هذا الغريب امنين. وين اهله راحو وين
كانت لهذه الكلمات وقع في داخل كل غيور وموالي ل ال محمد صلوات الله عليهم. فكان جوابي. 👇



هذا الغريب امنين. تجرحني هالكلمه
_________________________________
ارتفع صوت المنادي. ودمعه هله
وين اخوته هالغريب. اوين اهله
ليش ما واحد اجه من اهله يحمله
خل يجيني ابنه اريدن. كلمه اكله

ميت ابوه مسموم. خل يطلب ابدمه
هذا الغريب امنين. تجرحني هالكلمه
________________________________
ليش ما واحد يجي. يغسله ويشيعه
ايصلي اعليه وعله. امتوونه يرفعه
وتلتم احبابه عليه. تبجي وتوودعه
وابنه يقره الفاتحه. اويشعله شمعه

وين اخوته ابهاليوم. شو ما اجوو يمه
هذا الغريب امنين. تجرجني هالكلمه
_________________________________
لحظه والصوت ارتفع. من العوالي
راهب اهل البيت هذا. ابن الغوالي
كضه عمره بالسجن. بأمر المغالي
لا اهل بيته المشوله. اولا مووالي

كضه العمر مسجون. وبكلبه جم لجمه
هذا الغريب امنين. تجرحني هالكلمه
__________________________
من درو هذا النعش. لبن الزجيه
اتعنوو وشالوو. غريب الكاظميه
مارضو نعشه يضل. فوك الوطيه
بس الف ويلي على. والد رقيه

ضل عالترب عريان. ياويلي ابو اليمه
هذا الغريب امنين. تجرحني هالكلمه
______________________________
موسى مات ومن بعد.لحظة مماته
ماكو اي واحد اجه. اوسلب بناته
بس ابو الاكبر لمن. خلصت حياته
بقت زينب فرجه. لعيون الشماته

زينب مشت للشام. ياصدمة الصدمه
هذا الغريب امنين. تجرحني هالكلمه
_________________________________
خادم باب الحوائج. ع
الشاعر الحسيني/ علي الاصبحي