- انت عمال تقول ايه يابني ؟!
عريس ايه بقي وطارق موجود ؟ انتوا هتلاقوا احسن منه ؟
- مش كدا ؟ عاوزين نفرح بقي قبل ما نموت.
= 100 % احلام يقظة.
- ما تشوفي ابنك دا عمال يقول ايه !!
يا طارق ماتبوظش القعدة أرجوك !!
- احنا اتهزقنا هنا..هو انا بنتي معيوبة ؟
= تطبق الشروط والأحكام.