يا حِزن شدْ اعزُومك
نا اليوم همّك الاول
نا هو الدْ خْصومك
لا تاخذَك رحمَه ولا حنيّه
اضرب بقوّة..
ع الجروح الحيّه !
اهدم اركان الفَرح
اعصِف برِيحك
في حنايَا صدرِي
لا تلتفت للبَاكي
وانهي الي بادِيه
بدرِي بدرِي
واترك لنَاسي
جثتِي مَرميه !
ونا نُوعدك.. ما ايجِيك حد يلُومَك
نا اليُوم همّك الاوّل
نا هو الدْ خصُومك

يا حِزن قوي عَزمك
وينْ هِيبتك ؟!
الي كنت بيها اتهدِد
ما تاخذكشْ الرأفه
اهدم بَقايا الحِلم
لا اتردّد
صارعت واجَد
ولا في اوحلتْ ؟!
واتعود مني دوم خايِب ظنّك
جيتك اليُوم
والعِمر لك ناولتْ
ليشْ مِندهش؟؟ شنْ صار !!
خايف كنّك؟؟
مذهُول؟ ولا ع القَسا بطّلت !
مليُون من ذابْ وتعذّب مِنك
ف القهر كِنت الاول..ليش نزّلت من سُومك ؟!
نا اليوم همّك الاوّل
نا هو الدْ خصُومك

ما ياخذَكش الحِن
سمّعني صْراخي
ف المَكان يرِن ؛
مازال في انْفاس
اطغى عليِ
وانهِي الحيَاه
اضرِب الرّوح
بهُولك وجَبروتك
واضْحك حْذاي
وين راح مِنك صُوتك؟؟
الي اصْدارك ميّت
غير حاول انه يعيشْ
طاحْ ف قِطيع ذيَابه
منهِم شِبع تِنهيش
والحَل توا بيدّك
واليُوم راهُو يُومك
اخر احلامَه صارتْ
انك اتشِد عزومَك !

يا حِزن شدْ اعزُومك
نا اليوم همّك الاول
نا هو الدْ خْصومك ❗